აშშ-ში მოღვაწე ქართველი ექიმი - ნანა გეგეჭკორი სოციალურ ქსელში პოსტს აქვეყნებს და მთავრობას ძვირად ღირებული კონცერტების გამართვის ნაცვლად, იშვიათი დაავადებით მქონე ბავშვების დახმარების ფონდის შექმნისკენ მოუწოდებს.
„პირადად არა ერთხელ მომსვლია წერილი საქართველოდან, იშვიათი დაავადების მქონე ბავშვების მშობლებისგან შველის თხოვნით. არა მგონია ძალიან ბევრნი იყვნენ. ნამდვილად ვიცი, რომ სრულიად მიტოვებული არიან სახელმწიფოს მხრიდან. უმარტივესად მოსაძიებელი ინფორმაციაც კი არ გააჩნიათ.
ჩვენს ქვეყანას პატრონი რომ არ ჰყავს ეს უკვე ვიცით, მაგრამ მოქალაქეები რომ ჰყავს კარგი ესეც ნამდვილად ვიცით.
იქნებ შევთავაზოთ მთავრობას…
არ გვინდა კონცერტი, შექმნან იშვიათი დაავადებით დატანჯული ბავშვების მოვლის ფონდი, გადარიცხონ კონცერტებისთვის გამოყოფილი სამოცდაათი მილიონი იმ ფონდში, ჩვენ, მოქალაქეები კი ვიყიდით იმ კონცერტების ბილეთებს წარმოდგენის გარეშე და ასე შევიტანთ წვლილს ბავშვების ფონდში. დარწმუნებული ვარ ვისაც შეუძლია ყველა იყიდის ბავშვების ბედნიერებას. მეც ვიყიდი ამ “კონცერტის” ბილეთებს და შევეცდები ჩემმა ყველა მეგობარმა იყიდოს.
საქართველოს მთავრობასაც შეეწირება მადლად და რაც მთავარია, უამრავი ბავშვი იგრძნობს, რომ მათი სიცოცხლე ისევე მნიშვნელოვანია როგორც მდიდარი მშობლების შვილების.
ფონდმა თანაბრად უნდა იზრუნოს ყველა ბავშვზე, ვინც იშვიათი დაავადებით იტანჯება.
წახალისების მიზნით სახელმწიფოს შეუძლია სპეციალური საგადასახადო შეღავათი დააწესოს ასეთ ფონდებში დიდი თანხების შემომწირველებისთვის.
საუბარი არაა იმაზე რომ ბიუჯეტმა ვინმეს ან რამეს უნდა მოაკლოს თანხები და ისე მოუაროს თავის მოქალქეებს. ამ კონკრეტულ ფონდს უბრალოდ უნდა შესწირონ ის სამოცდაათი მილიონი რომელიც აბსურდულ გართობაში უნდა გადაყრილიყო. მოქალაქეები კი გავიღებთ თანხას რითაც უკლასო მომღერლების მუსიკა უნდა მოგვესმინა. ამ ბავშვების სიხარულით ბევრად მეტ სიამოვნებას მივიღებთ.
ამგვარი მიდგომით ბათილდება სახელმწიფოს მიერ წარმოდგენილი ყველა არგუმენტი:
1. „სხვა ბავშვებმა რა დააშავეს“? - ფონდი გათვლილი იქნება იშვიათი დაავადების მქონე ყველა ბავშვზე და არა მხოლოდ აქონდროპლაზიით დაავადებულებზე.
2. „სახელმწიფო ვერ შეისყიდის პრეპარატს რომელსაც ევროპის სხვა ქვეყნები არ ყიდულობენ“ - არ შეისყიდოს სახელმწიფომ, ფონდმა დააფინანსოს კლინიკა რომელიც შეისყიდის და უზრუნველყოფს ბავშვების მკურნალობას.
3. „წამალი არაა რეგისტრირებული ქართული წამლის სააგენტოს მიერ“ - და რა უშლის ხელს რომ სწრაფი პროცედურით დარეგისტრირდეს. FDA-მ ამ წამლის დასარეგისტრირებლად სპეციალური მიდგომა ე.წ. Accelerated approval გამოიყენა, რას სწორედ პროცედურების დაჩქარებას ნიშნავს. თორემ ჰომეოპათია ხომ არიას აღიარებული ჯანმოს და ამერიკის წამლის სააგენტოს მიერ, ყოველდღიურად რომ ატყავებენ მოქალაქეებს შარლატანები თქვენს ქვეყანაში. თუ წამლად არაღიარებულ პრეპარატებს კრძალავთ აკრძალეთ მაშინ ჰომეოპათიაც.
