ასტროლოგი ხათუნა ნოელი სოციალურ ქსელში ყოველდღიურ ასტროლოგიურ პროგნოზს აქვეყნებს და საზოგადოებას რჩევებს უზიარებს.
ამჯერად იგი სოციალურ ქსელში ახალ ასტროპროგნოზს აქვეყნებს, რომელსაც უცვლელად გთავაზობთ:
„როდესაც ძველი კარი იხურება, ყოველთვის იხსნება ახალი - ანუ სიცოცხლე ციკლების გასაყარზე.
როგორც უკვე გითხარით, წინ სულ მალე სატურნი და ნეპტუნი შეერთება გველის ვერძის ზოდიაქოში. შეერთება საკმაოდ ხანგრძლივი იქნება და თითქმის 1 წელიწადს გასტანს.
რაც წინა ჯერზე არ მითქვამს, ეს არის, რომ ამ ზოდიაქოში ისინი ერთმანეთს 3 საუკუნეზე მეტია რაც აღარ შეხვედრიან. ბოლო მათი შეერთება ვერძის ნიშანში შორეულ 1703 წელს იყო!
აი, ასეთი ეპოქალური ციკლების გასაყარზე ვდგავართ.
თუმცა ისიც მინდა აქვე აღვნიშნო, რომ ამჟამინდელი შეერთება ვერძის პირველ გრადუსებზე ხდება, ხოლო მაშინ სატურნი ნეპტუნს მე12 გრადუსზე წამოეწია. ასტროლოგიაში ასეთ დეტალებსაც მნიშვნელობა აქვთ. 2025 წლის შემთხვევა ნამდვილად განსაკუთრებულია, რადგან ის პირველად ხდება ზოდიაქოს საწყის წერტილში, რაც მთლიანად ახალ ენერგეტიკულ პროგრამას გაააქტიურებს!
წინა ჯერზე უკვე აგიხსენით სატურნის და ნეპტუნის ასტროლოგიური სიმბოლიზმი. თუმცა არც სატურნს აბარია მხოლოდ კანონები და არც ნეპტუნს მარტო ნარკოტიკები და გინდაც ზოგადად მედიცინა.
ოდესღაც, ვიდრე ურანს, ნეპტუნს, პლუტონს და სხვა ჯუჯა პლანეტებს აღმოაჩენდნენ, სატურნი ჩვენი მზის სისტემის ბოლო პლანეტად ითვლებოდა. შეუიარაღებელი თვალით ცაზე „ბოლოდ“ ახლაც მხოლოდ სატურნი ჩანს. ასე დაიმკვიდრა მან საზღვრის განმსაზღვრელის რეპუტაცია. მიწის სტიქიის წარმომადგენელი ეს პლანეტა, თავადაც რგოლებით შემოსაზღვრული და გარკვეულწილად , თითქოს ჩარჩოებში მოქცეული, ყველაფერს შემოსაზღვრავს, ავიწროებს, მკაცრ კანონიზაციას უკეთებს და ამიწებს. და რადგან საზღვრები სატურნია, იგი ასევე აძლევს ფორმას ჩვენს ფიზიკურ სხეულსაც კი. გარედანაც( ჩვენს კანს და თმოვან საფარს სატურნი მართავს) და შიგნიდანაც - ძვლოვანი სისტემა, რასაც ვეყრდნობით, ანუ ჩვენი ჩონჩხი, ესეც სატურნია. ის არის სტრუქტურების, კანონების და მატერიალური სამყაროს მმართველი. მას არამხოლოდ საზღვრები, დრო და ფიზიკური რეალობაც აბარია!.
თუმცა ეს მხოლოდ მატერიას ეხება.
ხოლო სული, რომელიც როგორც ხვდებით, ფრიად არამატერიალურია, მის განკარგულებაში არაა.
არადა ადამიანის უსულო სხეული გინდ ყოფილა და გინდ არა. ასე არ არის?
მაშ რა განკარგავს სულს? და არ მხოლოდ ჩვენსას, არამედ ერთიანს, რომელზედაც დაწერილია - „მე ვარ ანი და ჰოე, დასაბამი და დასასრული''( იოანეს გამოცხადება, თავი1.) რომლის ნაწილებიც ვართ პრინციპში ჩვენ ყველა, და როცა ჩვენი ფიზიკური სხეული გაქრება, ჩვენი სულები ისევ იმ ერთიანში და მთავარში დაბრუნდებიან... ზოგს ალბათ აკაშის ქრონიკებზეც გსმენიათ, ერთიან საინფორმაციო ველზე, საიდანაც მოდის უკლებლივ ყველა ჩვენი აზრი და იდეა და რა სასაცილოა, საკუთარი აზრები რომ გვგონია :)) არადა- „მე არ ვწერ ლექსებს, ლექსი თვითონ მწერს“-ო, დიდებულმა ტიციანმა თქვა... იცოდა... აკაშა - უნივერსალური გონება - ღმერთის მეხსეიერების კართოტეკა.... ესეც ნეპტუნია, ხომ მიხვდით?
ის, რაც ყველას გვაერთიანებს ან უნდა გვაერთიანებდეს წესით მაინც - სიყვარული. არა, ეს სულაც არაა ვენერა. ის ხორციელია. ნეპტუნი კი უპირობო, სულისმიერი, ღვთაებრივი. თავგანწირული, როგორც თვითონ იესო. რომლის სიმბოლოც სწორედ თევზები იყო და არა ჯვარი, კაცმა რომ თქვას.) მაგრამ ეს საუბარი ისე შორს წაგვიყვანს, როგორ თავად ნეპტუნის სამფლობელოს, ოკეანის სიღრმეებია.
