სასულიერო პირი, მამა ირინეოს შენგელია, 1996 წელს დაიბადა.
2014 წელს წარჩინებით დაასრულა ქალაქ თბილისის Ν99 საჯარო სკოლა. 2015-16 წლებში სწავლობდა ქალაქ თბილისის სასულიერო სემინარიაში. 2016 წელს ელადის (საბერძნეთი) მართლმადიდებელ ეკლესიაში აღიკვეცა მონაზვნად.
2017-2018 წლებში, საბერძნეთის მართლმადიდებელი ეკლესიის, დრამის მიტროპოლიტ პავლეს რეკომენდაციითა და წარგზავნით ცხოვრობდა და მოღვაწეობდა ათონის წმინდა მთაზე, წმინდა პავლეს მონასტერში, სულიერი და ასკეტური ცხოვრების პრაქტიკული შესწავლისთვის.
2018-2019 წლებში შეისწავლა თანამედროვე ბერძნული ენა და მიენიჭა არისტოტელეს სახელმწიფო უნივერსიტეტის ბერძნული ენის ცოდნის დამადასტურებელი სერთიფიკატი B2 დონე.
იგი „იუთუბის“ არხზე პოდკასტის „მღვდლებს შორის“ სტუმარი იყო, სადაც ისაუბრა, რატომ აირჩია მღვდლობა:
„მინდა ჩემი სიტყვა დავიწყო მაცხოვრის სიტყვებით, რადგან თავად უფალი არის გზა, იესო ქრისტემ 21 საუკუნის წინ თქვა: მე ვარ გზა, სიცოცხლე და ჭეშმარიტება. მე არ ვფიქრობ, რომ მღვდლობა არის ჩემი გზა, ჩემი გზა არის იესო ქრისტე და ამ გზაზე მღვდლობა აღმოჩნდა ჩემი პირადი მოწოდება.
ადამიანი მოწოდებაში თავისუფალია, ღმერთი თავისუფლებას ანიჭებს პიროვნებას და პიროვნება ირჩევს დათანხმდეს თუ არა ღვთის მოწოდებას. მე დავთანხმდი ღვთის მოწოდებას. არჩევანის თავისუფლება პიროვნების ღირებულებაა, აქედან გამომდინარე, მე ამ გზაზე აღმოვაჩინე, რომ ეს ჩემი მოწოდებაა.
ეს იყო ჩემი არჩევანი, სინერგიული კავშირი ღმერთსა და ჩემს შორის და გადავწყვიტე, გავყოლოდი ამ გზას, დავმდგარიყავი ამ გზაზე, რომელიც თავად ქრისტეა და ამ გზაზე შევიმოსე მღვდლობის საიდუმლო“, - ამბობს მამა ირინეოსი.
ასევე დაგაინტერესებთ:
⭕„ბედნიერი დასვენება, საუკეთესოები ხართ“ - გიორგი ძოწენიძე ოჯახთან ერთად საფრანგეთში მოგზაურობს
