„სალომე ზურაბიშვილს თანამდებობაზე ორი პარასკევი აქვს დარჩენილი, მისი გადაყენება მოხდება იმპიჩმენტის წესით“, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.
როგორც კობახიძემ აღნიშნა, სალომე ზურაბიშვილის იმპიჩმენტის წესით გადაყენებას აქვს სიმბოლური დატვირთვა.
პრემიერ-მინისტრის თქმით, ზურაბიშვილმა თანამდებობა არ უნდა დატოვოს სტანდარტულად, არამედ როგორც კონსტიტუციის დამრღვევმა და როგორც მოღალატემ.
„სალომე ზურაბიშვილს თანამდებობაზე „ორი პარასკევი“ აქვს დარჩენილი. იმპიჩმენტის წესით მოხდება მისი გადაყენება, ნოემბრის ბოლოს ან დეკემბრის დასაწყისში, იმის მიხედვით, როდის ჩაინიშნება პარლამენტის პირველი სხდომა. აქედან გამომდინარე, მის არც ერთ ნაბიჯს არ აქვს არავითარი პრაქტიკული დატვირთვა ჩვენთვის.
მას შემდეგ, რაც „ქართული ოცნება“ მიიღებს 100 მანდატზე მეტს საქართველოს პარლამენტში, მყისიერად, უკვე მეორე დღეს, პირველი სხდომის გამართვის შემდეგ განხორციელდება პრეზიდენტის იმპიჩმენტი, რასაც აქვს სიმბოლური დატვირთვა. იცით, რომ ისედაც მხოლოდ ერთი თვით იკვეცება პრეზიდენტის უფლებამოსილების ვადა, ისედაც გასდის ვადა დეკემბერში. აქედან გამომდინარე, იმპიჩმენტს აქვს სიმბოლური დატვირთვა, თუმცა პრინციპულად მნიშვნელოვანია, მოღალატემ სტანდარტულად არ დატოვოს პრეზიდენტის თანამდებობა. მან ეს თანამდებობა უნდა დატოვოს, როგორც კონსტიტუციის დამრღვევმა და როგორც მოღალატემ. ეს უნდა გაფორმდეს საქართველოს პარლამენტის შესაბამისი გადაწყვეტილებით საქართველოს კონსტიტუციის შესაბამისად“, – განაცხადა ირაკლი კობახიძემ.
