საქართველოს მთავრობის, ფონდ „ქართუსა“ და ქართული კლუბების ხელშეწყობით, უკანასკნელ წლებში ქართული რაგბი ახალ სიმაღლეებს იპყრობს. ამის შესახებ საქართველოს რაგბის კავშირის ხელმძღვანელობამ 2024 წლის შემაჯამებელი საერთო კრებაზე ისაუბრა, რომელიც 22 დეკემბერს “ავჭალის” სარაგბო სტადიონის საპრესკონფერენციო დარბაზში გაიმართა.
2022 წლიდან დღემდე ბორჯღალოსნებმა ტიერ1-ის ქვეყნებთან სამი ისტორიული გამარჯვება მოიპოვეს - 2022 წელს იტალიასთან ბათუმში 28:19 და უელსთან კარდიფში 13:12, 2024 წელს კი იაპონიასთან სენდაიში 25:23. ეს იყო მეორე გამარჯვება იაპონიასთან, პირველი 10 წლის შემდეგ.
ბორჯღალოსნების თამაშის შეფასებისას ხაზი გაესვა მნიშვნელოვან სტატისტიკას. ბოლო წლებში საქართველო უახლოვდება სარაგბო ელიტის წარმომადგენლებს და თუ 2021 წლამდე ტიერ1-ის გუნდებთან ჩატარებულ 18 თამაშში არცერთი გამარჯვება არ გვქონდა, ბოლო სამ წელიწადში 7 შეხვედრიდან სამი მოვიგეთ. 2021 წლამდე ბორჯღალოსნები ტიერ1-ის გუნდებთან საშუალოდ 30 ქულის სხვაობით მარცხდებოდა, ბოლო წლებში კი ეს მაჩვენებელი 6 ქულამდე შემცირდა.
რაგბის კავშირის პრეზიდენტმა იოსებ ტყემალაძემ მადლობა გადაუხადა კლუბებს, რომელთა ჩართულობის გარეშე ბორჯღალოსნებს აღნიშნული წარმატება ვერ ექნებოდა. ასევე აღინიშნა ამ წარმატებაში სახელმწიფოს, „ქართუ ჯგუფის“ და ქართული რაგბის მეგობარი კომპანიების როლი.
„ქართულმა რაგბიმ, ჩვენმა ტრადიციულმა თამაშმა ლელო-ბურთმა მთელს მსოფლიოს დაანახა ქართული გენეტიკის ძალა. ისტორიულად ყოველთვის ასე იყო, ჩვენს პატარა და ამაყ ერს გამუდმებით უწევდა დიდ ქვეყნებთან, იმპერიებთან ბრძოლა და ხშირ შემთხვევაში ერთიანობითა და თავდადებით აღწევდა გამარჯვებას. სამი ისტორიული გამარჯვებით, ჩვენ მთელს მსოფლიოს დავანახვეთ ქართული სული და ეს გზა აუცილებლად მიგვიყვანს მსოფლიო რაგბის მწვერვალებთან“, - აღნიშნა იოსებ ტყემალაძემ.
ასევე დაგაინტერესებთ:
