ჰოლივუდის ვარსკვლავის, სელმა ჰაიეკისა და ფრანგი მილიარდერის, ფრანსუა-ანრი პინოს ქალიშვილი, ვალენტინა პინო, საზოგადოების ყურადღების ცენტრში მოექცა. 19 წლის გოგონა ბრიტანული ჟურნალის, Tatler-ის, ყველაზე სასურველი მარტოხელების ყოველწლიური რეიტინგის, Little Black Book-ის სათავეშია.
ვალენტინა პირველ ადგილს რაგბის ვარსკვლავ ჰენრი პოლოკთან ერთად იყოფს. რეიტინგი 200 ადამიანს აერთიანებს და ბრიტანეთში ყველაზე სასურველ სასიძოებსა და სარძლოებს წარმოაჩენს.
ვალენტინა ბავშვობიდან ხშირად ჩნდებოდა წითელ ხალიჩაზე და პაპარაცების ყურადღების ცენტრში იყო. მისი პირველი მნიშვნელოვანი საჯარო გამოჩენაც მშობლებთან ერთად შედგა. 2014 წელს, ჯერ კიდევ ბავშვი, მამასთან ერთად კანის კინოფესტივალზე გამოჩნდა.
მოდის სამყაროთი გატაცებული მემკვიდრე
ჟურნალმა Tatler-მა ვალენტინა მოდის სამყაროს ერთ-ერთ გამორჩეულ ახალგაზრდა წარმომადგენლად წარმოაჩინა. გოგონა მოდით ჯერ კიდევ ბავშვობაში დაინტერესდა და პირველი ჩვენება 11 წლის ასაკში, Gucci-ს ან Bottega Veneta-ს ჩვენებაზე დაესწრო.
მოდისადმი ინტერესი გასაკვირი არ არის, მისი მამა, ფრანსუა-ანრი პინო, ფუფუნების ბრენდების ჯგუფ Kering-ის ხელმძღვანელია. ჯგუფში შედის ისეთი ცნობილი მოდის სახლები, როგორებიცაა Balenciaga, Saint Laurent, Bottega Veneta და Boucheron. დედამისი კი ჰოლივუდის მსახიობი სალმა ჰაიეკია.
2022 წელს ვალენტინა დედასთან ერთად Vogue Mexico-ს გარეკანზეც გამოჩნდა. მაშინ ჰაიეკმა აღნიშნა, რომ ქალიშვილი ბავშვობიდანვე თავად ირჩევდა, რა ჩაეცვა და დედას მისთვის ტანსაცმლის შერჩევის საშუალებას არ აძლევდა.
მილიარდერების ოჯახის შვილი, რომელიც ჩვეულებრივ ცხოვრებას ამჯობინებს
2023 წელს ვალენტინა მსოფლიოს უმდიდრესი ბავშვების რეიტინგშიც მოხვდა. იმ პერიოდში მისი ქონება დაახლოებით 1,8 მილიარდ ევროდ იყო შეფასებული.
მიუხედავად მდიდარი ოჯახის წევრობისა და ცნობილი მშობლებისა, Tatler-ის შეფასებით, ვალენტინა საკმაოდ თავმდაბალი და მიწასთან ახლოს მდგომი ახალგაზრდაა. ლონდონში ცხოვრებისას ის უპირატესობას ქალაქის პაბებს, ალტერნატიულ კულტურულ სივრცეებსა და მუსიკალურ ფესტივალებს ანიჭებს და არა მხოლოდ მდიდრებისთვის განკუთვნილ დახურულ კლუბებს.
ვალენტინას სოციალურ პასუხისმგებლობაზეც უსაუბრია. Vogue Mexico-სთან ინტერვიუში მან აღნიშნა, რომ სწავლის პარალელურად უსახლკარო ადამიანებისთვის განკუთვნილ უფასო სასადილოში მოხალისედ მუშაობდა. მისი თქმით, მნიშვნელოვანია, ადამიანებს მოუსმინო და მათი ისტორიები გაიგო, ნაცვლად იმისა, რომ ქუჩაში მცხოვრები ადამიანები უყურადღებოდ დატოვო.
19 წლის ვალენტინა პინო ცნობილი ოჯახის მემკვიდრეა, თუმცა ცდილობს, საკუთარი ინტერესები და ცხოვრების წესი ჩამოაყალიბოს. ახლა კი მისმა სახელმა ბრიტანული ჟურნალის ერთ-ერთი ყველაზე განხილვადი რეიტინგის სათავეში გადაინაცვლა.
