ორსულობის დროს, განსაკუთრებით მეორე და მესამე ტრიმესტრში, ტყის ხანძრის კვამლის ზემოქმედება ბავშვებში აუტიზმის გაზრდილ რისკთან ასოცირდება.
ახალი კვლევის თანახმად, ბავშვებს, რომელთა დედებიც ორსულობის დროს ხანძრის შედეგად გამოწვეულ წვრილ ნაწილაკებთან შეხებაში იმყოფებოდნენ, აუტიზმის დიაგნოზის დასმის უფრო მაღალი ალბათობა აქვთ.
ორსულობის დროს ჰაერში ხანძართან დაკავშირებული წვრილი ნაწილაკების საშუალო კონცენტრაციის ყოველი 0.75 მიკროგრამით კუბურ მეტრზე მატება აუტიზმის განვითარების რისკის დაახლოებით 30%-ით ზრდასთან იყო დაკავშირებული.
„ორსულობა ტვინის სწრაფი განვითარების პერიოდია, როდესაც გარემო ფაქტორების ზემოქმედებამ შეიძლება ხელი შეუშალოს მნიშვნელოვან ფორმირების პროცესებს“, - განაცხადა რატგერსის უნივერსიტეტის საზოგადოებრივი ჯანმრთელობის სკოლის ეპიდემიოლოგმა და კვლევის წამყვანმა ავტორმა, სტეფანია პაპატეოდორუმ.
აუტიზმი ასოცირდება რთულ ნეიროგანვითარების პროცესებთან, რომლებიც იწყება დაბადებამდე, როდესაც ტვინი სწრაფად ვითარდება და ნერვულ უჯრედებს შორის კავშირები ყალიბდება.
მან დასძინა, რომ დასკვნები ხაზს უსვამს ხანძრების მონიტორინგის მნიშვნელობას და მათ პოტენციურ გავლენას ჰაერის ხარისხზე ორსულობის დროს.
კვლევაში შეერთებულ შტატებში დაახლოებით 900 000 დედა-შვილის წყვილი მონაწილეობდა, რომელთა მდგომარეობასაც საშუალოდ 6.3 წლის განმავლობაში აკვირდებოდნენ.
ავტორებმა ხაზგასმით აღნიშნეს, რომ მათი ნაშრომი დაკვირვებითი ხასიათისა იყო და არ იძლევა ტყის ხანძრის კვამლის ზემოქმედებასა და აუტიზმის განვითარებას შორის მიზეზობრივი კავშირის დადგენის საშუალებას.
„ის გაგება, თუ როგორ შეიძლება პრენატალურმა გარემო ფაქტორებმა გენეტიკურ და სხვა ფაქტორებთან ერთად ხელი შეუწყოს აუტიზმს, კვლევის მნიშვნელოვან სფეროდ რჩება“, - თქვა პაპათეოდორუმ.
