„შემიძლია მთელი პასუხისმგებლობით გითხრათ, რომ არცერთი დღე პარტია „ნაცმოძრაობასთან“ გეკა გელაძეს შეხება არ ჰქონია და ერთადერთი პარტია, რომელთანაც შეხება ჰქონდა და რომლის გუნდის წევრიც არის, ეს არის „ქართული ოცნება“. „ნაცმოძრაობის“ დროს ჰქონდა რიგითი პოზიციები და ყველა მაღალი თანამდებობა, რასაც იკავებდა, ჰქონდა „ქართული ოცნების“ დროს. 3 თუ 4 მარტო სამინისტრო გამოიცვალა მინისტრის მოადგილის რანგში, ჩვენი გუნდის ერთ-ერთი დასაყრდენი კაცია, მენეჯერი, გუნდში ცნობილი თავისი მენეჯმენტით და საუკეთესო უნარებით. რა ნაცობაზეა საუბარი?!“, - ამის შესახებ საპარლამენტო უმრავლესობის ლიდერმა მამუკა მდინარაძემ გადაცემაში „ღამის კურიერი“ განაცხადა. როგორც მან აღნიშნა, „ნაციონალური მოძრაობა“ გეკა გელაძის დისკრედიტაციას მათი გუნდის წევრობის დაბრალებით ცდილობს.

„ეს არის მდაბიო პროვოკაცია, გახსოვთ, პუტინს რომ აგინებდნენ პირდაპირ ეთერში? მთავარია, მიზანი რა არის. შენ რომ გულწრფელ ემოციას გამოხატავდე, მესმის, მაგრამ, რეალურად ეს ემსახურება პროვოკაციას. სხვა ვერაფერი მოახერხეთ „ნაცურმა“ ფლანგმა და ახლა ამ მდაბიო, ამაზრზენი პროვოკაციით ცდილობთ, რაღაც გამოიწვიოთ“, - ასე უპასუხა საპარლამენტო უმრავლესობის ლიდერმა მამუკა მდინარაძემ, ერთ-ერთი ოპოზიციური ტელეკომპანიის კითხვას ერეკლე გეწაძის მიერ Tbilisi Open Air-ზე რუსეთის დროშის შეურაცხყოფის გამო, რუსეთის საგამოძიებო კომიტეტის ხელმძღვანელის მიერ გამოძიების დაწყებასთან დაკავშირებით.

„საქართველო არასდროს ყოფილა ისეთი დამოუკიდებელი, როგორც დღეს! ჩვენ ეს შევძელით და ამას ვეღარაფერი, ვერანაირი შანტაჟი, გარედან ამორალური ჩარევები და ემისრობა ვერ მოერევა“, - ამის შესახებ „ქართული ოცნების“ აღმასრულებელი მდივანი მამუკა მდინარაძე სოციალურ ქსელში წერს. 

„ბრძოლაში ეს ვითომ „მეგობარი“, სინამდვილეში მტრული აქტი, არ მივიჩნიეთ იმ წონის მოვლენად, თუ მტკიცებულებად, თუ დოკუმენტად, რომ ამაზე აი ასეთ სერიოზულ საუბარში, დისკუსიაში ჯერ არასაჯაროდ, რაც მიმდინარეობდა, ახლა საჯაროდ, რაც გამოვიტანეთ საზოგადოების არა მხოლოდ ქართული, მსოფლიო საზოგადოების წინაშე, რომ აქ ფაქტორად ჩაგვეთვალა ეს აქტი, იმიტომ რომ მართლა ხავსია ქართული აგენტურული ოპოზიციისთვის“, - ამის შესახებ საპარლამენტო უმრავლესობის ლიდერმა, მამუკა მდინარაძემ, ჟურნალისტებს განუცხადა. მამუკა მდინარაძის განცხადებით, ის დუმილი, რომელიც ამერიკის შეერთებული შტატების მხრიდან მოდის არის გაურკვევლობა, მათ შორის „დიფ სთეითის“ წინააღმდეგ ბრძოლაში.

„ჩვენი ქვეყნის, ჩვენი სამშობლოს ნებისმიერი მიმართულებით გაძლიერება ავტომატურად ემსახურება მისი სუვერენიტეტის და დამოუკიდებლობის ხარისხის განმტკიცებას და გაძლიერებას“, - ამის შესახებ საპარლამენტო უმრავლესობის ლიდერმა, მამუკა მდინარაძემ კორუფციასთან ბრძოლის ინდექსზე საუბრისას განაცხადა. მისივე თქმით, მმართველი გუნდი ყველაფერს გააკეთებს იმისათვის, რომ კორუფცია ამ ქვეყნის განვითარების შემაფერხებელი ფაქტორი არ იყოს.

