„მოხდება ორი მნიშვნელოვანი წერტილის შეერთება, რომელიც ასოცირდება კარმასთან, დროსთან და გარდაუვალობასთან...“ - აპრილის ასტროლოგიური პროგნოზი ნინა ხომერიკისგან

„როგორი იქნება 2025 წლის აპრილი!

2025 წლის აპრილი სავსეა კრიზისული, ასტროლოგიური მოვლენებით, რომელთაც საკმაოდ დიდი გაგრძელება ექნებათ და რეალობა გაიყოფა ორ ნაწილად, ცხოვრება არსებულ ტრანზიტებამდე და არსებული ტრანზიტების შემდგომ პერიოდად. აპრილში მოხდება ორი მნიშვნელოვანი წერტილის შეერთება, რომელიც ასოცირდება კარმასთან, დროსთან და გარდაუვალობასთან. ერთ-ერთი მათგანი წარსულის, ხოლო მეორე, მომავლის გუშაგია და ზუსტად ახლა, ძალიან მნიშვნელოვანია არ გაჰყვეთ დინებას, არამედ აიღოთ პასუხისმგებლობა იმ არჩევანზე, მოქმედებასა და გადაწყვეტილებებზე, რასაც მიიღებთ და გააკეთებთ ამ პერიოდში, ვინაიდან, ამ ყველაფერს დიდი გაგრძელება მოჰყვება.

აპრილში მოხდება სატურნის და ჩრდილოეთის აღმავალი, კარმული კვანძის გადაკვეთა, რომელიც ასოცირდება მომავალთან და რომ იცოდეთ, ყველაზე მნიშვნელოვანი მოვლენები ადამიანებისა და ქვეყნების ბედ-იღბალში, ხდება ზუსტად იმ წლებში, როდესაც სატურნი აკეთებს შეერთებას მომავლის ან წარსულის კვანძთან, აგრეთვე გვაქვს შუალედური წერტილებიც, რომლებსაც შეაქვთ კორექტირება ჩვენი მომავლის მარშრუტის არჩევაში და ეს კომბინაცია ქსოვს ჩვენს ბედს და ასახავს ჩვენი ცხოვრების ციკლურობას, ანუ სატურნის, კარმული კვანძებისა და შუალედური წერტილების გადაკვეთა, გამოხატავს კარმის ერთგვარ უნივერსალურ გრაფიკს, რომელიც შეიძლება მოარგო ადამიანებისა და ქვეყნების ბედ-იღბალს.

1. კარმული კვანძების გრაფიკი, როდესაც ხდებოდა სატურნისა და აღმავალი კვანძის (რახუ) შეერთება:

1991 წ. იანვარი (შეერთება) - 1994 წ. იანვარი (შუალედური წერტილი);

2002 წ. მაისი (შეერთება) - 2005 წ. მაისი (შუალედური წერტილი);

2013 წ. სექტემბერი (შეერთება) - 2016 წ. ოქტომბერი (შუალედური წერტილი);

2025 წ. აპრილი (შეერთება) - 2028 წ. აპრილი (შუალედური წერტილი);

2. კარმული კვანძების გრაფიკი, როდესაც ხდებოდა სატურნისა და დაღმავალი კვანძის (კეტუ) შეერთება:

1997 წ. იანვარი (შეერთება) - 1999 წ. ივლისი (შუალედური წერტილი);

2007 წ. ოქტომბერი (შეერთება) - 2010 წ. სექტემბერი (შუალედური წერტილი);

2019 წ. აპრილი (შეერთება) - 2022 წ. აპრილი (შუალედური წერტილი);

2031 წ. თებერვალი (შეერთება) - 2034 წ. ივლისი (შუალედური წერტილი);

