კენედების ცნობილი ოჯახი კიდევ ერთ დანაკარგს გლოვობს. აშშ-ის ყოფილი პრეზიდენტობის კანდიდატის, რობერტ ფ. კენედის შვილიშვილი, კაილ ფრენსის კენედი, 42 წლის ასაკში გარდაიცვალა.
როგორც ფრანგული გამოცემა Le Parisien წერს, კაილი 2026 წლის 21 სექტემბერს, მასაჩუსეტსის შტატის ქალაქ ვესტვუდში, საკუთარ სახლში გარდაიცვალა. მისი გარდაცვალების შესახებ ინფორმაცია ოჯახმა 20 ოქტომბერს გაავრცელა. გარდაცვალების მიზეზი ამ დროისთვის საჯაროდ ცნობილი არ არის.
კაილ კენედი მაიკლ კენედისა და ვიქტორია გიფორდ კენედის ქალიშვილი იყო. მისი მამა, მაიკლ კენედი, 1997 წელს, კოლორადოში, სათხილამურო უბედური შემთხვევის შედეგად დაიღუპა. კაილი რობერტ ფ. კენედისა და ეთელ კენედის 11 შვილიდან ერთ-ერთის ქალიშვილი და მათი 34 შვილიშვილიდან ერთ-ერთი იყო.
კაილმა განათლება ჯორჯთაუნის უნივერსიტეტში მიიღო, მოგვიანებით კი სწავლა პეისის უნივერსიტეტსა და ჰარვარდის განათლების სამაგისტრო სკოლაში განაგრძო. კარიერა განათლების სფეროს დაუკავშირა: მუშაობდა ნიუ-იორკის საჯარო სკოლებში, მოგვიანებით კი განათლების რეფორმის მიმართულებით საქმიანობდა და ცდილობდა, სოციალურად დაუცველი ბავშვებისთვის განათლების შესაძლებლობები გაეუმჯობესებინა.
2020 წელს კაილმა ზურგის ტვინის მძიმე დაზიანება მიიღო, რამაც ხანგრძლივი დამბლა და ჯანმრთელობის სხვა პრობლემები გამოიწვია. ამის შემდეგ ის შეზღუდული შესაძლებლობის მქონე ადამიანების უფლებების დაცვის მიმართულებითაც გააქტიურდა. მათ შორის, მასაჩუსეტსის შტატის საკანონმდებლო ორგანოში ჯანდაცვის სფეროში შეზღუდული შესაძლებლობის მქონე პირთა მიმართ დისკრიმინაციის საკითხზეც ისაუბრა.
კაილ კენედის ორი ვაჟი - კონორი და დეკლანი დარჩა. მისი ქალიშვილი, ჯოზეფინი, დაბადებიდან რამდენიმე დღეში გარდაიცვალა. ოჯახური ხარკის მიხედვით, კაილი შვილების ერთგული დედა იყო და ახლობლებს მისი იუმორის გრძნობა, გონიერება და შეუპოვრობა დაამახსოვრდათ.
რობერტ ფ. კენედი, კაილის ბაბუა, 1968 წელს, აშშ-ის პრეზიდენტობის კანდიდატად დემოკრატიული პარტიის ნომინაციისთვის ბრძოლის დროს, ლოს-ანჯელესში მოკლეს. კენედების ოჯახს წლების განმავლობაში არაერთი ტრაგედიის გადატანა მოუხდა.
ვინ არიან კენედები?
კენედების ოჯახის ისტორია ირლანდიიდან იწყება. ეს არის ირლანდიური წარმოშობის ამერიკული ოჯახი, რომელმაც აშშ-ის პოლიტიკაში, ბიზნესსა და საზოგადოებრივ ცხოვრებაში განსაკუთრებული გავლენა მოიპოვა.
ოჯახის ფესვები ირლანდიელ კათოლიკე ემიგრანტებს უკავშირდება, რომლებიც XIX საუკუნეში ამერიკაში გადავიდნენ. კენედების ისტორია განსაკუთრებით საინტერესოა იმით, რომ ირლანდიიდან ჩასული ემიგრანტების შთამომავლები მოგვიანებით ამერიკის ერთ-ერთ ყველაზე ცნობილ პოლიტიკურ დინასტიად იქცნენ.
