შეზღუდული შესაძლებლობის ქონა არ ნიშნავს, რომ ადამიანის ოცნებები მიუწვდომელია. სინამდვილეში, ბევრი წარმატებული ცნობილი ადამიანი განვითარების ისეთ დარღვევებთან ერთად ცხოვრობს, როგორიცაა აუტიზმი და ADHD. თუმცა, ფიზიკური ან განვითარების დარღვევის მქონე ბავშვის ყოლამ შესაძლოა მნიშვნელოვნად შეცვალოს მშობლობის გამოცდილება.
ბევრ ცნობილ ადამიანს აქვს მსგავსი გამოცდილება და ისინი ღიად საუბრობენ ისეთი შვილების აღზრდაზე, რომლებიც ისეთი მდგომარეობების წინაშე დგანან, როგორიცაა აუტიზმის სპექტრის აშლილობა და ცერებრალური დამბლა.
მსახიობ სილვესტერ სტალონეს ვაჟს, სერჯიო სტალონეს, აუტიზმის დიაგნოზი დაუსვეს. საინტერესოა, რომ ფილმში „როკი II“ (1979) ჩვილი, რომელიც ეკრანზე როკის შვილს განასახიერებდა, სინამდვილეში თავად სტალონეს ვაჟი იყო! სერჯიო სტალონემ რობერტ ბალბოა უმცროსის როლი შეასრულა.
„სერჯიო დაახლოებით 2–3 წლამდე ჩვეულებრივ ვითარდებოდა, შემდეგ კი შევამჩნიეთ, რომ უფრო ჩაკეტილი გახდა და ფიზიკურ სიახლოვესა და ყურადღებას აღარ პასუხობდა ისე, როგორც ადრე. დიაგნოზი ძალიან მძიმე დარტყმა აღმოჩნდა“, - აღნიშნა სტალონემ.
თავდაპირველად, მშობლები დიაგნოზს ვერ იჯერებდნენ. თუმცა, ნამდვილობა შემდგომმა გამოკვლევებმა დაადასტურა. ამიტომ, გეგმა B-ზე გადავიდნენ - საქმეში აქტიურად ჩართეს სპეციალუსტები და ყველაფერს აკეთებდნენ, რომ ბიჭის მდგომარეობა გაუმჯობესებულიყო.
სტალონე აღიარებდა, რომ სერჯიოსთან ურთიერთობისთვის მას საკუთარი მიდგომის შეცვლა დასჭირდა. მისი აზრით, ასეთი ბავშვის შემთხვევაში მშობელი ვერ აიძულებს შვილს, მის სამყაროში შემოვიდეს - პირიქით, თავად უნდა შევიდეს ბავშვის სამყაროში.
სტალონემ საკუთარი სახლის ეზოც ისე მოაწყო, რომ სერჯიოს ბუნებასთან ურთიერთობა შეძლებოდა: წყლის ხმა, მწვანე სივრცე და ისეთი გარემო, სადაც ბიჭი მშვიდად იქნებოდა. სამწუხაროდ, სილვესტერი და მისი მეუღლე საშა მალე განქორწინდნენ, ბიჭი კი დედასთან დარჩა. ამის მიუხედავად, მსახიობს არასდროს შეუწყვეტია მასთან კონტაქტი და მკურნალობაშიც სოლიდურ თანხებს ხარჯავდა.
მსახიობი შვილს პრესის ზედმეტი ყურადღებისგან იცავს და საშუალებას აძლევს, საკუთარ სამყაროში მშვიდად იცხოვროს. პირველი შვილის დაკარგვის შემდეგ სტალონე კიდევ უფრო დაუახლოვდა სერჯიოს.
ირლანდიელი მსახიობის, მსოფლიო დონის ვარსკვლავის კოლინ ფარელის ვაჟს, ჯეიმსს, იშვიათი გენეტიკური მდგომარეობა - ანგელმანის სინდრომი აქვს. მსახიობმა გადაწყვიტა, რომ საკუთარი საქველმოქმედო ფონდი ამ დაავადების მქონე ადამიანებისათვის დაეთმო და მკურნალობასა და სხვა საჭირო პროცედურებში დახმარებოდა.
ჯეიმსს არ შეუძლია ლაპარაკი და უჭირს დამოუკიდებლად ჭამა, ამიტომ განსაკუთრებულ მოვლას საჭიროებს.