ყველა ეს თარიღი ასოცირდება იმ პერიოდებთან, როდესაც ჩვენ მოგვიწია მიგვეღო მნიშვნელოვანი და ფუნდამენტური გადაწყვეტილებები ჩვენს ცხოვრებაში. ასტროლოგიაში სატურნისა და ჩრდილოეთის კვანძის შეერთებას „დაწყევლილი ასპექტი“ ეწოდება და არა იმიტომ, რომ რამე ცუდი უნდა მოხდეს, არამედ იმიტომ, რომ ჩვენი სურვილები, ამ პერიოდის განმავლობაში, შესრულდება გვიან, მაგრამ არ იქნება ისეთი საბოლოო შედეგები, რომელიც მოიტანს კმაყოფილებას და ხშირად ის სიტყვები, რასაც ამ შეერთების დროს ვაჟღერებთ, მუშაობს როგორც წინასწარმეტყველება. იმ წლებში, როდესაც ხდება მსგავსი სახის შეერთებები, გვიჩნდება მომავლის გაუთვითცნობიერებელი შიშის განცდა.

გაიხსენეთ, რა მოვლენებს ჰქონდა ადგილი ამ პერიოდებში თქვენს ცხოვრებაში და როგორია მათი ციკლურობა. ძალიან ხშირად, ასეთ წლებში, როდესაც გავდივართ სატურნისა და მთვარის რომელიმე კვანძთან შეერთებას, ვდგავთ მცდარ ნაბიჯებს, მაგალითად: სატურნისა და დაღმავალი კვანძის კვეთის პერიოდში, გვგონია, რომ დავუშვით შეცდომები და მივიღეთ არასწორი გადაწყვეტილებები ან პირიქით, თუმცა, სინამდვილეში, ასე არ არის, რადგან კარმული კვანძები ქმნიან ილუზიას, და აღმავალთან შეერთების დროს, გვიჩნდება განცდა, თითქოს, რაღაცას ვფლობთ, რაც რეალობას არ შეესაბამება, ხოლო დაღმავალთან შეერთების დროს, გვაქვს ილუზია, რომ თითქოს რაღაც გვაკლია ცხოვრებაში, რაც სინამდვილეში გვაქვს და ჩვენს მიერ მიღებული არჩევანისა და გადაწყვეტილებების თავისებურება გულისხმობს იმას, რომ რახუსთან შეერთების დროს ვაკეთებთ არჩევანს და ვიღებთ გადაწყვეტილებებს მომავალზე დაყრდნობით, ხოლო კეტუსთან შეერთების შემთხვევაში, ძირითადად ვეყრდნობით ჩვენს გამოცდილებას, წარსულს და მიუხედავად იმისა, რა გადაწყვეტილებებსაც არ უნდა ვიღებდეთ, ერთხელაც დგება კრიტიკული წერტილის კორექციის დრო, როდესაც პლანეტა სატურნი დგება კარმულ კვანძებს შორის (ანუ აქტიურდება შუალედური წერტილები) და ამ დროს ხდება, იმ მნიშვნელოვანი მოვლენების განვითარება, რომელიც აკორექტირებს ჩვენს მარშრუტს, ეს ყველაფერი ერთად, კი აჩვენებს ჩვენი ბედ-იღბლის ციკლურობას.

პლანეტა სატურნი არის პასუხისმგებლობისა და ნებადართულობის საზღვრების სიმბოლო, თითქოს ის ასახავს შესაძლებლობის მიჯნას, ამ სიტყვის ფართო გაგებით, მაგალითად: ავიღოთ დრო, რომელიც ყველა ადამიანს ინდივიდუალურად აქვს სიცოცხლისათვის გამოყოფილი, დრო, რომელიც მკაცრად აკონტროლებს ჩვენს ცხოვრებას, ასევე საზღვრებს ქვეყნებს შორის, რომელსაც მარტივად ვერ გადავლახავთ, გავდივართ შემოწმებას, საპასპორტო კონტროლს, უნდა დავექვემდებაროთ წესებსა და შეზღუდვებს. ეს ის წესებია, რომლებიც განსაზღვრავენ სახელმწიფოებრივ და ბიუროკრატიულ პროცედურებს, შეზღუდვებს და ნებართვებს. სატურნი, ასევე არის ძალაუფლება და მმართველობითი მოდელი, აგრეთვე კარმა და შურისძიება. იგივე სფეროებს, მაგრამ განსხვავებულ სიბრტყეში, აკონტროლებენ კარმული მთვარის კვანძები, რომლებიც ასახავენ ჩვენი ბედ-იღბლის ციკლურ ხასიათს.