პატრიკ კენედი 1823 წელს ირლანდიაში, უექსფორდის საგრაფოს სოფელ დუნგანსტაუნში დაიბადა. ირლანდიაში მძიმე ეკონომიკური მდგომარეობისა და შიმშილობის გამო, 1849 წელს აშშ-ში ემიგრირდა და ბოსტონში დასახლდა. იქ კასრების დამამზადებლად მუშაობდა. შემდეგ მისმა ვაჟმა, პატრიკ ჯოზეფ კენედიმ, ბოსტონის პოლიტიკაში მოიპოვა გავლენა. ის მასაჩუსეტსის საკანონმდებლო ორგანოს წევრი და მოგვიანებით შტატის სენატორი გახდა. სწორედ ამ თაობიდან დაიწყო ოჯახის პოლიტიკური აღზევება. ჯოზეფ პატრიკ კენედი უფროსმა ოჯახის გავლენა ბიზნესშიც გააფართოვა. ის ცნობილი ფინანსისტი და პოლიტიკურ წრეებთან დაახლოებული ფიგურა გახდა. 1914 წელს მან როუზ ფიცჯერალდზე იქორწინა, რითაც ორი გავლენიანი ირლანდიურ-ამერიკული ოჯახის კავშირი კიდევ უფრო გამყარდა. ჯოზეფისა და როუზის ვაჟი, ჯონ ფიცჯერალდ კენედი, 1960 წელს აშშ-ის პრეზიდენტად აირჩიეს. ის ქვეყნის პირველი კათოლიკე პრეზიდენტი გახდა და კენედების ოჯახი საერთაშორისო პოლიტიკის ერთ-ერთ ყველაზე ცნობილ დინასტიად აქცია.
საიდან გაჩნდა წყევლის შესახებ თქმულება?
კენედების ოჯახს მართლაც უკავშირდება ცნობილი ლეგენდა, რომელსაც „კენედების წყევლას“ უწოდებენ. ამ თქმულების თანახმად, ოჯახს თითქოს თაობიდან თაობამდე თან სდევს უბედურება, მკვლელობები, ავიაკატასტროფები, მოულოდნელი სიკვდილი და მძიმე პირადი ტრაგედიები.
ერთ-ერთი ყველაზე გავრცელებული ლეგენდის თანახმად, ოჯახის პატრიარქი, ჯოზეფ კენედი უფროსი, 1930-იან წლებში რაბინთან კონფლიქტში შევიდა. თქმულების ერთ-ერთი ვერსიით, ჯოზეფ კენედი უფროსი, მომავალი პრეზიდენტის, ჯონ კენედის მამა, აშშ-ში ბრუნდებოდა. იმავე გემზე იმყოფებოდა რაბინი ისრაელ იაკობსონი და მისი რამდენიმე მოწაფე, რომლებიც ნაცისტურ ევროპას გაურბოდნენ. ამავე ვერსიით, ებრაელი მგზავრები როშ ჰაშანას - ებრაულ ახალ წელს - გემბანზე ლოცულობდნენ. კენედის, რომელსაც იმ პერიოდში ბრიტანეთში აშშ-ის ელჩის თანამდებობა ეკავა, მათი ლოცვა თითქოს ხმაურად მიაჩნდა და კაპიტანს მათი გემბანიდან გაყვანა მოსთხოვა.
ამბის მიხედვით, რაბინი განრისხდა და კენედის ოჯახს, განსაკუთრებით მის მამრობით შთამომავლებს, უბედურება უწინასწარმეტყველა. მოგვიანებით, როდესაც კენედების ოჯახში მკვლელობები და სხვა ტრაგედიები მოხდა, ზოგიერთმა ადამიანმა ეს მოვლენები სავარაუდო წყევლას დაუკავშირა.
