🎥 როდის არის ასპირინი სიცოცხლის გადამრჩენელი და ვისთვის არის ის კატეგორიულად აკრძალული - კოტე თოდუას განმარტება

როდის არის ასპირინი შეუცვლელი?

„არსებობს კლინიკური მდგომარეობები, სადაც ასპირინის ეფექტურობა ოფიციალური გაიდლაინებითაა დადასტურებული: გულის შეტევა, მწვავე შეტევისას 300 მგ ასპირინის დაღეჭვა სიკვდილიანობის რისკს 23%-ით ამცირებს. ინფარქტგადატანილ პაციენტებში ხანგრძლივი შემანარჩუნებელი თერაპია (75-100 მგ დღეში) განმეორებითი შეტევის რისკს 25%-ით, ხოლო სიკვდილიანობას 10-12%-ით ამცირებს.
იშემიური ინსულტი და ტვინის ტრანზიტორული იშემია, გამოიყენება მხოლოდ ჰემორაგიული ინსულტის (სისხლჩაქცევის) გამორიცხვის შემდეგ. შაკიკი - 1 გრამი ასპირინი პაციენტთა 52%-ში სრულად ხსნის შაკიკის შეტევას, რაც სჯობნის ისეთ ალტერნატივებს, როგორებიცაა იბუპროფენი ან ნაპროქსენი. პერიფერიული არტერიული დაავადებები - ამცირებს სისხლძარღვების დახშობისა და სიკვდილიანობის რისკს (დაახლოებით 25%-ით).
მსხვილი ნაწლავის კიბოს პრევენცია - 5 წელზე მეტი ხნის განმავლობაში დაბალი დოზით (75-100 მგ) მიღება მსხვილი ნაწლავის კიბოს განვითარების რისკს 40%-ით ამცირებს. თუმცა, სისხლდენის საფრთხის გამო, ეს რეკომენდაცია ეხება მხოლოდ მაღალი რისკის (მაგ. გენეტიკური წინასწარგანწყობის) მქონე პირებს.

მთავარი რისკები და გვერდითი ეფექტები - მიუხედავად დადებითი თვისებებისა, ასპირინს სერიოზული უარყოფითი მხარეებიც აქვს: კუჭ-ნაწლავის სისხლდენა და წყლული, ასპირინი 3-ჯერ ზრდის კუჭიდან სისხლდენის რისკს (შედარებისთვის: ნაპროქსენი ზრდის 2-ჯერ, იბუპროფენი — 1.5-ჯერ). იგი თრგუნავს კუჭის დამცავი ლორწოვანი ბარიერის წარმოქმნას. ხანგრძლივი მოქმედება, სისხლდენის გაზრდილი რისკი ნარჩუნდება მიღებიდან 7 დღის განმავლობაში. უარყოფითი გავლენა თირკმელებზე, თირკმლის სისხლის მიმოქცევას ამცირებს დაახლოებით 10%-ით. უსაფრთხოების წესები კუჭის დასაცავად, თუ ასპირინის მიღება აუცილებელია, რისკის 50%-ით შემცირება შესაძლებელია მისი საკვებთან ან რძესთან ერთად მიღებით, ხოლო პროტონული ტუმბოს ინჰიბიტორებთან (მაგ. ომეპრაზოლი, პანტოპრაზოლი) კომბინაციით სისხლდენის რისკი 80%-ით მცირდება.

როდის არ შეიძლება ასპირინის მიღება?

18 წლამდე ასაკის ბავშვებსა და მოზარდებში.

ორსულობისას.

პროფილაქტიკისთვის ჯანმრთელ პირებში.

ჩვეულებრივი ტკივილისა და ცხელებისას - თავის, კბილის ან სახსრების ტკივილის დროს უპირატესობა ენიჭება უფრო უსაფრთხო ალტერნატივებს, პარაცეტამოლსა და იბუპროფენს.

სხვა არასტეროიდულ ანთების საწინააღმდეგო საშუალებებთან (NSAID) კომბინაციაში: ასპირინის ერთდროული მიღება იბუპროფენთან ან ნაპროქსენთან მკვეთრად ზრდის კუჭიდან სისხლდენის საფრთხეს“,- აღნიშნავს კოტე თოდუა.

ამასთან თოდუა მოუწოდებს მოსახლეობას, გამოიჩინონ მეტი ყურადღება და ნუ მიიღებენ ასპირინს (მათ შორის დაბალდოზიან ფორმებს, როგორებიცაა კარდიომაგნილი ან კარდიოასპირინი) ექიმის დანიშნულების გარეშე.