„ვინც დღეს „შერიგებასა“ და „ერის გამთლიანებაზე“ საუბრობთ, კარგად განმარტეთ რას გულისხმობთ ამ ტერმინში“, - ამის შესახებ „ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე სოციალურ ქსელში წერს.
მისი თქმით, საქართველო, ისევე როგორც ცივილიზებული და დემოკრატიული მსოფლიო, არ შეურიგდება, არ გამთლიანდება ბოლშევიზმთან, ფაშიზმთან და ნაციზმთან:
„სიტყვა შერიგების პარალელურად ჩნდება ტერმინი „საზოგადოების გამთლიანება“, რაც თავისთავად სასიამოვნო ჟღერადობისა და სასარგებლო შინაარსის მატარებელია თუ საზოგადოება ორ ან მეტ ნაწილადაა გახლეჩილი.
ჩვენს შემთხვევაში საზოგადოების გახლეჩასთან კი არ გვაქვს საქმე, არამედ საზოგადოების ბრძოლასთან ბოროტების წინააღმდეგ, რომელმაც 9 წლიანი მმართველობის პერიოდში დაკარგა და გაასხვისა ტერიტორიების 20%“, - ამის შესახებ „ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე სოციალურ ქსელში წერს.
„საზოგადოების დაშინებისა და დატერორების მიზნით, ქუჩებში ჩახოცა 170-ზე მეტი ახალგაზრდა, ციხეებში დაამყარა სისტემური წამებისა და არაადამიანური მოპყრობის მართვის ფორმა, დახვრიტა მიტინგები და გვამები შემოყარა სახურავებზე, დახურა ან დაიმორჩილა თავისუფალი ტელევიზიები და მასობრივი საინფორმაციო საშუალებები, რეჟიმმა ნორმად აქცია მასობრივი თვალთვალი და მიყურადება, ბოლშევიკური მეთოდებით გააკულაკა ათი ათასობით ქართული ოჯახები, რომლებიც დღემდე დაეძებენ სამართალს და თხოულობენ წართმეულის დაბრუნებას.
ჯიბეში ჩაისვა სასამართლოები, სადაც გამამართლებელი განაჩენი ათჯერ უფრო ნაკლები იყო, ვიდრე სტალინურ-ბოლშევიკური მმართველობის დროს. რეჟიმი მტკიცებულებების გარეშე, იჭერდა, აპატიმრებდა და აწამებდა ყოფილი ხელისუფლების მაღალჩინოსნებს. საქართველო იყო პირველ ადგილზე პატიმართა რაოდენობითა და სიკვდილიანობით.
პირველად საქართველოში ჩამოყალიბდა ისეთი ელიტარული კორუფცია, რომელიც კანონის მიღმა ხსნიდა და ხურავდა არაოფიციალურ ანგარიშებს, სადაც საპროცესო შეთანხმებისა და სხვაგვარი გარიგების გზით თავისუფლების სანაცვლოდ, ხალხს არიცხვინებდნენ დიდძალი ოდენობით თანხებს.
მოსახლეობის უპრეცედენტო რაოდენობა განსაკუთრებით ღამის 3 და 4 საათზე იღვიძებდა, გარბოდა ნოტარიუსში და საკუთარ ქონებას ჩუქნიდნენ სახელმწიფოსა თუ ხელისუფლებისათვის სასურველ პირებს. ეს იყო რეჟიმი, რომელიც ქართულმა საზოგადოებამ, დიდი ძალისხმევისა და მსხვერპლის ფასად, არჩევნების გზით ჩამოაშორა ხელისუფლებას და გაისტუმრა პოლიტიკურ სანაგვეზე.
ვინც დღეს „შერიგებასა“ და „ერის გამთლიანებაზე“ საუბრობთ, კარგად განმარტეთ რას გულუსხმობთ ამ ტერმინში.
საქართველო, ისევე როგორც ცივილიზებული და დემოკრატიული მსოფლიო, არ შეურიგდება, არ გამთლიანდება ბოლშევიზმთან, ფაშიზმთან და ნაციზმთან. ეს რეჟიმები ისტორიას ჩაბარდა და მის კუთვნილებად იქცა“, - წერს ნანა კაკაბაძე.
