აჭარაში, ხინოს ხეობაში ვერტმფრენით ორ ახალგაზრდას ეძებენ. ცნობილია, რომ ახალგაზრდებმა დახმარებისთვის 112-ში თავად დარეკეს. მათი თქმით, ხინოსა და გომის მთებს შორის გზა აებნათ. ერთ-ერთ მათგანს მიღებული ჰქონდა ქვედა კიდურის დაზიანება, რის გამოც მაშველების მისვლამდე, დაკარგულებს მოუწიათ მთებს შორის არსებულ ხევში გაჩერება.
„შეტყობინების მიღებისთანავე, მოქალაქეების დასახმარებლად გავიდა სახანძრო-სამაშველო ძალების დეპარტამენტის 3 ჯგუფი. საგანგებო სიტუაციების მართვის სამსახურის თანამშრომლებს რთული რელიეფის გამო, მოუწიათ ხეობაში ქვეითად გადაადგილება. ცუდი ხილვადობის გამო, ღამის განმავლობაში, ვერ მოხერხდა პროცესში საჰაერო ძალის ჩართვა. დილიდან, გათენებისთანავე მუშაობა დაიწყო შინაგან საქმეთა სამინისტროს სასაზღვრო პოლიციის ვერტმფრენმა, რომელშიც იმყოფებიან მეხანძრე-მაშველები და ექიმები“, - აღნიშნულია საგანგებო სიტუაციების მართვის სამსახურის განცხადებაში.
⭕ასევე დაგაინტერესებთ:
„აღარ დადგა დრო, რომ ყველანაირ უმცირესობას მიეცეს სუნთქვის უფლება? "- გიორგი გასვიანი
გურამ ფალავანდიშვილის და „ალტ-ინფოს“ დამფუძნებლების სახლებში ჩხრეკა მიმდინარეობს
