მუსიკოსი და ტელეწამყვანი გია ბაღაშვილი გიორგი ნემსაძეს ემშვიდობება და სოციალურ ქსელში ემოციურ სტატუსს გვიზიარებს.
„ღმერთმა ნათელში დაამკვიდროს შენი სული ძმაო!
ბოლოს ერთი თვის წინათ გნახე, ერთად რომ ვიყავით სტადიონზე შენ, მე და ბესო. რაც ჩვენ იმ დღეს ვიმხიარულეთ და ვიხალისეთ. რაები აღარ გავიხსენეთ და მოვყევით...
შენ მაკადამია გევასებაო და პატარა ტომრით მომიტანე, ახლაც მიდევს მანქანაში...
დღეს რომ ამ სიტყვებს დავწერდი შენზე, რას წარმოვიდგენდი?!
შენ გენაცვალე ნემსა!..
გახსოვს, ბოლოს ტელეფონი რომ დაგრჩა სტადიონზე, უკან რომ მოგვიწია შებრუნება. შენ რომ უხერხულობდი, აქედან მანქანით შესვლა არ შეიძლება და თუ შეგვიშვებენო, ბესო რომ გეუბნებოდა, შენ ვინ არ შეგიშვებს ბიჭო, კაპიტანი ხარო. შეგიშვეს კი არა, ყველა კარი ერთბაშად გაგიღეს, იმიტომ რომ შენ ყველას გიორგი ნემსაძე იყავი - ყველასთვის ძვირფასი და საყვარელი!..
ბოლომდე თავმდაბალი, მართალი და ბავშვივით გულწრფელი დარჩი!..
ამ დროს რა დიდი კაცი იყავი მოედანზეც, ცხოვრებაშიც და მეგობრობაშიც!..
რა ადრე იყო შენი წასვლა ძმაო, რა ადრე!..
მსუბუქი იყოს შენთვის ქართული მიწა, რომლის ღირსების დასაცავად ლომივით იბრძოდი მწვანე მინდორზე! შენ ყოველთვის ჩვენს გულში იქნები!“, - წერს გია ბაღაშვილი.
საქართველოს ნაკრებისა და თბილისის „დინამოს" ყოფილი ნახევარმცველი და კაპიტანი გიორგი ნემსაძე 24 ოქტომბერს დაკრძალეს.
გიორგი ნემსაძე მიმდინარე წლის 21 ოქტომბერს, 54 წლის ასაკში გარდაიცვალა.
იგი ბოლო პერიოდში საქართველოს 18-წლამდელთა საფეხბურთო ნაკრების მთავარი მწვრთნელის პოსტს იკავებდა.
1988-1991 წლებში და 1993-1995 წლებში თამაშობდა თბილისის „დინამოში“, 1991-1992 წლებში ლანჩხუთის „გურიაში“, 1992-1993 წლებში თბილისის „შევარდენში“, ასევე გამოდიოდა გერმანიის „ჰამბურგში“, თურქეთის „ტრაბზონსპორში“, შვეიცარიის „გრასჰოპერსში“, იტალიურ „რეჯანაში“, თბილისის „ლოკომოტივში“, იყო შოტლანდიური „დანდის“ კაპიტანი, კარიერა „დინამოში“ დააასრულა.
საქართველოს ეროვნულ ნაკრებში 1992-2004 წლებში ჩატარებული აქვს 69 მატჩი.