არსებობს მეორე ვერსიაც, რომელიც ამ ამბავს ჯოზეფ კენედის, როგორც ბრიტანეთში აშშ-ის ელჩის, საქმიანობას უკავშირებს და ამტკიცებს, რომ წყევლა ნაცისტებისგან ებრაელების გამოხსნაში მის სავარაუდო უმოქმედობას მოჰყვა. ამ ამბების დამადასტურებელი სანდო ისტორიული მტკიცებულება არ არსებობს, თუმცა ისინი ლეგენდის ნაწილად რჩება. მაგრამ ფაქტია, ოჯახს მას შემდეგ არ გამოჰლევია ტრაგედია და უბედურებები.
კენედების ოჯახი - ტრაგედიებისა და ტრიუმფის ისტორია, გზამკვლევი ცნობილი დინასტიის შესახებ
ჯონ ფიცჯერალდ კენედის 1963 წელს მკვლელობის შემდეგ, კენედების პოლიტიკური დინასტია არსებობას აგრძელებდა და წარმატებასთან ერთად სკანდალებსა და ტრაგედიებსაც განიცდიდა.
დღეს კენედების ოჯახი, რომელსაც ხშირად ამერიკის „სამეფო ოჯახსაც“ უწოდებენ, დეიდების, ბიძების, მეუღლეებისა და ბიძაშვილების ვრცელ ქსელს აერთიანებს. ოჯახი ათწლეულების განმავლობაში მნიშვნელოვან როლს ასრულებდა საზოგადოებრივ ცხოვრებაში, მხარს უჭერდა დემოკრატიულ იდეებსა და საჯარო სამსახურს.
თუმცა არაერთმა ტრაგედიამ და სკანდალმა გააჩინა რწმენა ე.წ. „კენედების წყევლის“ შესახებ - თითქოს უბედურება ოჯახის წევრებს გამუდმებით თან სდევს.
„ოჯახი ოჯახია. შეგიძლიათ კენედები სათითაოდ გაარჩიოთ, და დარწმუნებული ვარ, ამას გააკეთებთ კიდეც. მაგრამ, საბოლოოდ, ჩვენ უბრალოდ ადამიანები ვართ, რომლებიც ცდილობენ, ერთმანეთის გაგებას მიაღწიონ და ის განსაკუთრებული ცხოვრება გაიზიარონ, რომლითაც დაჯილდოებული ვართ“, - ამბობდა ჯონ ფ. კენედი უმცროსი.
ჯოზეფ კენედი უფროსი - 1888–1969 და როუზ ფიცჯერალდი - 1890–1995
ჯოზეფი და როუზი კენედების პოლიტიკური დინასტიის დამფუძნებელ ფიგურებად მიიჩნევიან. ისინი 1914 წელს ბოსტონში დაქორწინდნენ. ორივე გავლენიანი ირლანდიურ-კათოლიკური ოჯახიდან იყო.
მათ ცხრა შვილი შეეძინათ: ჯოზეფ უმცროსი, ჯონი, როზმარი, კეტლინი, იუნისი, პატრიცია, რობერტი, ჟანი და ედვარდი.
ჯოზეფ კენედი ამბიციური ბიზნესმენი, ინვესტორი, ჰოლივუდის პროდიუსერი, ქველმოქმედი და დემოკრატი პოლიტიკოსი იყო. მას ასევე არაერთი სასიყვარულო ურთიერთობა მიეწერებოდა.
როუზი შვილების აღზრდაში მკაცრი იყო. ის განსაკუთრებულ მნიშვნელობას ანიჭებდა საზოგადოებრივ პასუხისმგებლობას, კონკურენტუნარიანობას, წარმატებასა და დამოუკიდებლობას. მისი მიზანი იყო, შვილები ძლიერ და წარმატებულ ადამიანებად ჩამოყალიბებულიყვნენ.
