დიდი მკერდი და ქრონიკული შაკიკი: რა კავშირი აღმოაჩინეს მეცნიერებმა

მკვლევრებმა სტენფორდის სამედიცინო ცენტრთან დაკავშირებულ თავის ტკივილისა და ნევროლოგიურ კლინიკებში 2017-2024 წლებში მკურნალობაზე მყოფი 687 ქალის სამედიცინო ჩანაწერები შეისწავლეს. მათგან 347-ს მაკრომასტია ჰქონდა, 340-ს კი – არა.

კვლევის შედეგების მიხედვით, მაკრომასტიის მქონე ქალებში:

ქრონიკული შაკიკის შემთხვევები დაახლოებით 40%-ით უფრო ხშირი იყო;

კისრის ტკივილის ალბათობა ორჯერ მეტი აღმოჩნდა;

ძილის ობსტრუქციული აპნოეს მაჩვენებელი დაახლოებით 50%-ით მაღალი იყო;

კისრის ნერვების გაღიზიანების ან კომპრესიის შედეგად განვითარებული მდგომარეობის – ცერვიკალური რადიკულოპათიის – ალბათობა ორჯერ მეტიც კი იყო.

მკვლევრებმა შედეგების შეფასებისას ისეთი ფაქტორებიც გაითვალისწინეს, როგორებიცაა ასაკი, სხეულის მასის ინდექსი, დეპრესია და შფოთვა. 

ამავე კვლევის ავტორების განმარტებით, გადიდებული მკერდის ქსოვილი შესაძლოა დამატებით დატვირთვას ქმნიდეს კისრისა და მხრების არეში, რაც ტკივილისა და ნერვული პრობლემების განვითარებას უწყობდეს ხელს. მკვლევრები ასევე ვარაუდობენ, რომ მკერდის დიდი მასა შესაძლოა, ძილის დროს სუნთქვის პროცესზეც ახდენდეს გავლენას.

კვლევამ კიდევ ერთი საინტერესო გარემოება გამოავლინა: მაკრომასტიის მქონე ქალებში მკერდის შემცირების ოპერაციის ჩატარების ალბათობას მხოლოდ კისრის ტკივილი უკავშირდებოდა. შაკიკი, ნერვების კომპრესია და ძილის აპნოე ქირურგიული ჩარევის უფრო მაღალ მაჩვენებელთან დაკავშირებული არ აღმოჩნდა.

კვლევის წამყვანი ავტორის, უეიკ ფორესტის უნივერსიტეტის სამედიცინო სკოლის ნევროლოგის, დოქტორ კრისტინ პოკოკის განცხადებით, გადიდებული მკერდის ქსოვილი ხშირად მხოლოდ კოსმეტიკურ პრობლემად მიიჩნევა, თუმცა მიღებული შედეგები ქალთა ჯანმრთელობასთან დაკავშირებულ უფრო ფართო საკითხებზე მიუთითებს.

კვლევა 2026 წლის 22 სექტემბერს სამეცნიერო ჟურნალში Headache: The Journal of Head and Face Pain გამოქვეყნდა.