ექიმი ანი ქავთარაძე სოციალურ ქსელში წერს, რომ ფასანაურში, ასევე გარშემო სოფლებში ადამიანებმა არ იციან, რომ ვაქცინაციის სერვისი ხელმისაწვდომია. მისივე თქმით, მოსახლეობას არ აქვს ინფორმაცია არც ვაქცინების რაობის და არც მისი სარგებლის ინფორმაციებზე.
მისი თქმით, მან დასახმარებლად დაავადებათა კონტროლის ეროვნული ცენტრის ხელმძღვანელს ამირან გამყრელიძეს მიმართა, რომლის დახმარებითაც რეგიონში პირველი ვაქცინაცია 3 სექტემბერს ჩატარდა.
როგორც ექიმი სოციალურ ქსელში წერს, მან NCDC-ს რაიონულ ცენტრს ინტელექტუალური და ფიზიკური რესურსების დასახმარებლად მიმართა, თუმცა მათგან რეაგირება ვერ მიიღო.
ქავთარაძის თქმით, იმის ნაცვლად რომ, ამ რეგიონის მუნიციპალიტეტის თანამშრომლები, NCDC და ადმინისტრაციული რესურსის აბსოლუტური უმრავლესობა თავდაყირა იდგნენ, სახეზე გვაქვს მხოლოდ გადალურჯებული ხეობა, რადგან წინასაარჩევნო მილიონი პლაკატისთვის ფული არსებობს, იმისთვის, რომ ხალხს რუპორით მაინც აცნობონ, რომ ვაქცინა ხელმისაწვდომია მათთან ახლოს – არა.
ანი ქავთარაძემ ვაქცინაციის ხელმისაწვდომობის შესახებ მოსახლეობის ინფორმირებისთვის ბანერები თავად დაბეჭდა და მიმდებარე ტერიტორიაზე გააკრა.
„ამბავი ასეა, ბევრმა იცის, ჩემი ფასანაურთან კავშირის, ამ მთების სიყვარულის და ჩემი ურთიერთობის ამბავი. ეს დაბა დიდი, რაიონული ცენტრია და შესაბამისად, 2 ხეობის, არაერთი სოფლის წარმომადგენელი ხვდება აქ.
ვაქცინაცია დაიწყო, მაგრამ დუშეთიდან ყაზბეგამდე, არცერთი ვაქცინაციის პუნქტი არ არსებობდა.
სწორედ ამიტომ, გადავწყვიტე მემოქმედა. 25 აგვისტოს მივწერე ბატონ ამირან გამყრელიძეს, მყისიერად მივიღე პასუხი(რისთვისაც კიდევ ერთხელ ვუხდი მადლობას), კომუნიკაცია შედგა და უკვე 3 სექტემბერს ჩატარდა პირველი ვაქცინაცია, სინოვაკით (სხვა ვაქცინები სოფლის ამბულატორიებს არ გადაეცემა, რაც მიმაჩნია, რომ ასევე პრობლემაა). მაგრამ როგორც მეცნიერებმა გვითხრეს: უნდა ავიცრათ იმ ვაქცინებით, რომლებიც ხელმისაწვდომია.
მიუხედავად იმისა, რომ რაიონულ ncdc-ის შევთავაზე ინტელექტუალური და ფიზიკური რესურსის დახმარება, მათ შორის საინფორმაციო შევხდრების, პლაკატების და ბუკლეტების ბეჭდვის, კარდაკარ პრინციპის და ა. შ., რეაგირება ვერ მივიღე.
აღმოვაჩინე, რომ ფასანაურშიც კი, არა თუ გარშემო სოფლებში, ადამიანებმა უბრალოდ არც იციან, რომ მსგავსი სერვისი ხელმისაწვდომია. აღარ მაქვს საუბარი, ვაქცინების რაობის, სარგებლის და ა. შ. ინფორმაციაზე.
იმის ნაცვლად რომ, თავდაყირა იდგნენ ახლა, ამ რეგიონის მუნიციპალიტეტის თანამშრომლები, ncdc და ადმინისტრაციული რესურსის აბსოლუტური უმრავლესობა, სახეზე გვაქვს მხოლოდ გადალურჯებული ხეობა. წინასაარჩევნო მილიონი პლაკატისთვის ფული არსებობს, იმისთვის, რომ ხალხს რუპოროთ მაინც აცნობენ, რომ ვაქცინა ხელმისაწვდომია, მათთან ახლოს-არა.
დრო რომ არ დამეკარგა სტამბის ლოდინში, მარტივად, დავბეჭდე თაბახის ფურცლებზე, სად და რომელ საათებში ტარდება ვაქცინაცია და რას ემსახურება ის. (-ამისთვის გამოვიყენე ჩვენი, საქართველოში და მის საზღვრებს გარეთ მცხოვრები მეცნიერების და ექიმების მიმართვა).
2 დღეა ვაკრავ და ვაკრავ, ასევე ვესტუმრე ზემოაღნიშნულ ამბულატორიას, როგორც მითხრეს, 3 სექტემბრის შემდგომ დღეს მე-9 სამუშაო დღეა (კვირაში 3 დღე ეთმობა ვაქცინაციას) და ვაქცინირებულია მხოლოდ 18 ადამიანი, აბსოლუტური უმრავლესობა 60-ს გადაცილებულია, რაც მახარებს. ალბათ მათთვის მაინც ღირდა ამ პუნქტის გახსნა, მაგრამ ფაქტია, ინფორმაციულ ვაკუუმშია ხალხი, რომელშიც არაჩვეულებრივად მუშაობენ ანტივაქსერული მედია გამოცემები და მათი მიმდევრები, ეკლესიის ზოგიერთ, „ბრძენ“ წარმომადგენელთან ერთად.
მოკლედ, იმედი მაქვს, გავაორმაგებთ მაინც ციფრებს….
ან მოვა გონს დევნილთა, შრომის, ჯანმრთელობისა და სოციალური დაცვის სამინისტრო, დაეხმარება გადაწყვეტილების მიღებაში, ასევე National Center for Disease Control & Public Health, Georgia (NCDC & PH) და გააქტიურებენ მობილურ ჯგუფებს, ივლიან კარ და კარ და აცრიან, განსაკუთრებით მოწყვლად ჯგუფებს მაინც.
პ. ს. ბოლო ფოტოზე ასაკოვანი ქალბატონია, გუდამაყრის ხეობიდან, საოცრად ინტელიგენტი. დაინახა, რომ რაღაცას ვაკრავდი, უკვე ბნელოდა ,გამომკითხა და იმდენი არგუმენტი მითხრა პროვაქსერული, გამიკვირდა. აი, ახლაც მოვდიოდი, გზაში მეზობელი შემხვდა და ისპანკიდან დაწყებული ყვავილით დასრულებული ყველაფერზე ვესაუბრე, თან დღეს, აქვე კაცი დაკრძალეს კოვიდით გარდაცვლილი, იმედია დავარწმუნებო.
მეც, არ ვკარგავ იმედს, თუ კი ყველა ერთად მოვინდომებთ, შევქმნით პოპულაციურ იმუნიტეტს, ვაქცინაციის და არა ბუნებრივი გადარჩევის ხარჯზე, შესაბამისად, მე-5 ტალღას უფრო მომზადებულები დავხვდებით“, – წერს ანი ქავთარაძე სოციალურ ქსელში.
აგრეთვე წაიკითხეთ:
🔵 „ვაქცინების გაფუჭებას, ხომ არ აჯობებდა, ბუსტერი დაგვეშვა ყველა მსურველისთვის“ - ნანა გეგეჭკორი