ჯოზეფ კენედი უმცროსი - 1915–1944
ჯოზეფი ოჯახის უფროსი შვილი იყო. მამას სურდა, რომ ის აშშ-ის პირველი კათოლიკე პრეზიდენტი გამხდარიყო. ჰარვარდის უნივერსიტეტის დამთავრების შემდეგ ჯოზეფი საზღვაო ძალებში მსახურობდა და სამხედრო მფრინავი გახდა.
1944 წლის 12 აგვისტოს ის საიდუმლო სამხედრო ოპერაციის, „აფროდიტეს ოპერაციის“, დროს დაიღუპა. მისი სიკვდილი ოჯახისთვის უდიდესი დარტყმა იყო.
ჯოზეფის გარდაცვალების შემდეგ მის უმცროს ძმას, ჯონ კენედის, გააცნობიერებინა, რომ ოჯახის პოლიტიკური მომავლის პასუხისმგებლობა ახლა მას ეკისრებოდა.
ჯონ ფიცჯერალდ კენედი - 1917–1963
ჯონ კენედი აშშ-ის 35-ე პრეზიდენტი იყო. მეორე მსოფლიო ომის დროს ის სამხედრო სამსახურში მსახურობდა და 1943 წელს, როდესაც მისი საბრძოლო კატარღა იაპონელებმა ჩაძირეს, ეკიპაჟის წევრების გადარჩენაში მნიშვნელოვანი როლი შეასრულა.
1947 წელს კონგრესის წარმომადგენელთა პალატაში აირჩიეს, 1953 წელს კი სენატორი გახდა. იმავე წელს ჟაკლინ ბუვიეზე დაქორწინდა. წყვილს ოთხი შვილი შეეძინა, თუმცა მათგან ორი დაბადებიდან მალევე გარდაიცვალა.
1960 წელს კენედიმ რიჩარდ ნიქსონი დაამარცხა და აშშ-ის პრეზიდენტი გახდა. ის ქვეყნის ისტორიაში ერთ-ერთი ყველაზე ახალგაზრდა არჩეული პრეზიდენტი იყო.
მისი პრეზიდენტობა 1963 წლის 22 ნოემბერს დალასში მომხდარმა მკვლელობამ შეწყვიტა. კენედის მკვლელობამ არა მხოლოდ ამერიკის პოლიტიკა შეცვალა, არამედ ოჯახის ტრაგიკული ისტორიის ერთ-ერთ ყველაზე ცნობილ მოვლენად იქცა.
როზმარი კენედი - 1918–2005
როზმარი ჯოზეფისა და როუზის მესამე შვილი იყო. ბავშვობიდან განვითარების შეფერხება ჰქონდა. მოგვიანებით მშობლები შეშფოთდნენ მისი ქცევით და შიშობდნენ, რომ ის შეიძლება სხვების მხრიდან ექსპლუატაციის მსხვერპლი გამხდარიყო ან ოჯახისთვის არასასურველი ყურადღება მიეპყრო.
1941 წელს მამამისმა მიიღო გადაწყვეტილება, რომ როზმარისთვის ლობოტომია ჩაეტარებინათ — იმ დროისთვის გამოყენებული ნეიროქირურგიული პროცედურა, რომელიც ტვინის გარკვეულ უბნებს აზიანებდა. ოპერაცია კატასტროფული შედეგით დასრულდა და როზმარი მთელი დარჩენილი ცხოვრების განმავლობაში სხვების მუდმივ ზრუნვას საჭიროებდა.
მან ცხოვრების დიდი ნაწილი ვისკონსინის შტატში, სპეციალიზებულ დაწესებულებაში გაატარა. მისი ისტორია ოჯახის ერთ-ერთ ყველაზე მტკივნეულ ამბად დარჩა. მოგვიანებით მისმა და-ძმებმა შეზღუდული შესაძლებლობის მქონე ადამიანების მხარდასაჭერად არაერთი ინიციატივა განახორციელეს.
კეტლინ „კიკ“ კენედი - 1920–1948
კეტლინი, რომელსაც „კიკს“ ეძახდნენ, ენერგიული, სპორტული და იუმორის გრძნობით გამორჩეული ქალი იყო. მამის, ჯოზეფ კენედის, ლონდონში დიპლომატიური საქმიანობის პერიოდში ის საზოგადოებაში პოპულარული გახდა, მოგვიანებით კი ჟურნალისტად მუშაობდა.
