არასრულწლოვანი გოგო საკუთარი მშობლების წინააღმდეგ – 112 შესული ზარის შემდეგ საქართველოში უცხო ქვეყნების მოქალაქე ცოლ-ქმარი დააკავეს. ადვოკატი 13 წლის გოგოს მიერ მშობლების წინააღმდეგ მიცემულ ჩვენებაზე საუბრობს, რის საფუძველზეც სამართალდამცველებმა საქართველოში მცხოვრები უცხო ქვეყნის მოქალაქეები ცოლ-ქმარი დააკავეს.
„კურიერმა” ბრალის დადგენილება მოიპოვა. დოკუმენტში წერია, რომ დედინაცვალი და მამა 13 წლის შვილს ფიზიკურად უსწორდებოდნენ და მოზარდზე ფსიქოლოგიურად ძალადობდნენ.
არანაკლებ მძიმეა ის ჩვენებაც, რომელიც მოზარდმა პოლიციას მისცა. „კურიერის” ინფორმაციით ჩვენებაში არასრულწლოვანი დეტალურად აღწერს ძალადობის ეპიზოდებს და იხსენებს, ერთ-ერთი ჩხუბისას როგორ შეეშინდა და შიშისგან უნებლიე შარდვა დაემართა. გაბრაზებულმა მამამ კი შვილი აიძულა შარდი დაელია.
ბოლო კონფლიქტი მშობლებსა და მოზარდს შორის სახლში მოხდა, თბილისის ერთ-ერთ უბანში საფრანგეთის მოქალაქე ქმარი – მალაიზიელ ცოლთან და 13 წლის შვილთან ერთად ცხოვრობდა. გავრცელებული ინფორმაციით, მამა საქართველოში ბიზნესს საქმიანობას ეწეოდა, მეზობლებმა მომხდარის შესახებ არაფერი იციან, თუმცა შვილის მიმართ ძალადობაში ბრალდებულ ცოლ-ქმარს იცნობენ.
13 წლის გოგო რომ სავარაუდოდ ბიოლოგიური მამის და დედინაცვლის მხრიდან ძალადობის მსხვერპლი იყო, იცოდნენ იმ კერძო სკოლაში, სადაც ბავშვი სწავლობდა, 112-ში შეტყობინებაც სწორედ სასწავლო დაწესებულებიდან შევიდა. “კურიერის” ინფორმაციით, მასწავლებლებმა სამართალდამცველების გამოძახება მას შემდეგ გადაწყვიტეს, რაც ბავშვს გაკვეთილზე ყოფნისას სხეულზე დაზიანებები აღმოუჩინეს.
რა გახდა 13 წლის გოგოსა და მის მშობლებს შორის მომხდარი კონფლიქტის მიზეზი – ამაზე ბრალდებულების ადვოკატმა ისაუბრა. 650 დოლარი – ეს ის თანხაა, რომელიც ინტერესების დამცველის თქმით, არასრულწლოვანმა მამას ბიზნესს ბარათიდან მოუხსნა და ბოლო კონფლიქტის საბაბიც სწორედ ეს იყო. შალვა ხაჭაპურიძის თქმით, დაკავებულების უდანაშაულობის დასამტკიცებლად დაცვის მხარე მტკიცებულებებს აგროვებს და უახლოეს მომავალში სასამართლოში წარადგენს.
ბავშვის სხეულზე ჩატარებული ექსპერტიზის შედეგები, მოწმეების გამოკითხვის ოქმები და თავად დაზარალებული მოზარდის ჩვენება – ბრალდების მხარე მიიჩნევს, რომ ეს უკვე საკმარისი მტკიცებულებებია, რომ დაკავებულ, უცხო ქვეყნის მოქალაქეებს ბრალი დაუმტკიცდეთ და შესაბამისი სასჯელიც მოიხადონ.
ბრალდების მხარის მიერ წარმოდგენილი მტკიცებულებებით იხელმძღვანელა დღეს მოსამართლემ აღკვეთ ღონისძიებაზე მსჯელობისას და შვილის მიმართ განხორციელებული ძალადობის ბრალდებით დაკავებულები, 2-თვიან წინასწარ პატიმრობაში დატოვა, სხდომას საქალაქო სასამართლოში ცოლ-ქმარიც ესწრებოდა.
112-ში შესული შეტყობინების შემდეგ საქმეში სოცმუშაკებიც ჩაერთვნენ, მეურვეების გარეშე დარჩენილი მოზარდი გოგონა ამ ეტაპზე სახელმწიფო ზრუნვის ქვეშ იმყოფება.
ასევე დაგაინტერესებთ👇
🔵როგორ გამოიყურებიან ჯანეტ ქერდიყოშვილი და მისი შვილი ერთნაირ სამოსში (ფოტო)
🔵რატომ ემართება ადამიანს კიბო - ექიმი მარინა ტოტოჩავას განმარტება
წყარო: rustavi2.ge
