ბათუმში პოლიციის მიმართ განხორციელებული სიტყვიერი შეურაცხყოფისა და წვრილმანი ხულიგნობის ფაქტზე მეტეოროლოგი კობა ფარტენაძე დააკავეს. სამართალდამცველებმა იგი ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციის კანონიერი მოთხოვნისადმი დაუმორჩილებლობა) მუხლებით აიყვანეს.
როგორც „იმედინიუსს“ შინაგან საქმეთა სამინისტროში განუცხადეს, 16 აგვისტოს, ერთ-ერთ სისხლის სამართლის საქმეზე მოწმის სახით გამოკითხვისას, ფარტენაძემ სამართალდამცველებს სიტყვიერი შეურაცხყოფა მიაყენა, რაზეც ადმინისტრაციული წარმოება დაიწყო.
უწყების ინფორმაციით, აღნიშნული პირი 17 აგვისტოს, ღამის საათებში, ბათუმში ხმამაღალი ლანძღვა-გინებით საზოგადოებრივ წესრიგს არღვევდა. პოლიციელების არაერთგზის მოწოდების მიუხედავად, შეეწყვიტა კანონსაწინააღმდეგო ქმედება, იგი მოთხოვნას არ დაემორჩილა და სამართალდამცველებს შეურაცხყოფა მიაყენა, რასაც მისი დაკავება მოჰყვა.
წყარო: imedinews.ge