ასტროლოგიაში გვაქვს ორი კარმული კვანძი, რომელიც ყოველთვის ერთმანეთის დიამეტრულად, საპირისპირო მხარეს დგანან. ერთ-ერთი მათგანი არის ჩრდილოეთის კვანძი, ანუ იგივე რახუ, რომელიც ასოცირდება მომავალთან, ხოლო მეორე, სამხრეთის კვანძი, ანუ კეტუ, განვლილი გზის მაჩვენებელია. იმისათვის, რომ ზუსტად მიხვდეთ მათ დანიშნულებას პრაქტიკაში, შეგიძლიათ წარმოიდგინოთ, რომ ჩვენი სამყარო არის დახურული სისტემა, რომელსაც მართავს სატურნი, ის აორგანიზებს წესრიგსა და კონტროლს, მაგრამ თუ ყოველთვის ყველაფერი განვითარდება ზუსტად არსებული წესების მიხედვით და არ შემოვიდა გარედან განსხვავებული ენერგიები, არასოდეს არაფერი არ შეიცვლება და ადრე თუ გვიან სისტემა დაიწყებს დეგრადაციას, ზუსტად ამ კრიზისის წინაშე რომ არ დავდგეთ, საჭიროა მთვარის კვანძების არსებობა.

ერთ-ერთი მათგანი, კერძოდ ჩრდილოეთის კვანძი, უზრუნველყოფს ახალი ინფორმაციის შემოდინებას სისტემაში, რაც შესაძლოა იყოს ახალი იდეა, იდეოლოგია, მმართველობის ახალი მოდელი, ხოლო მეორე, სამხრეთის კვანძი უზრუნველყოფს დამუშავებული ინფორმაციის განდევნას სისტემიდან, ანუ მთვარის კვანძებს მოაქვთ ევოლუცია იმ სამყაროსათვის, რომელსაც მართავს სატურნი და იმ წლებში, როდესაც სატურნი აკეთებს რომელიმე მათგანთან შეერთებას ან დგება მათ შორის, საფუძველი ეყრება ყველაზე მნიშვნელოვან მოვლენებს ადამიანებისა და ქვეყნების ისტორიაში.

სატურნისა და კეტუს შეერთების დროს, ადამიანებში ხშირად იბადება დანაშაულის გრძნობა, ვიღაცის, ან საკუთარი თავის მიმართ, პირველ რიგში არარეალიზებული ოცნებების, გამოუყენებელი შესაძლებლობების, ან საკუთარი შეცდომების გამო, გაიხსენეთ თქვენი ფიქრები, სურვილები, ან სინანული, რომელიც მოვიდა თქვენთან 2019 წელს, მაშინ, როდესაც გავდიოდით სატურნისა და კეტუს შეერთებას და რადგან ეს პლანეტა არის საზღვრების სიმბოლო, ახლა შეგიძლიათ დაუბრუნდეთ ყველა იმ მომენტს, რაც მაშინ არ გააკეთეთ და შეეცადოთ აისრულოთ თქვენი არარეალიზებული სურვილები, იმისათვის, რომ გათავისუფლდეთ ტვირთისაგან და იაროთ მსუბუქად მომავლისაკენ. ის წლები, სადაც აღნიშნულია სატურნისა და რახუს შეერთება, ასოცირდება იმ პერიოდებთან, როდესაც ჩვენს ცხოვრებაში მოდიან ისეთი ადამიანები, ვისთანაც გვაქვს უძველესი კავშირები, ანუ წარსული ინკარნაციიდან, რაც გვაძლევს იმ ვალების გასტუმრების შესაძლებლობას, რომელიც დაგვიგროვდა ერთმანეთის მიმართ, ან შესაძლოა, ეს შეხვედრაც იყოს იმ აუსრულებელი სურვილების კატეგორიიდან, რომელიც ეკუთვნის წარსულ ინკარნაციას და ახლა მოგეცათ შეხვედრის შანსი.

