რომელ რაიონებშია შხამიანი გველების გავრცელების არეალი და როგორ დავიცვათ მათგან თავი? - ჰერპეტოლოგის რჩევები

„ქვეწარმავლების გარჩევა თუ არ შეუძლია ადამიანს, რთულია გაარჩიოს გიურზა სხვა სახეობისგან. კუს ტბაზე გიურზა არ ბინადრობს. თუმცა, არის შემთხვევები, როდესაც გველი მანქანის სავალ ნაწილში შეძვრება, ან სამშენებლო მასალების გადატანისას აძვრება მასალებში და ჩამოტვირთვისას გადმოვა. ასეთ შემთხვევაში, შესაძლოა, აღმოჩნდეს გიურზა იმ ადგილას, სადაც მისი გავრცელების არეალი არაა“,- ამბობს „დაიჯესტთან“ საუბრისას ჰერპერტოლოგი.

❓ მომრავლდნენ თუ არა გველები საქართველოში?

„რაც საქართველოში საინფორმაციო წყაროები გაფართოვდა და ინფორმაცია სოციალური ქსელის დახმარებით მოქალაქეებამდე სწრაფად მიდის, ამან გამოიწვია მსგავსი აზრის ჩამოყალიბება, რომ ქვეწარმავლების რაოდენობა გაიზარდა.

არადა, უბრალოდ ამ ინფორმაციის წვდომამ შეძლო და გამოიწვია ეს, თორემ სხვა წლებთან შედარებით ქვეწარმავლების რაოდენობა მომატებული არაა. უბრალოდ, როდესაც გველს ნახულობენ, ფოტოს უღებენ, სოციალურ ქსელში ათავსებენ და იწვევს აზრს, რომ ქვეწარმავლების რაოდენობამ იმატა.

❓ გველის რომელი სახეობებია გავრცელებული თბილისში?

ამ პერიოდში, ზამთრის ძილიდან როდესაც გამოდიან ქვეწარმავლები, აქტიურები არიან, ცდილობენ ტერიტორიების ათვისებას.

აგრეთვე, სიცხიანი პერიოდის დროს გველი ეძებს გრილ ადგილს, როგორიცაა სარდაფები, სადარბაზოები, კერძო სახლებშიც შედიან ხოლმე.... ლისის ტბა, კუს ტბა, რეკრეაციული ზონები...

თბილისის გარშემო 15 სახეობის გველი ბინადრობს. ამ 15-დან ადამიანის სიცოცხლისთვის საფრთხეს წარმოადგენს გიურზა. კიდევ არის ერთი, ცხვირრქოსანი გველგესლა, რომელიც სააგარაკო ზონებში ბინადრობს, როგორიცაა კოჯორი, მუხათწყარო. მისი შხამი შედარებით სუსტია და მომაკვდინებელი არაა, მაგრამ გიურზა სიცოცხლისთვის საფრთხეს წარმოადგენს. გიურზას გავრცელების არეალია: კახეთიდან მოყოლებული, თბილისის ნაწილი, სამშვილდემდე.

❓ როგორ უნდა მოვიქცეთ, როდესაც გველი გვიკბენს?

„შხამიანი გველის კბენისას ადამიანს სხეულზე 2 ნაკბილარი უჩნდება. არა შხამიანის შემთხვევაში - ბევრი ნაკბილარი, ნაჩხაპნი და შესაძლოა, 1-2 წვეთი სისხლი გამოუვიდეს.

შხამიანის შემთხვევაში ეს 2 ნაკბილარი, შესაძლოა, 1-იც იყოს, მომენტალურად იწყებს ტკივილს, ჩალურჯება - ჩაშავება - ჩაწითლებას და ამ პროცესით ხვდები, რომ გველი შხამიანია.

👉 პირველ რიგში, ვრეკავთ სასწრაფოში

👉 ვეცადოთ არ ვიმოძრაოთ

👉 არ ვინერვიულოთ

👉 მივიღოთ ძალიან ბევრი არაალკოჰოლური სითხე

👉 თუ ალერგიული შოკი გვქონდა, რაიმე ანტიჰისტამინური საშუალება უნდა მივიღოთ

❌ არ შეიძლება:

👉 ლახტის დადება

👉 დასერვა

👉 ამოწვა

👉 ამოწოვა

ზემოთ აღნიშნული ქმედებები არაეფექტურია და შესაძლოა, გართულებაც გამოიწვიოს.

ნაკბენი სულაც არ ნიშნავს იმას, რომ აუცილებლად მოვკდებით... დრო საკმარისი გვაქვს, გიურზას ნაკბენი უეჭველად სიკვდილს არ ნიშნავს, სამედიცინო დახმარების დროულად მიღებისთვის 5-6 საათი გვაქვს.

❓გოგირდის დაწვა მითია თუ რეალობა?

„მითია!

ეზო, პირველ რიგში, მოვლილი და მოწესრიგებული უნდა იყოს. ბალახი მოთიბული, არ უნდა ეყაროს სამშენებლო მასალების ნარჩენები, ნაგავი, სადაც ქვეწარმავლები დაიმალებიან.

გოგირდის, რეზინებისა და ფოთლების დაწვის შედეგი ნულია. რაც შეეხება ქიმიურ საშუალებას, ან პრეპარატების გამოყენებას, „შეწამლვას“, მათი შედეგი ძალზედ დაბალია, ასეთი საშუალებებით ადგილების დამუშავება დადებით შედეგს არ გვაძლევს“, - ამბობს შოთა ზანდუკელი.

აგრეთვე წაიკითხეთ:

ალერგოლოგი: ანაფილაქსიური შოკი და სიკვდილიანობა შესაძლოა კოღოს ნაკბენმაც გამოიწვიოს

მაკიაჟის გამოყენების რეკომენდაციები აკნეს შემთხვევაში - ექიმის 10 რჩევა

რა გართულებებს იწვევს მამის მწეველობა ორსულ დედასა და შვილზე - ექიმის განმარტება