ადამიანები ცხოვრებაში, ტრანზიტების სახით, ყველაზე მეტად სატურნსა და მარსს გრძნობენ. ვინაიდან სატურნი კარმის წარმომადგენელია, მასთან დაკავშირებით ის ხდება, რომ მაშინაც კი, თუ გარეგანი ზემოქმედება არ არსებობს, თქვენ მენტალურად მაინც გიჩნდებათ შიში და წუწუნებთ იმ ასტროლოგიურ სახლზე (სექტორზე), სადაც ის გადის.
მაგალითად: სატურნი ტრანზიტით გადის თქვენს მე-2 სახლში.
საგვარეულოს მხრივ არაფერი ხდება, ფულიც სტაბილურად გაქვთ, მაგრამ მაინც გეუფლებათ შიში: „იქნებ მეტი ფული უნდა გამოვიმუშაო? რა იქნება, ესა და ეს რომ მოხდეს და იმ მომენტში ფული არ მქონდეს?“ სინამდვილეში, რასაც სატურნი აქ აკეთებს, არის ის, რომ ამ შიშის თავდაცვითი მექანიზმების წყალობით, საბოლოოდ უფრო მეტ ფულს შემოგატანინებთ.
ეს ნიშნავს, რომ ასე თუ ისე, ადამიანები სატურნს ყველაზე მეტად გრძნობენ.
სატურნს აქვს ტენდენცია, რომ ყველა ის ფსიქოლოგიური პრობლემა, რომელსაც წლების განმავლობაში ვახშობდით და ვაიგნორებდით, უეცრად ზედაპირზე ამოიტანოს; ახლა ეს ყველაფერი ძალიან სერიოზული და კომპლექსური ხდება და ვეღარ უყურებთ ისე მარტივად, როგორც ამ ტრანზიტამდე უყურებდით.
ასევე, ძალიან მკაფიოდ ვგრძნობთ მარსს, რადგან მარსი არის ენერგია, ის წარმოადგენს ჩვენს გადარჩენის ინსტინქტებს. მარსიც და სატურნიც - ორივე ეს პლანეტა „ტამას გუნას“ (ინერციისა და სიბნელის ენერგიას) მიეკუთვნება, ხოლო ტამასი დაკავშირებულია დაცვასთან, დაუცველობის განცდასთან, შიშებთან და ეს სულაც არ ნიშნავს იმას, რომ ადამიანი აუცილებლად ბოროტი ან ზარმაცია.
როდესაც მარსი ტრანზიტობს, ის ააქტიურებს ჩვენს თავდაცვით მექანიზმებსა და სურვილებს. ხშირად ადამიანებს შინაგანად უჩნდებათ განცდა: „ახლა რაღაც უნდა გავაკეთო“. მოქმედების მოთხოვნილება უკიდურესად იზრდება. ეს ნიშნავს, რომ მარსი, როგორც ტრანზიტი, ქმნის სიტუაციას, როდესაც ცხოვრების კონკრეტული ასპექტის გარშემო რაღაც უნდა მოვიმოქმედოთ, რადგან ის უკვე გვაწუხებს და გაჩუმებას აღარ ვაპირებთ.
მაგალითად: მარსი ტრანზიტით გადის მე-7 სახლში (პარტნიორობა). როგორც კი პარტნიორი პროვოკაციაზე წამოგაგებთ, თქვენ მყისიერად რეაგირებთ, მაშინ როცა ადრე, შესაძლოა, მაშინვე არ გეპასუხათ. უცებ გინდებათ კამათი და ბრძოლა, ან პირიქით, გსურთ მეტი დრო გაატაროთ პარტნიორთან, ესაუბროთ მას, დაკავდეთ სექსით და ა.შ. ვინც მარტოხელაა, მას მე-7 სახლში მარსის ტრანზიტისას სასიყვარულო ურთიერთობის დაწყების სურვილი უმძაფრდება.
მარსი თავისი ბუნებით არის ფიზიკური მანიფესტაციებისა და ნამდვილი იდენტობის 1-ელი სახლის მმართველი (ვერძის გამო) და ტრანსფორმაციების მე-8 სახლის მმართველი (მორიელის გამო). სწორედ ამიტომ გრძნობენ ადამიანები ამ ორ ტრანზიტს ყველაზე მეტად, იმაზე მეტადაც კი, ვიდრე მზის ტრანზიტს, მიუხედავად იმისა, რომ მზე თქვენს იდენტობას წარმოადგენს. ხოლო იუპიტერის, რაჰუსა და კეტუს ტრანზიტებმა, შესაძლოა, ზოგჯერ ისე ჩაიარონ, რომ ადამიანის ცხოვრებაში საერთოდ არაფერი გაააქტიურონ.
