ვინ უნდა მოიგოს „ოქროს ბურთი“? BBC Sport-ის ექსპერტები ხვიჩა კვარაცხელიას, ლამინ იამალსა და ჰარი კეინს შორის არჩევანს აკეთებენ

BBC Sport-ის საფეხბურთო მიმომხილველებმა საკუთარი ფავორიტები დაასახელეს. მათი შეფასებები განსხვავდება: ზოგი ინდივიდუალურ თამაშსა და სანახაობრივობას ანიჭებს უპირატესობას, ზოგი კი სეზონის განმავლობაში გატანილ გოლებსა და მოგებულ ტიტულებს.

ევროპული ფეხბურთის ექსპერტი გიიომ ბალაგე მიიჩნევს, რომ „ოქროს ბურთს“ ლამინ იამალი მოიგებს. მისი თქმით, ესპანელმა ფეხბურთელმა ინდივიდუალური ოსტატობა და გუნდური წარმატებები გააერთიანა და განსაკუთრებული შთაბეჭდილება დატოვა.

ბალაგეს აზრით, „პარი სენ-ჟერმენის“ რამდენიმე ფეხბურთელი იმსახურებს აღიარებას, მათ შორის ფაბიან რუისი, ხვიჩა კვარაცხელია, უსმან დემბელე და ვიტინია. თუმცა, მისი ვარაუდით, პარიზული კლუბის მოთამაშეებს შორის ხმები გადანაწილდება.

ევროპული ფეხბურთის კიდევ ერთი ექსპერტი ჟულიენ ლორანსი მიიჩნევს, რომ ჯილდო ხვიჩა კვარაცხელიას უნდა გადაეცეს. მისი შეფასებით, ქართველმა ფეხბურთელმა ჩემპიონთა ლიგაზე გამორჩეული სეზონი ჩაატარა და გადამწყვეტ შეხვედრებში მნიშვნელოვანი წვლილი შეიტანა. ლორანსის აზრით, იამალს ჯილდოს მოგების კარგი შანსი აქვს, თუმცა თავად არჩევანს კვარაცხელიას სასარგებლოდ გააკეთებდა.

მსგავსი პოზიცია აქვს „ლივერპულისა“ და „ბლექბერნის“ ყოფილ მცველ სტივენ უორნოკსაც. მისი აზრით, იამალის გამარჯვება ესპანეთის ნაკრებთან ერთად მიღწეულ წარმატებას შეიძლება უკავშირდებოდეს, თუმცა პირადად ის „პარი სენ-ჟერმენის“ ქართველ ფეხბურთელს აირჩევდა.

BBC Radio 5 Live-ის სტუმარმა და გამოცემა The Athletic-ის ჟურნალისტმა რორი სმიტმაც განაცხადა, რომ მისი ფავორიტი კვარაცხელიაა. ჟურნალისტის შეფასებით, ქართველი ფეხბურთელი ევროპულ საკლუბო ფეხბურთში ერთ-ერთი ყველაზე სანახაობრივი მოთამაშეა და „პარი სენ-ჟერმენის“ ჩემპიონთა ლიგის წარმატებაში მნიშვნელოვანი როლი შეასრულა. სმიტი მიიჩნევს, რომ ფეხბურთელი მხოლოდ იმის გამო არ უნდა დაიჩაგროს, რომ მისი ქვეყანა მსოფლიო ჩემპიონატზე გამარჯვების პრეტენდენტი არ არის.

ინგლისელი ექსპერტების ნაწილი კი „ოქროს ბურთის“ მთავარ ღირსეულ კანდიდატად ჰარი კეინს მიიჩნევს. ინგლისის ნაკრების ყოფილმა თავდამსხმელმა ალან შირერმა განაცხადა, რომ კეინის შედეგები „ბაიერნსა“ და ეროვნულ ნაკრებში ბოლო 12–18 თვის განმავლობაში გამორჩეული იყო.

კეინის სასარგებლოდ ისაუბრეს ინგლისის ნაკრების ყოფილმა ნახევარმცველმა დენი მერფიმ, „ტოტენჰემისა“ და „კრისტალ პალასის“ ყოფილმა თავდამსხმელმა ანდროს თაუნსენდმა და ინგლისის ქალთა ნაკრების ყოფილმა ფეხბურთელმა ელენ უაითმაც. თაუნსენდის თქმით, კეინმა 65 მატჩში 73 გოლი გაიტანა, მათ შორის 36 - ბუნდესლიგაში, ხოლო ჩემპიონთა ლიგაზე მის ანგარიშზე 14 გოლი იყო.

ნორვეგიელი ჟურნალისტი ლარს სივერტსენიც კეინის გამარჯვებას ისურვებდა. მისი აზრით, ინგლისელი თავდამსხმელი „ბაიერნში“ ლიდერის თვისებებს ავლენს, თუმცა ჟურნალისტი ვარაუდობს, რომ კეინის მშვიდმა და ნაკლებად ხმაურიანმა საჯარო იმიჯმა შესაძლოა მის შანსებზე იმოქმედოს.

ამრიგად, BBC Sport-ის ექსპერტთა მოსაზრებები რამდენიმე ფეხბურთელს შორის იყოფა: ლამინ იამალი, ჰარი კეინი და ხვიჩა კვარაცხელია მთავარ სახელებად გამოიკვეთნენ, თუმცა გამოკითხულთა ნაწილმა სხვა კანდიდატებიც დაასახელა, მათ შორის მაიკლ ოლისე.

ვინ მიიღებს „ოქროს ბურთს“, ოფიციალურად 26 ოქტომბერს გახდება ცნობილი.