მეორე მსოფლიო ომის დროს ლონდონში წითელ ჯვარს ეხმარებოდა. 1944 წელს პროტესტანტ უილიამ კავენდიშზე დაქორწინდა, რასაც მშობლები არ მიესალმებოდნენ.
ქორწინებიდან ოთხი თვის შემდეგ მისი მეუღლე საბრძოლო მოქმედებების დროს დაიღუპა. ოთხი წლის შემდეგ, 1948 წლის 13 მაისს, კეტლინიც ავიაკატასტროფას ემსხვერპლა საფრანგეთში, როდესაც საყვარელ მამაკაცთან, პიტერ უენტვორთ-ფიცვილიმთან ერთად მგზავრობდა.
მამისთვის ეს განსაკუთრებით მძიმე დარტყმა იყო. სტატიის თანახმად, ჯოზეფ კენედი ერთადერთი ოჯახის წევრი აღმოჩნდა, რომელიც ინგლისში კეტლინის დაკრძალვას დაესწრო.
იუნის კენედი შრაივერი - 1921–2009
როზმარის მდგომარეობამ იუნისზე დიდი გავლენა მოახდინა. 1968 წელს მან სპეციალური ოლიმპიური თამაშები დააარსა - ორგანიზაცია, რომელიც ინტელექტუალური შეზღუდვის მქონე ადამიანებს სპორტში მონაწილეობის შესაძლებლობას აძლევს.
მისი საქმიანობა შეზღუდული შესაძლებლობის მქონე ადამიანების მხარდაჭერის მიმართულებით მნიშვნელოვანი ნაბიჯი გახდა. 1984 წელს იუნისი თავისუფლების საპრეზიდენტო მედლით დააჯილდოვეს.
მას კარგად ესმოდა, რა ფასი ჰქონდა ოჯახის ძალაუფლებასა და ცნობადობას. მისი აზრით, ოჯახისთვის წყევლად ქცეული შესაძლოა თავად ტრაგედიები კი არა, ის გარემოება ყოფილიყო, რომ მათ პირად ცხოვრებაში მომხდარ უბედურებებს კონფიდენციალურად ვერ უმკლავდებოდნენ.
პატრიცია კენედი ლოუფორდი - 1924–2006
პატრიცია გასართობ ინდუსტრიაში მუშაობდა და ბრიტანელ მსახიობ პიტერ ლოუფორდზე დაქორწინდა. წყვილს ოთხი შვილი ჰყავდა.
პატრიცია ჰოლივუდის გავლენიან წრეებთან ოჯახის ერთგვარ დამაკავშირებელ რგოლად იქცა და ძმების პოლიტიკურ კამპანიებს მხარს აქტიურად უჭერდა.
1966 წელს განქორწინების შემდეგ მან ხელოვნებისა და საქველმოქმედო საქმიანობის მხარდაჭერა გააგრძელა.
რობერტ ფ. კენედი - 1925–1968
რობერტი ჯოზეფისა და როუზის მეშვიდე შვილი იყო. ის იურისტი გახდა და ძმის, ჯონ კენედის, პოლიტიკური კამპანიების ორგანიზებაში მნიშვნელოვანი როლი შეასრულა. ჯონის პრეზიდენტობის პერიოდში კი აშშ-ის გენერალური პროკურორის თანამდებობას იკავებდა.
რობერტი სამოქალაქო უფლებებისა და ვიეტნამის ომის წინააღმდეგ მოძრაობის მხარდამჭერი იყო. 1968 წელს დემოკრატიული პარტიის საპრეზიდენტო ნომინაციისთვის ბრძოლაში ჩაერთო.
იმავე წლის 5 ივნისს, კალიფორნიის პრაიმერის არჩევნებში გამარჯვების აღნიშვნისას, ლოს-ანჯელესის სასტუმრო „ამბასადორში“ მას ესროლეს. რობერტი მიყენებული ჭრილობების შედეგად გარდაიცვალა.