სატურნისა და კეტუს შეერთების დროს, ბევრს ვფიქრობთ წარსულზე და ვცდილობთ რაღაცის დავიწყებას, პატიებას ან ცხოვრებიდან გაშვებას, ხოლო რახუსთან შეერთების შემთხვევაში, გვაშინებს მომავალი და იძულებულნი ვხდებით გადავაბიჯოთ არსებულ საზღვრებს, ანუ გავცდეთ იმ სისტემას, სადაც აქამდე ვიყავით, იმისათვის, რომ მივიღოთ ახალი გამოცდილება, მაგალითად: დავიწყოთ დამოუკიდებლად ცხოვრება, გადავიდეთ მშობლების სახლიდან, ნებაყოფლობით ან სხვა მიზეზების გამო დავტოვოთ სამსახური, ანუ იცვლება ძველი სისტემა, ასევე შესაძლებელია გავემგზავროთ სხვა ქვეყანაში საცხოვრებლად, ან დავასრულოთ ოჯახური ურთიერთობები, ანუ ის შეერთება, რომელიც ახლა ხდება, ფაქტობრივად გვაიძულებს გავიდეთ იმ სისტემის მიღმა, რომელშიც აქამდე ვიყავით და ზუსტად ახლა, ძალიან მნიშვნელოვანია ჩვენი სურვილები, ოცნებები და ფიქრები.

გააანალიზეთ წარსულის ციკლები, რა სურვილები გქონდათ იმ წლებში, როდესაც სატურნის და რახუს შეერთებას გადიოდით და გაიხსენეთ, როგორ ფორმაში შეძელით მათი რეალიზაცია. ასევე ძალიან მნიშვნელოვანია გავითვალისწინოთ ამ შეერთებებს შორის შუალედური წერტილებიც და თუ ჩვენ, არ ვასრულებთ სატურნისა და მთვარის კვანძების შეერთებების დროს დაკისრებულ ვალდებულებებს, მაშინ გვიწევს მათი შესრულება უფრო მკაცრ ფორმებში შუალედურ პერიოდებში.

მოვლენების მასშტაბურობა, ამ ოთხი წერტილის აქტივაციის დროს, ასევე დამოკიდებულია საერთო ასტროლოგიურ ფონზეც, მაგალითად: 2022 წელს, ჩრდილოეთის კვანძი იმყოფებოდა პლანეტა ურანთან შეერთებაში, რომელიც თავის მხრივ სძენდა დინამიკას და დესტრუქციულობას ყველა მიმდინარე მოვლენას, თუ მსგავს ასპექტებს, თან არ სდევს მნიშვნელოვანი ასტროლოგიური პროცესები, მაშინ კორექციის ეტაპებს შედარებით რბილად გავდივართ. მიმდინარე პერიოდში, გარდა არსებული ფონისა, სატურნი ასევე გააკეთებს შეერთებას პლანეტა ნეპტუნთან, რომელიც არის მსოფლიო ოკეანეების სიმბოლო და ეს გადაკვეთა შეიძლება ჩაითვალოს ერთგვარ მანიშნებლად იმისა, რომ შეიცვლება ოკეანეების საზღვრები, ანუ 2025 წლის ეს ასპექტი იმუშავებს, როგორც ერთგვარი კატალიზატორი, რომელიც გამოიწვევს მთელ რიგ ცვლილებებს ბუნებაში.

ასევე ძალიან მნიშვნელოვანია გავითვალისწინოთ, რომ იმ წლებში, როდესაც ხდება სატურნისა და აღმავალი კვანძის გადაკვეთა, ჩნდება ახალი მინიშნებები, სიმბოლოები, რაც შეიძლება ჩაითვალოს ერთგვარ გზავნილად იმისა, თუ რა გველოდება მომავალი წლების განმავლობაში, ამიტომ ყურადღება მიაქციეთ მიმდინარე მოვლენებს, ასევე გულისყურით მოუსმინეთ საკუთარ სიტყვებს, რადგან როგორც უკვე ზემოთ აღვნიშნე, ამ შეერთებას ასტოლოგიურად „დაწყევლილი ასპექტი“ ეწოდება და ყველაფერი, რასაც ვამბობთ, განსაკუთრებით მკაცრ და ემოციურ ტონში მატერიალიზდება და ასრულდება, რაც რა თქმა უნდა საბოლოო ჯამში არ მოგვეწონება.