„თავისი გულწრფელობით, ბრძოლით, შეუპოვრობითა და პიროვნული თვისებებით, ჯეიმსი ადამიანებში საუკეთესოს ავლენს. მან ფაქტობრივად გადამარჩინა. მე თვითდესტრუქციულ გზაზე ვიდექი. როდესაც საკუთარი თავის გამო ცხოვრების შეცვლა ვერ შევძელი, ეს ჯეიმსის გამო გავაკეთე. მან მომცა მიზეზი, გავმხდარიყავი უკეთესი ადამიანი და მამა“, - აღნიშნა ფარელმა შვილზე საუბრისას.
ფარელი ერთ-ერთ ინტერვიუში იხსენებდა, რომ ჯეიმსის ყურებამ მას ასწავლა ადამიანისა და სხეულის ცხოვრების საოცრებად აღქმა - ის, რასაც ადამიანების უმეტესობა ყოველდღიურ ცხოვრებაში ავტომატურად იღებს, ჯეიმსისთვის გაცილებით რთულად მისაღწევია.
„მე ჯეიმსს ისე ველაპარაკები, თითქოს ის 20 წლისაა, სრულყოფილად ფლობს ინგლისურ ენას და ასაკისთვის შესაბამისი კოგნიტური შესაძლებლობები აქვს“, - დასძინა მსახიობმა.
2009 წელს მსახიობმა ჯონ ტრავოლტამ ტრაგიკულად დაკარგა 16 წლის ვაჟი, ჯეტი, რომელსაც აუტიზმი და კავასაკის დაავადება ჰქონდა. ჯეტს კრუნჩხვა დაემართა, წაიქცა და თავის დაცემის შედეგად სასიკვდილო ტრავმა მიიღო.
2001 წელს, ჯეტის ჯანმრთელობაზე საუბრისას, ტრავოლტა ამბობდა, რომ როდესაც მისი შვილი დაახლოებით 2 წლის იყო და კავასაკის სინდრომი დაუდგინდა, ოჯახმა იფიქრა, რომ შეიძლებოდა მისი დაკარგვა. მოგვიანებით ტრავოლტა იხსენებდა, რომ ეს მის ცხოვრებაში ერთ-ერთი ყველაზე ემოციური გამოცდილება იყო და ამბობდა, რომ ჯეტის დაბადებამდე ასეთი ძლიერი სიყვარული სხვა ადამიანის მიმართ არ უგრძნია.
2009 წელს, შვილის გარდაცვალების შემდეგ, ტრავოლტამ პირველად საჯაროდ დაადასტურა, რომ ჯეტს აუტიზმი ჰქონდა და კრუნჩხვითი აშლილობაც აწუხებდა. მისი თქმით, ჯეტს კრუნჩხვები დაახლოებით ყოველ 5–10 დღეში ემართებოდა და ყოველი ეპიზოდი 45 წამიდან ერთ წუთამდე გრძელდებოდა.
2006 წელს ცნობილი გახდა, რომ დევიდ და ვიქტორია ბეკჰემების ვაჟს, რომეოს, ეპილეფსია ჰქონდა. ვიქტორია ბეკჰემმა აეროპორტში პაპარაცები გააფრთხილა, რომ ფოტოების გადაღებისას კამერის განათება არ გამოეყენებინათ, რადგან მკვეთრ განათებას მის შვილში კრუნჩხვის პროვოცირება შეეძლო.
ამ ისტორიას ერთი მნიშვნელოვანი დეტალიც აქვს: რომეოს ეპილეფსიის შესახებ ინფორმაცია სწორედ მაშინ გახდა საჯარო, როდესაც ვიქტორია ჰითროუს აეროპორტში პაპარაცებს დაუპირისპირდა. მედიის ცნობით, მან შვილს კამერების ციმციმისგან ფიზიკურადაც დაიცვა და ფოტოგრაფებს სთხოვა, მისთვის ფლეში აღარ დაენათებინათ.
რომეო უკვე 23 წლისაა და ბოლო წლების საჯარო მასალებში ის აქტიურად აგრძელებს ცხოვრებასა და კარიერას - ფეხბურთის შემდეგ მოდელობასა და მოდის სფეროზე გადაიტანა ყურადღება. 2025 წლის წყაროები აღნიშნავს, რომ მისი ეპილეფსია მედიკამენტებით კონტროლდება.
