პრინცი ჰარი და მეგან მარკლი შვილებთან, არჩისა და ლილიბეტთან ერთად, დიდი ბრიტანეთიდან გაემგზავრნენ. მათი წასვლა მეგან მარკლის მამის, თომას მარკლის წინააღმდეგ დაწყებული გამოძიების შესახებ გავრცელებულ ინფორმაციას დაემთხვა.
როგორც ფრანგული გამოცემა Madame Figaro წერს, სასექსის ჰერცოგი და ჰერცოგინია, რომლებიც დიდ ბრიტანეთში დაახლოებით ორი თვის წინ დაბრუნდნენ, შვილებთან ერთად ქვეყნის ფარგლებს გარეთ გაემგზავრნენ. გამოცემის ცნობით, ისინი ახლო მეგობრებთან ატარებენ დროს.
28 ოქტომბერს გავრცელებული ინფორმაციის თანახმად, მეგან მარკლის მამა, თომას მარკლი, არასრულწლოვანთა სექსუალური ძალადობის ამსახველი მასალის სავარაუდო ფლობის საქმეზე გამოძიების ფარგლებში მოექცა ყურადღების ცენტრში. მანამდე, 22 ოქტომბერს, გამოცემა The Sun-მა გაავრცელა ინფორმაცია, რომ თომას მარკლის წინააღმდეგ გამოძიება მიმდინარეობდა.
როგორც ცნობილია, მეგან მარკლის ნახევარძმამ, თომას მარკლმა უმცროსმა, სამართალდამცველებს განუცხადა, რომ ფილიპინებში, მამის საცხოვრებელში, მობილური ტელეფონის ძებნისას, ყუთებში ასობით ან შესაძლოა ათასობით საეჭვო ფოტო და ვიდეო აღმოაჩინა. აღნიშნულ მასალებს შორის, გავრცელებული ცნობით, მეგან მარკლის გაეროში გამართულ ღონისძიებაზე გამოსვლის ამსახველი ფოტოებიც იყო. ბრალდებები გამოძიების საგანია და მათი სისწორე დადგენილი არ არის.
გამოცემა Madame Figaro-ს ცნობით, მომხდარით მეგან მარკლი მძიმე ემოციურ მდგომარეობაშია. Hello!-სთან საუბრისას ჰერცოგინიას მეგობარმა აღნიშნა, რომ მას მომხდარი ძალიან აწუხებს და განსაკუთრებით იმ ბავშვებზე ფიქრობს, რომლებიც შესაძლოა დაზარალებულიყვნენ.
აღსანიშნავია, რომ მეგანს მამასთან ურთიერთობა 2018 წლიდან აღარ აქვს.
თუმცა, როგორც Page Six წერს, სამეფო ოჯახის საკითხებზე მომუშავე წყაროების ინფორმაციით, ჰარი და მეგანი ბრიტანეთიდან შვილების საშემოდგომო სასკოლო არდადეგების გამო გაემგზავრნენ. ამ ვერსიის თანახმად, მათი მოგზაურობა თომას მარკლის შესახებ ინფორმაციის გავრცელებას დაემთხვა და არ არსებობს დადასტურებული მტკიცებულება, რომ წყვილმა ქვეყანა სწორედ ამ სკანდალის გამო დატოვა.
ამ ეტაპზე უცნობია, კონკრეტულად როდის დაბრუნდებიან ჰარი და მეგანი დიდ ბრიტანეთში. მათი გამგზავრების ზუსტი მიზეზი წყვილს საჯაროდ არ დაუდასტურებია.
