„დათო“, „თავადი არჩილ ორბელიანი“, „იდოტოკრატია“, „თბილისური Love Story“, „ყველაფერი კარგად იქნება“ და კიდევ ბევრი საინტერესო სპექტაკლი - ეს იმ არასრული შემოქმედების ჩამონათვალია, რომელიც მსახიობ გოგა ბარბაქაძის დოსიეს ავსებს.
უნიჭიერეს მსახიობს ხალხის დიდი სიყვარული ერგო წილად. ჯერ კიდევ სერიალ „შუა ქალაქშიდან“ დათოს როლით შეიყვარა საზოგადოებამ. მან დაამტკიცა, რომ საუკეთესო კომედიური ჟანრის მსახიობია, მაგრამ საოცარია ის, რომ როგორც კომედიურ ჟანრში, ასევე დრამაშიც კარგად ირგებს როლს.
მაყურებელი გაოცებული იყო მისი გარდასახვით, როდესაც „დათოს“ პერსონაჟის შემდეგ „თავად არჩილ ორბელიანად“ მოგვევლინა ისტორიულ სერიალ „ტიფლისში“.
დღეს სწორედ ამ უნიჭიერესი ადამიანის უცნობ ამბებს გიამბობთ.
გოგა და მაიკო
გოგა და მაია ერთად არიან უკვე 22 წელია, მათი სიყვარული მეტად მტკიცეა. როგორც თავად გოგა ამბობს, ღალატს არ ცნობს, რადგან მეუღლის ერთგულია. მათ ორი შვილი ჰყავთ – გაბრიელი და ბარბარე.
ყველაფერი მოულოდნელად მოხდა. თეატრალურ ინსტიტუტში რომ ჩავაბარე გამოცდები, მაიკო იმ წელს ამთავრებდა. სამი წლით არის ჩემზე უფროსი. მეორე კურსზე ვიყავი, როცა შალვა გაწერელიამ სპექტაკლი დადგა, სადაც მაიკო თამაშობდა ჩემს შვილს და იქ შემთხვევით შევხვდით. ბატონი შალვა ჩემი შვილის ნათლიაა. ჩვენი ოჯახის შექმნაში ამ ადამიანმა დიდი როლი ითამაშა. ის რომ არა, ალბათ, ერთმანეთს ვერც შევხვდებოდით.
მერე ბატონი შალვას დაბადების დღე იყო, რაღაც სიურპრიზს ვუკეთებდით და იქიდან დავუახლოვდით ერთმანეთს მე და მაიკო. არც მე მითქვამს, რომ მომწონს და არც მას. უბრალოდ, ერთმანეთთან თავს კარგად ვგრძნობდით, მივდიოდით, მოვდიოდით, ერთად დავდიოდით კონცერტებზე, გამოფენებზე. მერე ათვითცნობიერებ, რაღაც დროით რომ ვერ ხედავ, ნერვიულობ, მასზე ფიქრობ და არა სხვა გოგოზე. ნელ-ნელა ხვდები, რომ რაღაც ვერ არის კარგად. მანამდე ასეთი გრძნობა ნამდვილად არ მქონია. ალბათ, მქონდა, მაგრამ მე არ ვუყვარდი არავის. ორმხრივი სიყვარული არავისთან მქონია მაიკოს გარდა, რომ გაგვევლო, გამოგვევლო, ერთად გვეფიქრა.
კარგა ხანს, შვიდი წელი, ვიყავით ერთად, სანამ ოფიციალურად გავაფორმებდით ჩვენს ურთიერთობას. რაც დრო გადიოდა, უფრო გვიყვარდებოდა ერთმანეთი, ბავშვმა კიდევ უფრო გააძლიერა ეს გრძნობა. ხელს ისიც გვიწყობს, რომ ერთი სამსახური გვაქვს, იქაც ერთად ვართ. სამწუხაროდ, ბავშვისთვის უფრო ნაკლები დრო გვრჩება, ვიდრე ერთმანეთისთვის.
მინდა, რომ ფინანსურად ცოტა უფრო ძლიერი ვიყო. დანარჩენი ყველაფერი იდეალურად მაქვს ოჯახში. ჩემი რიტმიდან, პროფესიიდან გამომდინარე, მეტი უნდა მქონდეს, მაგრამ, სამწუხაროდ, პროფესია სათანადოდ არ გვიფასდება. თავიდან რომ მივედი თეატრში, ცოტა მოგვიმატეს ხელფასი, ახლაც მოგვიმატეს, მაგრამ ეს არაფერია იმასთან, რასაც ჩვენ ვაკეთებთ.
ესეც ერთ-ერთი მიზეზი იყო იმისა, რატომაც არ შევუღლდით მე და მაიკო წლების განმავლობაში. ფინანსურად არ ვიყავით მზად. რომ მივხვდი, უკვე შეიძლებოდა მარტო გვეცხოვრა, მაშინ გადავდგით ეს ნაბიჯი. თუ არ გამოსწორდებოდა მდგომარეობა, მაინც რაღაცას მოვახერხებდით. ახლა ჩემი ხელფასი მხოლოდ იმას სწვდება, რომ ბავშვს არაფერი მოაკლდეს, მეტი არაფერში გვყოფნის.
ცოლის შეურაცხყოფა
გოგა ბარბაქაძის ძმა, რეზი ნაცარაშვილი, რომელსაც ყოფილი სამხედრო პირი ჯგუფურ ცემასა და მუქარაში ადანაშაულებდა, თბილისის საქალაქო სასამართლომ 5 000-ლარიანი გირაოს სანაცვლოდ გაათავისუფლა.
ყოფილმა სამხედრომ, დავით ნემსაძემ, სოციალურ ქსელში გოგას მეუღლის, მსახიობ მაია დობორჯგინიძის მისამართით შეურაცხმყოფელი ვიდეო გამოაქვეყნა. ბარბაქაძის განმარტებით, ნემსაძეს თავისი მეუღლე თავდაცვის სამინისტროს თანამშრომელი ეგონა.
„ეს ადამიანი ჩემს მეუღლეს უშვერი სიტყვებით მიმართავდა, მასხარად მოიხსენიებდა და ვიდეო ლაივში აფურთხებდა კიდეც. გაზიარებულ ვიდეოში ჩანს, როგორ ვარჯიშობს ჯარისკაცი, რომელიც თავდაცვის სამინისტროდან გაათავისუფლეს. ნემსაძე მასზე ამბობს, ეს კაცი "მაკდონალდსში" უნდა მუშაობდეს და "ღამის შოუს" ეს მასხარა (იგულისხმა მაია დობორჯგინიძე) თავდაცვის სამინისტროშიო. კარგად იქნება აბა რა, მაიორზე, თუ ლეიტენატზე მეტ ხელფასს იღებსო. ეს სრული აბსურდია, ჩემს მეუღლეს თეატრის გარდა არასდროს არსად უმუშავია. ამ ადამიანმა შეურაცხყოფა მოგვაყენა არაფრის გამო, საერთოდ არაფერ შუაში რომ არ ვართ, ისე“, - აცხადებდა ბარბაქაძე.
როგორც ის განმარტავს, ინციდენტი ერთ-ერთ სპორტდარბაზში მოხდა, სადაც მისი ძმა, რეზი ნაცარაშვილი ვარჯიშობდა.
აგრეთვე წაიკითხეთ:
24 წლის ასაკში დაოჯახება, განშორება და რომანი მეგი გოგიტიძესთან - ჯაბა კილაძის აქამდე უცნობი ამბები