ამიტომ დავუბრუნდეთ ნეპტუნისა და სატურნის შეერთებას.და როგორც დაინახეთ ალბათ, ამ ორი პლანეტის არსი ერთმანეთის სრულიად საპირისპიროა. ერთი მატერიალიზმი, მეორე ეთერი. მაგრამ სწორედ ამ ორის, სულისა და ფიზიკური სხეულის გაერთიანება იძლევა სიცოცხლის შესაძლებლობას!
ახლა ვერძს მივუბრუნდეთ.
ის არის ზოდიაქოს წრის პირველი ნიშანი. საწყისთა საწყისი. ცეცხლის სტიქია, დაბადება, ახალი სიცოცხლის ნაპერწკალი. ვერძის 0 გრადუსზე მზე ახალ, ყოველწლიურ ციკლს იწყებს ხოლმე.
და რაო, სად ერთდებიან სული და სხეულიო? აი, ამ ვერძის 0 გრადუსზეო?
და ეს რას ნიშნავს?
ახალი, გასაოცარი ციკლის დასაწყისს, ჩემო მეგობრებო! რომელიც კიდევ 322 წელი იქნება ძალაში! ანუ 2348 წლამდე!
როგორ ფიქრობთ, რას მოიტანს ეს ციკლი?
მე მგონია, რომ ახალი ყაიდის ადამიანის „დაბადებას“. რა თქმა უნდა, ეს არ მოხდება უცებ და ერთ დღეში, ათეულობით წლები, შეიძლება კი სრულად 322 წელიც კი, დასჭირდეს ახალი ჰომოს „დაბადებას“.
ადამიანის ბიოლოგია, აგებულება, შეიძლება გარდაიქმნას, ამის დასაწყისს ჩვენ უკვე ვხედავთ როგორ ხდება, ტექნოლოგიების ინტეგრაცია სხეულთან. მაგრამ ასევე გარდაუვალი იქნება გენეტიკური ევოლუცია და ფსიქიკური შესაძლებლობების გაფართოებაც.
სულიერი და მატერიალური სინთეზი გახდება რეალობა — და მეცნიერება და მისტიკა ერთმანეთს კი აღარ შეეწინააღმდეგება, არამედ ერთობლივად იმუშავებს. გამოჩნდება ახალი თაობა.
სატურნისა და ნეპტუნის შეერთების შემდეგ დაბადებული ბავშვებს შეიძლება ჰქონდეთ აქამდე წარმოუდგენელი უნარები, ენერგეტიკულ სივრცეების აღქმა.
გაგიკვირდებათ რასაც ვიტყვი, მაგრამ სულიერი პრაქტიკები გახდება მედიცინის ან განათლების ნაწილი.
თუმცა იმასაც გეტყვით, რომ ახლა უაზროდ მომრავლებული თვითმარქვია „ეზოტერიკოსებიდან“ და „მაგებიდან“(რომლებიც რეალურად მხოლოდ მჩხიბავები არიან.) 99 % გაიცხრილება და დარჩებიან მხოლოდ ისინი, ვინც მართლა ფლობენ განსაკუთრებულ უნარებს.
ჩვენ კი გავაგრძელოთ:
სატურნი ვერძში (2025-2028) გამოიწვევს ძველი სტრუქტურების ნგრევას - პოლიტიკური ინსტიტუტები, ეკონომიკური მოდელები და თვით საზოგადოებრივი ნორმებიც კი გადაიხედება, შემდეგ კი შეიცვლება კიდეც,
პრიორიტეტული დარჩება მხოლოდ უნივერსალური ღირებულებები - ეკოლოგია, კოლექტიური ჯანმრთელობა და სულიერება.
კიდევ რაც ახლა წარმოუდგენლად ჟღერს, გადაიხედება ტრადიციული დეფინაციაც, თუ რა არის „ადამიანი“, ბიოჰაკინგის, AI-თან ინტეგრაციის ან კვანტური ფიზიკის გავლენით.
სამედიცინო თემატიკა ნანოტექნიკის და ბიორობოტიზაციის მიმართულებით განსაკუთრებით აქტუალური იქნება მინიმუმ მანამ, ვიდრე ნეპტუნი ვერძში იმოძრავებს, და ამაზე კიდევ ცალკე სტატიას გიმზადებთ. ( ხომ ხვდებით უკვე, რატომ იყო შეუძლებელი წლის დასაწყისში ერთ სტატიაში მომექცია ამხელა პროგნოსტკა?)
დიახ, ჩვენ შევიცვლებით. კაცობრიობა შეიცვლება. მაგრამ ნუ შეგეშინდებათ. კარლ იუნგის სიტყვების პერიფრაზი რომ გავაკეთოთ„ჩვენ უნდა გავხდეთ ის, რაც ყოველთვის ვიყავით, მაგრამ არასოდეს ვიცოდით“, - წერს ხათუნა ნოელი.
⭕ ასევე დაგაინტერესებთ:
⭕მიქაუტაძე „ჯვაროსნების“ მეორე ბომბარდირი 4 წელიწადში გახდა