3. „ბიუჯეტს ამის თანხა არ აქვს“ - არ გვინდა კონცერტი და ამ შემთხვევაში სამოცდაათი მილიონი ნამდვილად გვაქვს.
4. „წამლის მოქმედების შორსმიმავალი ეფექტები უცნობია“ - ასეთი პრეპარატების თუ სამკურნალო პროცედურების გამოყენებისას შეგიძლიათ გამოიყენოთ ინფორმირებული თანხმობის პრინციპი ბავშვის მეურვეები მოაწერენ ხელს ინფორმირებულ თანხმობას მკურნალობის დაწყებამდე. რაც ნიშნავს იმას, რომ თქვენი წუხილები გვერდით ეფექტებზე, შორეულ გართულებებზე ჩაიწერება იქ პუნქტებად და მეურვე ხელმოწერით აიღებს პასუხისმგებლობას, რომ იცის ამ საფრთხეებზე და ამის გათვალისწინებით თანხმდება მკურნალობას. სახელმწიფოს ვერავინ მოედავება გვერდით ეფექტებზე.
5. „წამალი დაჩქარებული ავტორიზაციით მიიღო FDA-მ და ასე ნაჩქარევად მიღებულ წამალს ვერ შევისყიდით“ - რემდესევირი რომ შეისყიდა სახელმწიფომ გახსოვთ ალბათ ყველას. რემდესევირიც დაჩქარებული ავტორიზაციით იყო დამტკიცებული და არც მასზე არსებობდა გრძელვადიანი ეფექტების ცოდნა. მეტიც, კოვიდით სიკვდილიანობაზე გავლენა არ ჰქონდა და არც სიმპტომებს ცვლიდა დრამატულად. საქართველოს სახელმწიფომ ეს წამალი როცა შეისყიდა იმ პერიოდის კვლევები ამბობდნენ, რომ რემდესევირი ჰოსპიტალიზაციის ხანგრძლივობას ამცირებდა სულ რამდენიმე დღით. მაშინ არავის გახსენებია გრძელვადიანი ეფექტები, ნაჩქარევი ავტორიზაცია თუ გვერდითი მოვლენები....
მოკლედ, ასეთი მიდგომით არც სახელმწიფო თმობს პოზიციას და არც მოქალაქეები რჩებიან მათივე სახელმწიფოს ზრუნვის მიღმა.
P.S. ცალკე ამბავია ის, რომ ამ წამლის სწორ სამიზნე ჯგუფში გამოყენებაზე მშობლებს უნდა ესაუბრონ პროფესიონალები და დეტალებში აუხსნან კონკრეტულად რა კრიტერიუმებს უნდა აკმაყოფილებდეს პაციენტის მდგომარეობა, რომ ეფექტი ხელშესახები და უსაფრთხო იყოს. არასწორი მოლოდინები ცალკე უბედურებაა ამ ისტორიაში სამწუხაროდ. ბავშვებზეა აქ საუბარი და იმედია ამ ისტორიით უფრო დაუძლეველ ტრავმას არ მიიღებენ ვიდრე ისედაც აქვთ ყოველდღიურად.
მსგავსი პრობლემების ძირფესვიანად მოგვარებას სისტემური ცვლილებები სჭირდება. სისტემური ცვლილებები მხოლოდ პატიოსანი პროფესიონალების ხელისუფლების პირობებშია შესაძლებელი. დროზე მგრძნობიარე პრობლემები კი სამწუხაროდ ვერ მოიცლიან სანამ ჩვენ პატიოსანი პროფესიონალების მთავრობის არჩევას ვისწავლით, იატაკქვეშა (საწოლქვეშა თუ მაგიდისქვეშა) კოორდინატორების გვერდის ავლით.
არ გვინდა კონცერტი - მოქალაქეებმა და მთავრობამ ერთად ვიყიდოთ ბავშვების ჯანმრთელობა…“, - წერს გეგეჭკორი.
აგრეთვე დაგაინტერესებთ:
🔵 „ჩემთან კონტაქტის გარეშე ნუ მიგზავნით „საჩუქრებს” სარეკლამოდ!“ - მაია ასათიანი