მისი მკვლელობა, ძმის მკვლელობიდან მხოლოდ ხუთი წლის შემდეგ, კენედების ოჯახის ტრაგედიების ერთ-ერთ ყველაზე მნიშვნელოვან მოვლენად იქცა.
ჟან კენედი სმიტი - 1928–2020
ჟანი ჯოზეფისა და როუზის შვილებს შორის ყველაზე მორიდებულად და პირადი ცხოვრების დამცველად მიიჩნეოდა. ის აქტიურად მონაწილეობდა ძმების პოლიტიკურ კამპანიებში და საზოგადოებრივ საქმიანობაში.
1993–1998 წლებში ირლანდიაში აშშ-ის ელჩი იყო. ასევე დააარსა ორგანიზაცია, რომელიც შეზღუდული შესაძლებლობის მქონე ადამიანებს საზოგადოებრივ ცხოვრებაში ჩართვაში ეხმარებოდა.
ეთელ კენედი - 1928–2024
ეთელ სკაკელი 1950 წელს რობერტ კენედიზე დაქორწინდა. მათ 11 შვილი შეეძინათ.
1968 წელს, როდესაც რობერტი მოკლეს, ეთელი მასთან ერთად იყო და ამ დროს ორსულად გახლდათ. მოგვიანებით ოჯახს კიდევ რამდენიმე მძიმე დანაკარგი დაატყდა თავს: მისი ვაჟი დევიდი 1984 წელს ნარკოტიკების ზედოზირებით გარდაიცვალა, ხოლო მაიკლი 1997 წელს სათხილამურო შემთხვევის შედეგად დაიღუპა.
მიუხედავად პირადი ტრაგედიებისა, ეთელი მთელი ცხოვრების განმავლობაში საზოგადოებრივ და საქველმოქმედო საქმიანობაში მონაწილეობდა.
ჟაკლინ კენედი ონასისი - 1929–1994
ჟაკლინ ბუვიე ჯონ კენედის 1953 წელს გაჰყვა ცოლად. ის აშშ-ის ერთ-ერთი ყველაზე ცნობილი პირველი ლედი გახდა და თეთრი სახლის ისტორიული მემკვიდრეობის დაცვასა და კულტურულ პროგრამებს განსაკუთრებულ ყურადღებას უთმობდა.
1963 წელს მეუღლის მკვლელობას საკუთარი თვალით შეესწრო, რადგან პრეზიდენტის გვერდით იჯდა ღია ავტომობილში.
რობერტ კენედის მკვლელობის შემდეგ ჟაკლინს შვილების უსაფრთხოება აშფოთებდა. მოგვიანებით ის ბერძენ გემთმფლობელ არისტოტელე ონასისზე დაქორწინდა და „ჯეკი ო“-ს სახელით გახდა ცნობილი.
ედვარდ „ტედ“ კენედი - 1932–2009
ტედი ჯოზეფისა და როუზის უმცროსი ვაჟი იყო. ძმების მკვლელობის შემდეგ ოჯახის პოლიტიკური მემკვიდრეობის ერთ-ერთ მთავარ წარმომადგენლად იქცა და სენატში 47 წელი იმსახურა.
თუმცა 1969 წელს მომხდარმა ავტოკატასტროფამ მის საპრეზიდენტო ამბიციებს სერიოზული დარტყმა მიაყენა. ჩაპაკვიდიკის კუნძულზე ტედი მანქანით წყალში გადავარდა. მასთან ერთად მგზავრობდა ახალგაზრდა თანამშრომელი მერი ჯო კოპეჩნე, რომელიც დაიღუპა.
ტედმა მომხდარის შესახებ პოლიციას მაშინვე არ შეატყობინა. ამ შემთხვევამ მის პოლიტიკურ რეპუტაციაზე ხანგრძლივი გავლენა მოახდინა.