ახლა კი, როგორ უნდა გაიგოთ თქვენს პირად ნატალურ რუკაში (პლანეტარული პერიოდების მიღმა), რომელ ტრანზიტებს იგრძნობთ უფრო მეტად?
თქვენ ცხოვრებაში გაცილებით მძაფრად იგრძნობთ იმ პლანეტების ტრანზიტებს, რომლებიც ნატალურ რუკაში კონუნქციაში (შეერთებაში) არიან თქვენს ნატალურ მთვარესთან.
მაგალითად: თუ რუკაში გაქვთ კეტუ–მთვარის შეერთება, ახლა კეტუ სადაც არ უნდა გადავიდეს ტრანზიტით, ის თქვენზე მენტალურად უდიდეს გავლენას მოახდენს, რადგან ეს მოცემულობა ნატალურადვე გაქვთ კოდირებული.
თუ კეტუ მე-9 სახლში გადავა, მოულოდნელად გაგიჩნდებათ რაღაცის სწავლის, რელიგიისა და ფილოსოფიის გადაფასების სურვილი, გაგიმძაფრდებათ მოგზაურობის მოთხოვნილება. ხოლო თუ კეტუ მე-7 სახლშია, ამ პერიოდში უცებ სხვა ადამიანები და სასიყვარულო ურთიერთობები ხდება თქვენთვის საინტერესო.
ზოგჯერ კეტუმ შეიძლება კარგი შედეგებიც მოგიტანოთ (მაგალითად მე-2 ან მე-11 ფინანსურ სახლებში) - სწორედ ამ პერიოდში, რადგან მთვარესთან შეერთება გაქვთ, შეიძლება მაქსიმალურად ფოკუსირდეთ ფულზე და მიიღოთ კიდეც შემოსავალი, განსხვავებით იმ სტანდარტული სიტუაციებისგან, როდესაც კეტუს გამო ამა თუ იმ სფეროს მიმართ ინტერესს ვკარგავთ ხოლმე. ეს მიანიშნებს იმაზე, რომ თქვენი გონების ბუნებაა ადამიანებთან გარკვეული კონტაქტების გაწყვეტა და ცხოვრებაში ბევრი რამის კვლევა-ძიება.
თუ რუკაში რაჰუსა და მთვარის შეერთებაა, მაშინ თქვენი გონება ბუნებრივად ობსესიურია (აკვიატებებისკენ მიდრეკილი) და რაჰუ რომელ ასტროლოგიურ სახლშიც არ უნდა შევიდეს, იმ სფეროს მიმართ უცებ გიჩნდებათ აკვიატებული ინტერესი. ასეთი ადამიანები ძალიან მძაფრად გრძნობენ რაჰუს ტრანზიტებს.
თუ ეს არის მთვარისა და იუპიტერის შეერთება, თქვენ მუდმივად ფიქრობთ სწავლაზე, ამიტომ იუპიტერის ტრანზიტს ამ ადამიანებისთვის ყოველთვის მოაქვს რეალური ცოდნა ან რეალური შესაძლებლობები.
თუ ნატალურ რუკაში მთვარე და ვენერაა შეერთებული, მაშინ გაქვთ უფრო დიდი მატერიალური მოთხოვნილებები და ხშირად ეძებთ ყურადღებას. ამ კომბინაციის დროს ტვინი მუდმივად ფიქრობს სასიყვარულო ურთიერთობებზე, მატერიალურ კომფორტზე და იმაზე, თუ რომელი ადამიანი აქცევს მას ყურადღებას; შესაბამისად, ვენერასეული გავლენები გაცილებით ძლიერია.
მოკლედ რომ ვთქვათ: პლანეტებს სურთ, რომ თავიანთი გზავნილი მთვარეს გადასცენ, რადგან მთვარე არის ტვინი, ფსიქიკა. რეალურად, მთვარეა მთავარი - ის არის თქვენი ცხოვრების ყველა კარმის აკუმულაცია. პლანეტარული პერიოდებიც კი მთვარის გარეშე ვერ იანგარიშება, ვინაიდან დაშები (პერიოდები) გამოითვლება იმის მიხედვით, თუ რომელ ნაკშატრაში (ვარსკვლავში) იმყოფებოდა ნატალური მთვარე თქვენი დაბადების მომენტში.
სწორედ ამიტომ ამბობენ ასტროლოგები, რომ ტრანზიტები ცხოვრებაში მხოლოდ შესაძლებლობებს გვაძლევენ, რომელთა გამოყენებაც ჩვენს ნებაზეა, მაშინ როდესაც პლანეტარული პერიოდები, ფიქსირებული კარმაა.
