საფეხბურთო სამყაროსთვის მძიმე ინფორმაცია ოფიციალურად დადასტურდა - „პარი სენ-ჟერმენისა“ და საქართველოს ეროვნული ნაკრების ვარსკვლავმა, ხვიჩა კვარაცხელიამ „ბარსელონასთან“ გამართულ მატჩში ჯვარედინი იოგების გაწყვეტის მძიმე ტრავმა მიიღო.
პარიზული კლუბის ოფიციალური ვებგვერდის ცნობით, ქართველი შემტევი მიმდინარე სეზონში მოედანზე გამოსვლას ვეღარ შეძლებს.
ხვიჩამ სოციალურ ქსელში ემოციური მიმართვა გაავრცელა და გულშემატკივრებს პირობა მისცა, რომ უფრო ძლიერი დაბრუნდება.
ხვიჩას შემდეგ ემოციურ მიმართვას ავრცელებს ფეხბურთელის მეუღლე, ნიცა თავაძე.
„ჩვენ ერთად ძალიან ბევრი რამ გამოვიარეთ, აღვნიშნეთ ისეთი მომენტები, რომლებზეც ოდესღაც მხოლოდ ოცნება შეგვეძლო და გადავლახეთ სირთულეები, რომლებმაც გზადაგზა უფრო ძლიერები გაგვხადა. მაგრამ მე ვიცი, რომ ადამიანის სიძლიერის ნამდვილი საზომი ის არ არის, როგორ დგას ის მაშინ, როდესაც ყველაფერი კარგად მიდის, არამედ ის, თუ როგორ დგება ფეხზე მაშინ, როცა ცხოვრება ყველაზე რთულ განსაცდელებს უმზადებს.
მე საკუთარი თვალით მინახავს შენი თავგანწირვა, დისციპლინა, მიზანდასახულობა და ის უთვალავი ბრძოლა, რომელსაც ჩუმად გადიოდი, რათა დღევანდელი ადამიანი გამხდარიყავი. მე ვიცი, როგორი გული გაქვს, როგორი ხასიათი და რამდენი ძალა იმალება შენში და ისიც ვიცი, რომ ვერცერთი დაბრკოლება, ვერცერთი მარცხი და ვერცერთი რთული პერიოდი ვერ წაგართმევს იმას, რაც აქამდე შეგიქმნია.
ზოგჯერ ცხოვრება ყველაზე ძლიერ ადამიანებსაც ისეთ განსაცდელებს უმზადებს, როგორსაც ისინი არასდროს ელოდნენ. მაგრამ მთელი გულით მჯერა, რომ ეს მომენტიც ჩვენი საოცარი ისტორიის კიდევ ერთი ნაწილი გახდება. ერთ დღეს უკან მოვიხედავთ და ამ პერიოდს გავიხსენებთ არა იმით, თუ რამდენად რთული იყო ის, არამედ იმით, თუ რამდენი ძალა დაგვჭირდა მის გადასალახად.
არასდროს არაფერში ვყოფილვარ ისე დარწმუნებული, როგორც შენში. არა იმიტომ, რომ წინ მარტივი გზა გელოდება, არამედ იმიტომ, რომ ვიცი, ვინ მიდის ამ გზაზე.
ყოველი გამარჯვების, ყოველი გამოწვევის, ყოველი ცრემლისა და ყოველი წარმატების დროს შენ გვერდით ვიდგები. ამ გზაზე არცერთი წუთის გავლა მარტო არ მოგიწევს.
ჩვენ უკვე დავწერეთ ერთად ჩვენი ისტორიის არაერთი საოცარი თავი, მაგრამ საუკეთესო ჯერ კიდევ წინ გვაქვს. ჩვენი ისტორია აქ არ მთავრდება. სწორედ აქ იწყება ახალი დაბრუნება და ახალი გამარჯვება.
ჩვენ იმაზე ძლიერები დავბრუნდებით, ვიდრე ოდესმე ვყოფილვართ.
ერთად. ყოველთვის. მიყვარხარ“, - წერს ნიცა თავაძე.
View this post on Instagram
⭕ ასევე დაგაინტერესებთ:
⭕ მთვარე თევზებში გადადის - რა სამედიცინო რეკომენდაციები უნდა გავითვალისწინოთ 21-23 ოქტომბერს
🎥 როგორ ემზადებოდნენ ოჯახის წევრები ტასო ხიზანიშვილის ხელის თხოვნისთვის – ნახეთ, კადრები
