ქართველმა ჯარისკაცმა, რომელიც უკრაინაში იმყოფება, დაადასტურა ინფორმაცია, რომ რუსეთის 7 თვითმფრინავი და 6 ვერტმფრენი განადგურებულია. ამის შესახებ ვანო ნადირაძემ „ტვ პირველის“ ეთერში ისაუბრა.
„ბორისპოლი არ დაბომბილა, უბრალოდ ჩვენი ჰაერსაწინააღმდეგო სისტემები ამოქმედდა, უცხო უპილოტო საფრენი აპარატების წინააღმდეგ.
რუსი სამხედროები უკრაინას სოფელი ვადინოედან უტევენ, რომელიც მარიოპოლიდან 4 კილომეტრის დაშორებით მდებარეობს.
ბელარუსის საზღვართან შეტაკება დილის 5 საათზე მოხდა.
სხვადასხვა ლოკალური შეტევების მიუხედავად, ჩვენ საკმაოდ ძლიერი ბრიგადები გვიყენია ადგილზე და საკმაოდ დიდ წინააღმდეგობას ვუწევთ მათ.
მათი ჯავშანტექნიკა, ასევე ავტომანქანები, განადგურებულია. საკმაოდ დიდი ზიანი მივაყენეთ იმ მონაკვეთზე, სადაც მე ვიმყოფები და მაქვს ამის შესახებ ინფორმაცია.
რუსეთმა სტრატეგიული ობიექტების დაბომბვა შუაღამისას დაიწყო“, - განაცხადა ვანო ნადირაძემ, ქართველმა სამხედრომ უკრაინაში.
შეგახსენებთ, რომ 24 თებერვალს რუსეთმა უკრაინაზე ფართომასშტაბიანი სამხედრო აგრესია განახორციელა. თავდასხმას წინ უძღოდა რუსეთის პრეზიდენტის ვლადიმერ პუტინის სატელევიზიო მიმართვა. დილის 5:00 საათზე, რუსეთის ფედერაციის შეიარაღებულმა ძალებმა დაიწყეს უკრაინის შეიარაღებული ძალების ქვედანაყოფების ინტენსიური დაბომბვა უკრაინის აღმოსავლეთით. პარალელურად, რუსეთმა სახელმწიფო საზღვრის გასწვრივ უკრაინის ტერიტორიისა და დასახლებების დაბომბვა დაიწყო.
