ექიმი ნანა გეგეჭკორი აცხადებს, რომ კორონავირუსის მუტაცია გაგრძელდება და ვირუსი უფრო დახვეწილად შეეცდება დაუძვრეს ვაქცინას და მკურნალობის მეთოდებს. გეგეჭკორი მოქალაქეებს გონიერების გამოჩენასა და ვაქცინის გაკეთებას ურჩევს.
„კორონავირუსის მუტაციის უნარი სიურპრიზი არავისთვის იყო. ვირუსები სამყაროს ცოცხალი ნაწილს შეადგენენ და ისევე როგორც ჩვენ, მათაც აქვთ უნარი მოიფიქრონ თავდაცვის მექანიზმები, საფრთხეების შესაბამისად.
არც ის იქნება გასაკვირი რომ მუტაცია გაგრძელდება და კორონავირუსი უფრო დახვეწილად შეეცდება დაუძვრეს ვაქცინას და მკურნალობის მეთოდებს.
გამოსავალი? - უსწრაფესი ვაქცინაცია პრევენციის წესებთან კომბინაციაში.
ამით რას მივაღწევთ? - დრამატულად მოკლედ დროში შევამცირებთ ვირუსის გავრცელების არეალს. რაც ნაკლები მასპინძელი ეყოლება ვირუსს, მით ნაკლები საშუალება ექნება ამათუ იმ მუტაციის გადარჩენის და შემდეგ ამ ახალი ფორმით გამრავლების. მხოლოდ ასე შეიძლება ბოლოს ის გრიპის ვირუსის დონის საფრთხედ გადავაქციოთ.
რატომ უსწრაფესი ვაქცინაცია? რა მნიშვნელობა აქვს დროს? - მოკლე დროში ადამიანების დიდი მასის აცრა და ეგრეთ წოდებული „ჯოგური იმუნიტეტის“ კრიტიკული დონის მიღწევა ცივილური მეთოდებით, ვაქცინაციით და არა ადამიანთა ავადობის და სიცოცხლის ფასად, აუცილებლად გაწყვეტს პათოლოგიურ ჯაჭვს რაშიც ახლა მთელი სამყარო ვართ ჩაბმული.
არის თუ არა ყველა ვაქცინა თანაბრად ეფექტური? - სამწუხაროდ არა. დღეს არსებული მონაცემებით Pfizer, Moderna, Astrazenecca, J&J არიან საკმარისად ეფექტური ამ წუთას არსებულ ყველა შტამთან მიმართებაში, მათ შორის დელტა შტამის წინააღმდეგაც. სინოვაკსა და სინოფარმზე ძალიან მწირი მონაცემები გვაქვს და ეფექტურობით ნამდვილად ჩამორჩებიან დანარჩნებს, მაგრამ სიკვდილისგან ისინიც გვიცავენ, განსაკუთრებით ვაქცინაციიდან პირველ თვეებში. სწორედ ამიტომ, თუ სხვა ვაქცინებზე არ მიგიწვდებათ ხელი და არც იმის პირობები გაქვთ რომ თავი ადექვატურაად დაიცვათ, აუცილებლად აიცერით იმით რაც ავტორიზებულია ამერიკის დაავადებათა კონტროლის ცენტრის და მსოფლიო ჯანდაცვის ორგანიზაციის მიერ და ხელმისაწვდომია თქვენთვის. იგულისხმება ჩინური წარმოების ვაქცინებიც. მოგვიანებით, ბუსტერ დოზები დასჭირდება ყველა ვაქცინას და იმედია, იმ ეტაპისთვის მაინც საქართველოში უფრო ფართო არჩევანი გექნებათ. მთავარია, ეს უკიდურესად კრიტიკული პერიოდი გაიაროთ რაღაცა ფორმის დაცვით, თუნდაც მინიმალურით. იმუნიტეტს თუ ოდნავი შეხება მაინც ჰქონდა კორონავირუსთან ან მის „სპაიკ“ ცილასთან, ვირუსის ორგანიზმში მოხვედრისას ის გაცილებით უფრო ნაკლებ დროს დახარჯავს პასუხის მოსამზადებლად ვიდრე ეს შეიძლება მოხდეს აუცრელ ორგანიზმში.