„ქართულმა ოცნებამ“, რა თქმა უნდა, ქართველ ხალხთან ერთად, მიაღწია ქვეყნის დამოუკიდებლობის იმ ხარისხს, რომ ჩვენ შეგვიძლია, ამაყად ვთქვათ: დღეს საქართველოსა და ქართველი ხალხის შესახებ გადაწყვეტილებები მხოლოდ საქართველოში მიიღება და ამავდროულად, ჩვენ პირველები ვართ ევროპაში ეკონომიკური განვითარების ტემპითაც“, - ამის შესახებ „ქართული ოცნების“ აღმასრულებელმა მდივანმა მამუკა მდინარაძემ პარტიის მე-9 ყრილობაზე სიტყვით გამოსვლისას განაცხადა. მდინარაძემ ყრილობაზე პარტია „ქართული ოცნების“ ახალ თავმჯდომარედ ირაკლი კობახიძე წარადგინა და წარმატებები უსურვა.

საპარლამენტო უმრავლესობის ლიდერის მამუკა მდინარაძის განცხადებით, პარლამენტის დროებითი საგამოძიებო კომისიის მიერ შემუშავებული დასკვნის შემდეგ ხელისუფლებას მყარი საფუძველი ექნება იმისთვის, რომ მიმართოს საკონსტიტუციო სასამართლოს ამ პარტიების აკრძალვის შესახებ, რათა აღარ განმეორდეს 2012 წლამდე არსებული სისასტიკე და ოპოზიციონერად არ იწოდებოდეს აგენტურა, რომელიც გარე ძალების, ქვეყნების, თუ კონკრეტული დაჯგუფებების თუ ჯგუფების დავალებებს ასრულებს.

„საპარლამენტო ცხოვრება მიდის, კანონების მიღება სწრაფ ტემპში მიმდინარეობს, მავნებლობით არავინ გვიშლის ხელს, გადაწყვეტილებასაც ვიღებთ და რაც ყველაზე მეტად მიხარია ქვეყნისთვის, რაც 2012 წლიდან გვაიძულეს გარედან, მიგვეღო, ამ ყველაფრის გასწორება მიდის, რომ მაქსიმალურად მოერგოს დამოუკიდებლობის გაზრდის ხარისხის ინტერესებს“, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ განაცხადა. მდინარაძის თქმით, საპარლამენტო ცხოვრება აქტიურად მიმდინარეობს და იმაზე მეტი გადაწყვეტილებები მიიღება, ვიდრე წინა მოწვევის პარლამენტში. მისივე განცხადებით, საქართველოს პარლამენტი, რომლის ლეგიტიმაციის ეჭვქვეშ დაყენება ზოგიერთებს სურთ, მყარად დგას და ბევრ გადაწყვეტილებას იღებს.

საპარლამენტო უმრავლესობის ლიდერის მამუკა მდინარაძის განცხადებით, „ქართული ოცნების“ ყრილობაზე არჩეული იქნება პარტიის ახალი თავმჯდომარე, ასევე, მცირედით განახლდება პოლიტიკური საბჭოს შემადგენლობა. როგორც მდინარაძემ უმრავლესობის სხდომის შემდეგ გამართულ ბრიფინგზე აღნიშნა, დეტალები მოგვიანებით გახდება ცნობილი.

„აგენტი არ შეიძლება საკუთარ სამშობლოს ემსახურებოდეს, ის ემსახურება იმას, ვინც ფულს უხდის, ვინც „დაავერბოვკა“ და დავალებებს აძლევს. დღეს, ჩემი ქვეყნის ტერიტორიაზე დგას რუსეთის საოკუპაციო ჯარი, რომელიც დიდად არ აწუხებდა ამ ხალხს, ვიდრე უკრაინის ომი არ დაიწყო და რუსეთი არ შეიჭრა უკრაინაში“, - ამის შესახებ „ქართული ოცნების„ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ, სამოქალაქო საზოგადოების ფონდის ევროინტეგრაციის პროგრამის მენეჯერის, ვანო ჩხიკვაძის სტატიაზე საუბრისას განაცხადა, რომელშიც ჩხიკვაძე ბრიუსელს ზომების მიღებას სთხოვს, მათ შორის, უვიზო მიმოსვლის შეჩერებას. როგორც მამუკა მდინარაძემ აღნიშნა, სანამ რუსეთი უკრაინაში არ შეიჭრა, მანამდე ჩხიკვაძის მსგავსი ადამიანებისთვის, საქართველოს ტერიტორიაზე მდგომი საოკუპაციო ჯარები და ომში დაღუპული გმირები, პრობლემა არ იყო. უმრავლესობის ლიდერის შეფასებით, ის, რასაც ვანო ჩხიკვაძე და მთლიანად, აგენტურა აკეთებს, საკუთარი ქვეყნის ღალატია.