რობერტ ფ. კენედი უმცროსი - დაიბადა 1954 წელს
რობერტ უმცროსი რობერტ და ეთელ კენედების მესამე შვილია. მან ჰარვარდის უნივერსიტეტი და ვირჯინიის უნივერსიტეტის სამართლის სკოლა დაამთავრა.
წლების განმავლობაში გარემოსდაცვით საქმიანობაში მონაწილეობდა, თუმცა მოგვიანებით ცნობილი გახდა ვაქცინებთან დაკავშირებული მცდარი მტკიცებებისა და შეთქმულების თეორიების გავრცელებით. 2024 წელს აშშ-ის პრეზიდენტობისთვის დამოუკიდებლად იყრიდა კენჭს, შემდეგ კი დონალდ ტრამპს დაუჭირა მხარი.
მისმა შეხედულებებმა ოჯახის წევრებს შორის უთანხმოებაც გამოიწვია.
მარია შრაივერი - დაიბადა 1955 წელს
იუნის კენედი შრაივერის ქალიშვილი მარია შრაივერი ცნობილი ჟურნალისტი და ავტორია. ის მსახიობ არნოლდ შვარცენეგერზე 1986 წელს დაქორწინდა. მათ ოთხი შვილი ჰყავთ.
მარია საზოგადოებრივ და საქველმოქმედო საქმიანობასაც ეწევა, მათ შორის მონაწილეობს დედის მიერ დაარსებული სპეციალური ოლიმპიური თამაშების მხარდაჭერაში.
კეროლაინ კენედი - დაიბადა 1957 წელს
კეროლაინი ჯონ და ჟაკლინ კენედების ერთადერთი ცოცხლად დარჩენილი შვილია. ის მხოლოდ ხუთი წლის იყო, როდესაც მამა მოკლეს.
კეროლაინმა განათლება ჰარვარდსა და კოლუმბიის სამართლის სკოლაში მიიღო. მუშაობდა იურისტად, ავტორად, დიპლომატად და ქველმოქმედად. იაპონიაში აშშ-ის ელჩი იყო 2013–2017 წლებში, ავსტრალიაში კი — 2022–2024 წლებში.
ჯონ ფ. კენედი უმცროსი - 1960–1999
ჯონ კენედი უმცროსი მხოლოდ სამი წლის იყო, როდესაც მამა მოკლეს. პრეზიდენტის დაკრძალვის დროს მამის კუბოსთან მისი სალუტით დამშვიდობების კადრები ამერიკის ისტორიის ერთ-ერთ ყველაზე დასამახსოვრებელ ფოტოდ იქცა.
ის მოგვიანებით იურისტი გახდა და პოლიტიკურ ჟურნალ George-ს დააარსა. 1996 წელს კეროლაინ ბესეტზე დაქორწინდა.
1999 წლის 16 ივლისს ჯონმა თვითმფრინავი, რომლითაც მეუღლესა და მის დასთან ერთად მგზავრობდა, ატლანტის ოკეანეში ჩამოაგდო. სამივე დაიღუპა.
მისი სიკვდილი კიდევ ერთი ტრაგედია იყო, რომელმაც „კენედების წყევლის“ შესახებ წარმოდგენა გააძლიერა.
ჯეკ შლოსბერგი - დაიბადა 1993 წელს
ჯეკი კეროლაინ კენედისა და ედვინ შლოსბერგის ერთადერთი ვაჟია. მან იელის, ჰარვარდის სამართლისა და ბიზნესის სკოლები დაამთავრა. მუშაობს მწერლად და პოლიტიკურ კომენტატორად, აქტიურია სოციალურ მედიაში და კენედების ოჯახის ახალი თაობის ერთ-ერთ წარმომადგენლად მიიჩნევა.
პატრიკ შვარცენეგერი - დაიბადა 1993 წელს
მარია შრაივერისა და არნოლდ შვარცენეგერის ვაჟი მსახიობია. ის ფილმებსა და სატელევიზიო პროექტებში მონაწილეობს და ცდილობს, საკუთარი კარიერა ცნობილი მშობლებისგან დამოუკიდებლად განავითაროს.