შეუძლია თუ არა ყველას უსაფრთხოდ აიცრას? - დიახ, თითქმის არ არსებობს ადამიანი ვისი აცრაც არ შეიძლება. რისკების სწორად გათვლა და ამა თუ იმ პრობლემური პირებისთვის სწორი ვაქცინის შერჩევაა უბრალოდ საჭირო. ვიმეორებ, პროცესის სწორი დაგეგმარების პირობებში, ნებისმიერი ადამიანის აცრაა შესაძლებელი.
როგორ ვიქცევით თუ ექიმი გვირჩევს რომ არ ავიცრათ, რადგან ვაქცინა ექსპერიმენტულია, გენეტიკას შეგვიცვლის, არავინ იცის ორი წლის მერე რას გამოიწვევს და ასე შემდეგ? - ასეთ შემთხვევაში სასწრაფოდ ვიცვლით ექიმს. ექიმს, რომელიც ამ არგუმენტებით ცდილობს პაციენტის დარწმუნებას რომ სასიცოცხლოდ აუცილებელი პრევენციის ზომას არ მიმართოს უბრალოდ არ აქვს ელემენტარული ცოდნა და საერთოდ არ ესმის საკუთარი პროფესია. სამწუხაროდ არც სურვილი აქვს ცოდნა გაიახლოს და პაციენტებთან თანამდეროვე ცოდნით შეიარაღებულმა იმუშაოს. ექიმი პაციენტს უნდა ესაუბრებოდეს კვლევებზე დაყრდნობით და არა საკუთარი შეგრძნებებით ან რელიგიური გრძნობების გათვალისწინებით.
ეწინააღმდეგება თუ არა ვაქცინაცია რომელიმე რელიგიის ფუნდამენტურ პრინციპებს? - ყველა ის რელიგია რომელიც ადამიანის სიყვარულს ქადაგებს აბსოლიტურად თანხვედრაშია ვაქცინაციის პრინციპთან. ვაქცინაცია ადამიანს იცავს სიკვდილისგან და დასახიჩრებისგან. ჯერ ფიზიკური სხეული უნდა არსებობდეს რომ მას რომელი რელიგია სჭირდებოდეს სულის გადასარჩნად. სწორედ ამიტომ ვაქცინაციის, ჯერ კიდევ ადრეულ ეტაპზე ყველა პროგრესული რელიგია შეთანხმდა, რომ თავის მრევლს მოუწოდოს აცრისკენ. მიმართვაში პირდაპირ იყო იდეა, რომ ვაქცინაცია მოყვასის სიყვარულის გამოხატვის ერთ-ერთი ფორმაა. ასე ვიცავთ ერთმანეთს ტანჯვისა და სიკვდილისგან.
და რაც ყველაზე მთავარია... სანამ ვაქცინაცია სრულფასოვნად შესაძლებელი გახდება საბავშვო ასაკში, ჩვენი შვილების ჯანმრთელობა და სიცოცხლე ჩვენს ხელშია. ავიცრებით, დავიცავთ წესებს, შევაჩერებთ ვირუსის გავრცელებას, დავიცავთ ბავშვებს ავადობისგან და სიკვდილისგან.
ყოველ ნაადრევად დასრულებულ სიცოცხლეში არის ყველა იმ ადამიანის წვლილი ვინც კოვიდ პანდემიას არასერიოზულად უდგება და უგულებელყოფს პრევენციის წესებს!
ჯანმრთელობას და გონიერებას გისურვებთ. ამ წუთს ერთადერთი საუკეთესო დაცვა კოვიდის ძველი თუ ახალი ვარიანტებისგან არის გონიერება. გონიერი ადამიანი სწორად ირჩევს თავდაცვის მისთვის უსაფრთხო მეთოდს და ასე ცდილობს დაიცვას საკუთარი თავი და საზოგადოება სიკვდილის საფრთხისგან“.
აგრეთვე დაგაინტერესებთ:
არ ვიცი ოპოზიცია საიდან მოიყვანს მზეჭაბუკს, რომელიც კალაძეს ოპონენტი იქნება - სოხაძე
ბრალეულობის დადგენის გარეშე დასაქმებულს მარაგის დანაკლისის ანაზღაურებას ვეღარ მოსთხოვენ
„გზაზე ჩემს სიმპათიურ ბიჭთან ერთად“ – რა ფოტოებს აქვეყნებს ხატია ბუნიათიშვილი?
