წიგნის „გონების კოდი“, მედიტაციის საიდუმლო გზა-წარმატებამდე, ავტორი ზეზვა ჯაიანი სოციალურ ქსელში წერს, რომ ცხოვრებაში არაფერი ხდება შემთხვევით. ყოველი მოვლენა, ყოველი შეხვედრა და ყოველი მცირე დეტალიც კი - საკუთარ მიზანს ატარებს
მისი თქმით, როდესაც ცხოვრებაში იშლება რაღაც - ეს ხშირად სასჯელი კი არა, გათავისუფლებაა:
„ცხოვრებაში არაფერი ხდება შემთხვევით.
ხშირად ვფიქრობთ, რომ რაღაცები უბრალოდ ასე მოხდა - შემთხვევით, უცნაურად, ყოველგვარი მიზეზის გარეშე. მაგრამ სულიერი ჭეშმარიტება სხვაგვარია: ამ სამყაროში შემთხვევითობები არ არსებობს.
ყოველი მოვლენა, ყოველი შეხვედრა და ყოველი მცირე დეტალიც კი - საკუთარ მიზანს ატარებს. ზოგჯერ ეს მიზანი იმ წამს არ ჩანს, მაგრამ დრო ყოველთვის აჩვენებს, რატომ იყო საჭირო ის კონკრეტული სიტუაცია.
როდესაც რაღაც გტკივა - ეს გამოცდაა.
გინდა თუ არა, ამ ტკივილში იმალება გაკვეთილი. ტკივილი გაჩვენებს იმას, რაც შენში ჯერ კიდევ სუსტია და გეუბნება: „აი, აქ უნდა გაიზარდო“.
როდესაც ცხოვრებაში იშლება რაღაც - ეს ხშირად სასჯელი კი არა, გათავისუფლებაა.
ზოგჯერ სამყაროს სურს, შეგიცვალოს მიმართულება, მაგრამ შენ ეწინააღმდეგები, რადგან არ გჯერა, რომ უკეთესისკენ მიდიხარ.
როდესაც იღებ რაღაც კარგს - ეს საჩუქარია.
მაგრამ საჩუქრები მხოლოდ მათ ეძლევათ, ვინც გაკვეთილები გულწრფელად გაიარა.
როდესაც რაღაც გაფრთხილებს - მოისმინე.
ინტუიცია, ემოციები, უცნაური ნიშნები - ეს ყველაფერი გზავნილებია. სამყარო არასდროს გელაპარაკება ხმამაღლა, ის გესაუბრება სიმშვიდეში.
ყველაფერი, რაც შენს ცხოვრებაში ხდება - ან გასწავლის, ან გაძლევს, ან გიცავს.
შეიგრძენი ყოველი მოვლენა როგორც გზავნილი, და შენც მიხვდები, რომ ცხოვრება ყოველთვის შენს მხარესაა“, - წერია გავრცელებულ ინფორმაციაში.
ასევე დაგაინტერესებთ:
