ისტორიკოსი, ისტორიულ მეცნიერებათა დოქტორი, პროფესორი და ტელეწამყვანი გიორგი კალანდია 31 მარტს 50 წლის გახდა. კალანდიამ არა ერთი მილოცვა მიიღო, როგორც კოლეგებიდან ისე საყვარელი ადამიანებიდან. გადაცემაში „იმედის დღე“, სადაც იგი ერთ-ერთი თანაწამყვანია, იუბილარს სიურპრიზი მოუწყვეს და პირდაპირ ეთერში ტორტიც ჩააქრობინეს.
„ტრადიციული ფოტოთი ვულოცავ ჩემს საამაყო ძმას დაბადების დღეს! ბედნიერი იყავი და გვაბედნიერე შენი კარგად ყოფნით“,- წერს ნოე სულაბერიძე.
გიორგი კალანდიამ მილოცვა მიიღო კულტურის სამინისტროდანაც:
„საქართველოს კულტურის სამინისტრო ისტორიკოსს, ისტორიულ მეცნიერებათა დოქტორს, პროფესორ გიორგი კალანდიას 50 წლის იუბილეს ულოცავს.
გიორგი კალანდია 2019 წლიდან ერთ-ერთი გამორჩეული - საქართველოს ხელოვნების სასახლე - კულტურის ისტორიის მუზეუმის დირექტორია. მას დიდი წვლილი მიუძღვის ქართული კულტურისა და სამუზეუმო საქმიანობის განვითარებასა და უნიკალური ექსპონატებით მუზეუმის გამდიდრებაში. გიორგი კალანდია არის დადიანების სასახლეთა გადარჩენის ფონდის თავმჯდომარე, არაერთი წიგნის ავტორი და მრავალი სამეცნიერო ექსპედიციის მონაწილე და ხელმძღვანელი. მისი ხელმძღვანელობით განხორციელებულმა პროექტმა „ქსოვილი საქართველოდან“ სამეცნიერო კვლევების დარგში ევროპის კულტურული მემკვიდრეობის უმაღლესი ჯილდო „ევროპა ნოსტრა“ მიიღო.
გიორგი კალანდიას ავტორობით შეიქმნა და განხორციელდა არაერთი მნიშვნელოვანი პროექტი, მათ შორის - სატელევიზიო გადაცემა „ჩვენებურები“, რომლითაც თურქეთში, საზღვარს მიღმა დარჩენილი ქართული სოფლები, ქართული ფოლკლორი და ისტორიული ძეგლები გააცნო მაყურებელს.
კულტურის სამინისტრო გიორგი კალანდიას ჯანმრთელობას, დღეგრძელობასა და ნაყოფიერ სამეცნიერო საქმიანობას უსურვებს“, - აღნიშნულია უწყების მისალოც წერილში.
⭕ ასევე დაგაინტერესებთ:
🎥 „ბევრი მითქვამს და ბევრჯერ მინანია...“ - არსებობს თუ არა კეთილი ტყუილი? ქუჩის გამოკითხვა
🎥 „მასწავლებლის შვილი“, დამატებითი პასუხისმგებლობა თუ პრივილეგია? - ფსიქოლოგის რჩევები
