1 დეკემბერს, თბილისის დროით 00:14 საათზე, ვენერა ტოვებს მორიელის ემოციურ, კრიზისულ სივრცეს და მშვილდოსნის ცეცხლოვან ნიშანში გადადის“, - ამის შესახებ სოციალურ ქსელში ასტროლოგი, ფსიქოლოგი და რამდენიმე წიგნის ავტორი, რამაზ გიგაური წერს და საზოგადოებას რჩევებს უზიარებს.
„ვენერა მშვილდოსანში: ოპტიმიზმის, ექსპანსიისა და სიყვარულის ახალი ჰორიზონტები
1 დეკემბერს, თბილისის დროით 00:14 საათზე, ვენერა ტოვებს მორიელის ემოციურ, კრიზისულ სივრცეს და მშვილდოსნის ცეცხლოვან ნიშანში გადადის.
სიმბოლურია, რომ ეს ხდება შემოდგომის ბოლოსა და ზამთრის დასაწყისში — თითქოს სამყარო გვეუბნება: „რაც დასასრულებელი იყო — დასრულდა. დროა, ჰორიზონტს გახედო!“
მორიელის სიღრმეებში ჩაძირვამ და „ემოციურმა წმენდამ“ თავისი საქმე გააკეთა. ახლა კი დადგა ის მომენტი, როცა სიყვარულისა და სილამაზის პლანეტამ „გონიერი ცეცხლის“ ენერგია უნდა მიიღოს.
რას მოგვიტანს ეს პერიოდი?
ურთიერთობები, როგორც ზრდის შესაძლებლობა: ვენერა მშვილდოსანში ურთიერთობას აღიქვამს არა როგორც დრამას ან მესაკუთრეობას (როგორც მორიელში იყო), არამედ როგორც განვითარების, ექსპანსიისა და ექსპერიმენტების ასპარეზს.
• გამოვლენის მაღალი დონე: სულიერი ნათესაობა. პარტნიორი ხდება მენტორი, მეგზური და თანამოაზრე.
• გამოვლენის დაბალი დონე: პრესტიჟის დემონსტრირება, სნობიზმი და „ელიტარულობის“ თამაში.
პარტნიორი ამ დროს გულით და რაც მთავარია, მასშტაბით აირჩევა (და არა ვნებით, როგორც მორიელში). ამ პერიოდში გულუხვობა, იუმორი და გულწრფელობა ყველაზე ძლიერი მაგნიტი ხდება.
საერთოდ, მშვილდოსნისთვის დამახასიათებელია ეგზოტიკისა და სიახლის ძიება, სწორედ ამის გამო, სასიყვარულო ინტერესი ხშირად საზღვრებს გარეთაც არის ხოლმე მიმართული. (ვისაც ნატალურ რუკაში ვენერა მშვილდოსანში გყავთ, ალბათ დაგვეთანხმებით, რომ უცხოელების ან განსხვავებული კულტურის ადამიანების მიმართ განსაკუთრებული ინტერესი გაქვთ ).
ფინანსები და ღირებულებები:
ამ პერიოდში ფულის ენერგია პირდაპირ კავშირშია თქვენს თვითშეფასებასთან. ვენერა მშვილდოსანში არ არის ხელმომჭირნე — ის ფულს სიამოვნებით ხარჯავს, განსაკუთრებით იმაში, რაც მას ზრდის (მოგზაურობა, განათლება) ან მის სტატუსს უსვამს ხაზს (ბრენდები, ფუფუნება).
დეკემბრის მთავარი გამოწვევები:
ვენერა მშვილდოსანში ყოფნისას სამ მნიშვნელოვან ასპექტს ქმნის, რაც თვის ერთგვარ ემოციურ ფონს განსაზღვრავს:
2 დეკემბერი: ამბიცია და ძალა (ვენერას სექსტილი პლუტონთან) ნიშანში შესვლისთანავე ვენერა იღებს პლუტონის მძლავრ ენერგიას.
• რას ნიშნავს: ჩვენი ფინანსური და პირადი სურვილები იღებს შანსს, მოიპოვოს გავლენიანი ძალების მხარდაჭერა.
• რჩევა: გახსოვდეთ, სექსტილი მხოლოდ შანსია და არა გარანტია. იმისათვის, რომ ეს ენერგია აამუშაოთ, საჭიროა გამოიჩინოთ ნებისყოფა, რისკი და პარტნიორობის უნარი. არ დაელოდოთ, იმოქმედეთ!
21 დეკემბერი: თვითშეფასების გამოცდა (ვენერას კვადრატი სატურნთან) მესამე დეკადის დასაწყისში ვეჯახებით შინაგან „კედელს“ და შეზღუდვებს.
• ფსიქოლოგიური ფონი: შესაძლოა ამოტივტივდეს ძველი კომპლექსები: „მე სიყვარულის ღირსი არ ვარ“, „ჯერ უნდა დავიმსახურო“. ეს არის ბავშვობის პროგრამის ექო, როცა გვასწავლიდნენ, რომ „კანფეტის მისაღებად კარგად მოქცევაა საჭირო“.
• გამოწვევა: უნდა ისწავლოთ საკუთარი თავის დაფასება არა მიღწევების, არამედ არსებობის გამო. ნუ ეცდებით სიყვარულის „ყიდვას“ ან „დამსახურებას“.
24 დეკემბერი: ილუზიების ტყვეობაში (ვენერას კვადრატი ნეპტუნთან) თვის ბოლოს დგება ილუზიების პიკი. რეალობა იბურება.
• პირადში: დიდია რისკი, შეგვიყვარდეს არა რეალური ადამიანი, არამედ ჩვენივე შექმნილი იდეალური ხატი (გალაკტიონს რომ დავესესხოთ, ეს არის: „მე შენში მიყვარს ოცნება ჩემი“).
•ფინანსური გაფრთხილება: ეს ასპექტი ააქტიურებს ე.წ. „მაგიურ აზროვნებას“. ჩვენ გვინდა გვჯეროდეს ზღაპრების, რასაც ხშირად იყენებენ თაღლითები და მანიპულატორები. იყავით სკეპტიკური ნებისმიერი „სწრაფად გამდიდრების“ სქემის მიმართ (ვენერა ფინანსებსაც მართავს)!
გამოიყენოთ ეს დრო ჰორიზონტების გასაფართოებლად, ოღონდ არ დაკარგოთ ფეხქვეშ სიმყარის განცდა!“, - წერს რამაზ გიგაური.
⭕ ასევე დაგაინტერესებთ:
⭕როგორი ამინდია მოსალოდნელი 30 ნოემბერს საქართველოში - პროგნოზი ქალაქების მიხედვით
⭕„კარგია დაიწყოთ გრძელვადიანი პროექტები“ - დღის მეტაფიზიკური პროგნოზი
