საქართველოში „ომიკრონის“ შტამის კიდევ ხუთი შემთხვევა დადასტურდა

მისივე თქმით, ფაქტობრივად „ომიკრონმა“ ქვეყანაში ცირკულაცია დაიწყო

„ცოტა ხნის წინ დაემატა „ომიკრონის“ შტამის კიდევ ხუთი შემთხვევა, რომელიც ჩვენთან, დაავადებათა კონტროლის ცენტრის ლუგარის ლაბორატორიაში დადასტურდა. სულ ლაბორატორიულად დადასტურებულია 29 შემთხვევა, თუმცა ალბათ გაცილებით მეტია, რადგან იმ პროტოკოლის მიხედვით, რომელიც აქვს ყველა ლაბორატორიას ჩვენ მიერ ჯერ კიდევ 30 ნოემბერს დაგზავნილი, თუ სად შეიძლება, მიიტანონ ეჭვი, ეს ეჭვები ბოლო დღეების განმავლობაში უფრო გახშირდა. მხედველობაში მაქვს ლაბორატორიული ინდიკატორები, სადაც შეიძლება, დაშვებული იქნეს, რომ იყოს „ომიკრონი“, შემდეგ კი მისი გადამოწმება ხდება ლუგარის ცენტრში. ამ შემთხვევების დაახლოებით 50 პროცენტში დასტურდება, რომ არის „ომიკრონის“ შტამი. ფაქტობრივად მან ქვეყანაში ცირკულაცია დაიწყო. როგორც ვპროგნოზირებდით, ჩვენ არ ვართ გამონაკლისი“, – განაცხადა ამრან გამყრელიძემ.

მან ასევე განაცხადა, რომ ამ ეტაპზე ქვეყანაში ჯამში ომიკრონის 29 შემთხვევაა ლაბორატორიულად დადასტურებული და ყველა შემთხვევაში დაავადება მსუბუქად მიმდინარეობს.

„ყველა შემთხვევაში, რაც დადასტურებულია, დაავადება მსუბუქად მიმდინარეობს. არც ერთს, გარდა ერთისა, სტაციონარული მკურნალობა არ დასჭირვებია“, – აღნიშნა ამირან გამყრელიძემ.