მსახიობი, მომღერალი, პოეტი, ამ ყველაფრის მიღმა კი პოზიტიური, გულწრფელი, ბავშვური, ღმერთისადმი დიდი რწმენით გამორჩეული – ასეთია გიორგი გილიგაშვილი, „ჩემმა მზემ” – როგორადაც იცნობს მთელი საქართველო.
33 წლის, როგორც თავად ამბობს ქრისტეს ასაკში, გიორგის ჯანმრთელობის სერიოზული პრობლემა შეექმნა, მაგრამ ავადმყოფობას მედგრად შეხვდა.
ამჯერად იგი პოდკასტის „არასერიოზული“ სტუმარი იყო, სადაც სხვადასხვა თემებზე ისაუბრა:
„სოციალურ ქსელში ერთი ესემესი არ მაქვს წაკითხული, არც საქებარი და არც სალანძღავი. კაცს ქება ძალიან ვნებს, სამწუხაროდ ადამიანებს ისე არ გვიყვარს ერთმანეთი, რომ ვამხილოთ სიყვარულით. ჩვენ უფრო მოგვწონს ერთმანეთის განკითხვა, წუნზე და ნაკლზე საუბარი - ეგო ამით იკვებება. შესაბამისად, კარგს წაიკითხავ შენ დაზიანდები, ავს წაიკითხავ და რაც არ უნდა თავად ზიანდებოდეს დამწერი, მეც არ ვარ იმხელა ქრისტიანი, რომ ეს ყველაფერი გავატარო და გულთან არ მივიტანო.
ახლა აქ მეტროთი მოვედი, ისე ველოსიპედით დავდივარ, მანამდე სკეიტბორდით დავდიოდი. სადღაც დამრჩა და ვიღაც ბალღებმა წაიღეს, ალბათ ახლა ისინი კატაობენ, მიხარია.
ვინ იცის ეგება ბოლოჯერ გვიღამდება. სულ მზადყოფნაში უნდა იყო, მაქსიმალურად განწმენდილი უნდა ჰქონდეს ხორცი და სულიც, რადგან არ იცი ბოლოს აღსასრული როდის მოგივა. დიდება ქრისტეს.
ჩემს სნეულებაზე რომ მეუბნებიან, გილიგ, შენ რატომ? რატომ არა რო? ვისზე მეტი ვარ, რადგან წვერ-ულვაში მაქვს განსაცდელი არ უნდა მქონდეს? მე კიდევ დიდხანს ვიცოცხლე, ბალღები არიან, ჩვილები აღესრულებიან, ჯერ ცხოვრება არ აქვთ ნანახი და ამხელა მუტრუკმა ტირილი როგორ დავიწყო, რომ ცოტა კიდევ. მან იცოდეს როგორ და როდის, მოვლენაც მისი იყო და აღსრულებაც. მადლიერი ვარ, რომ ეს განსაცდელი მომეცა.
ავთვისებიან სნეულებებში ყველაზე მორჩილი რომელიც არის ის შემყარა. ისეთი განრიგი მაქვს ოპერაციების შემდეგ, რომ ყოველ დილით უნდა ვსვა ერთი პაწაწინა წამალი, უწყინარი და ყოველ დილით უნდა მახსენდებოდეს ამ წამლით - დიდება ქრისტეს, უფალს უყვარხარ!
სულიერი ცხოვრებისთვის ეს დიდი საჩუქარია, ღმერთმა ცხონებისთვის გამზადებული ტრაპეზი მომცა. სიტყვა და საქმე ერთი უნდა იყოს.
მარტოკაცი თუ ღმერთთან ერთად არის, ეს სიმარტოვე საოცარია, აღმავსებელია, დამაბრძენებელია და საბოლოოდ, იმდენად შეიმეცნებს საკუთარი თავით უფალს, რომ თავისუფლების ყველაზე საუკეთესო ხარისხს მიაღწევს.
თუ კაცი ღმერთთან არ არის, მაშინ დარდი და დეპრესია შემოვა, ფიქრები არასაღმრთო ისეთი, რომ შეიძლება საკუთარ თავს ზიანი მიაყენოს“, - ამბობს გიორგი გილიგაშვილი.
ასევე დაგაინტერესებთ:
⭕ანუკი არეშიძე ახალ კადრებს აქვეყნებს - დიზაინერი მოკლე ოქროსფერ კაბაში პოზირებს
🎥 „ტოქსიკურია ურთიერთობა, როდესაც ბევრი დაშორება და შერიგებაა“ - ფსიქოლოგის გაფრთხილება წყვილებს