აგრეთვე ამ პერიოდში შეიძლება დაეჯახოთ საზღვრების არსებობის საკითხებს, ამ სიტყვის ფართო მნიშვნელობით, ფიზიკურ ან ნებადართულობის საზღვრებს საკუთარი თავისათვის, პარტნიორულ ურთიერთობაში, ემოციების გამოხატვის ნაწილში, აგრეთვე ტერიტორიული და საცხოვრებელი ადგილის შეცვლის საზღვრებს, ოჯახურ ურთიერთობებში, სამსახურში, ზოგად კომუნიკაციებში და ა.შ. გაგიჩნდებათ განცდა, რომ ეძებთ ახალ ჰორიზონტებს, ამ პერიოდში, ნათლად დაინახავთ მინუსებს და ხარვეზებს იმ სისტემისა, რომლის განუყოფელი ნაწილიც აქამდე იყავით და დაიწყებთ იმ მოცემულობიდან გამოსავლის ძიებას, რომელიც ოდესღაც თქვენ თვითონ შექმენით, საკუთარი შიშების, აზრების ან რწმენის ხარჯზე. თუმცა, ეს ყველაფერი მარტივი არ არის, რადგან ახლა მოგიწევთ ისწავლოთ ცხოვრება ჩვეულის მიღმა და ამ პერიოდში, მიღებული ყველა თქვენი არჩევანი ან გადაწყვეტილება დარჩება უცვლელი 2036 წლამდე, მანამ, სანამ არ მოხდება სატურნის და მომავლის კვანძის შემდეგი შეერთება. განსაკუთრებით რთული პერიოდის გავლა მოგვიწევს 14-დან 30 აპრილის ჩათვლით, ვინაიდან, გარდა იმ ასპექტებისა, რაზედაც ახლა ვისაუბრეთ, ცის კაბადონზე შეიკვრება დიდი კვადრატი, რომელშიც მონაწილეობას მიიღებს: პლუტონი, მარსი, მზე და შავი მთვარე, რაც იმას გულისხმობს, რომ ჰაერი დაბინძურებულია, ეს შეიძლება გამოვლინდეს, როგორც პირდაპირი, ასევე გადატანითი მნიშვნელობით, ანუ საინფორმაციო სივრცის დაბინძურება, რასაც შემდეგ სტატუსში იხილავთ.

აქვე უნდა აღინიშნოს, რომ სატურნისა და მთვარის კვანძების თევზების ზოდიაქოს ნიშანში შეხვედრა საკმაოდ იშვიათი მოვლენა არის და მისი შეერთება სამხრეთის, ანუ წარსულის კვანძთან ბოლოს 1905 წელს მოხდა, ამიტომ ეცადეთ ყველაფრის მიმართ გამოიჩინოთ დიდი ყურადღება და ყველა ის არჩევანი, რომელსაც ახლა გააკეთებთ, იყოს გათვითცნობიერებული, რადგან ამ მოვლენებს, 2036 წლამდე, თქვენს ცხოვრებაზე ექნება გავლენა“, - წერს ნინა ხომერიკი.

ასევე დაგაინტერესებთ:

⭕„აფეთქებები მზეზე, მაგნიტური ქარიშხლები, ადამიანის ხელით შექმნილი ნეგატიური სიტუაციები“ - ასტროლოგი ნინა ხომერიკი აპრილის მოსალოდნელ ასპექტებზე

🎥 როგორ შევარჩიოთ კაბა ჩვენი სხეულის ფორმებია მიხედვით? - 2025 წლის საქორწილო კაბების ტენდენციები

🎥 „ჩიტი, ბუდე...“ - რა კადრებს აქვეყნებს ნუკი კოშკელიშვილი