ასტროლოგი, ფსიქოლოგი და რამდენიმე წიგნის ავტორი რამაზ გიგაური, სოციალურ ქსელში სხვადასხვა ასტროპროგნოზთან ერთად საზოგადოებას ხშირად უზიარებს სასარგებლო რჩევებს.
იგი ამჯერად ახალ სტატუსს აქვეყნებს, სადაც 2026 წლის ზოგად ასტროლოგიურ პროგნოზს გვაცნობს:
„2026 წლის ასტროლოგიური დახასიათება: „ცეცხლოვანი ცხენის“ წელი:
აღმოსავლური კალენდრის მიხედვით 2026 წელი — ცეცხლის (წითელი) ცხენის წელი იქნება. ის დაიწყება 2026 წლის 17 თებერვალს (თბილისის დროით 16:01 საათზე) და 2027 წლის 5 თებერვლის ჩათვლით გაგრძელდება.
ცხენის წლის ზოგადი ხასიათი: ენერგია, სისწრაფე, თავისუფლება.
ცხენის წლისთვის დამახასიათებელია მოვლენების ელვისებური სისწრაფით განვითარება. ეს სიმბოლურად მოგვაგონებს გაშლილ ველზე გაჭენებულ ველურ ცხენს, რომლის შეჩერებაც შეუძლებელია.
აღმოსავლური ასტროლოგიის მიხედვით, ცხენი ბუნებით თავისუფლების მოყვარული, დამოუკიდებელი, ენერგიული და სოციალურია. ის არის კეთილშობილი, მაგრამ ამავე დროს, იმპულსური, ამიტომაც ყოველთვის ცდილობს იმოქმედოს ემოციურად და არა ცივი გონებით. ცხენი ვერ ეგუება ჩაკეტილ სივრცეს და შეზღუდვებს, მას მუდმივი მოძრაობა და ჰორიზონტების გაფართოება სჭირდება. ის გახსნილი, გულწრფელი და პირდაპირია. არ უყვარს ინტრიგები და როგორც კი ხვდება, რომ „თავისი დრო დადგა“, მოქმედებს დაუყოვნებლივ, ყოველგვარი ყოყმანის გარეშე.
ჩინურ კალენდარში ცხენის სეზონი ზაფხულის შუა პერიოდია, როდესაც მზე ზენიტშია. აქედან გამომდინარე, სწორედ ამ დროს ხდება ისეთი მოვლენები, რომლებიც მაქსიმალურ საჯაროობას და ენერგიის დახარჯვას მოითხოვს.
მითოლოგიაში ცხენი ხშირად მზის ღვთაებების ეტლთან არის დაკავშირებული, რაც მას სინათლის, მაგრამ ასევე მცხუნვარე, დამანგრეველი ძალის სიმბოლოდ აქცევს.
თუ გადავხედავთ XX-XXI საუკუნეებს, აღმოვაჩენთ, რომ ცხენის წელი უმეტესწილად დიდი გარდატეხების, მასშტაბური მიგრაციებისა და კულტურული რევოლუციების წერტილი ხდებოდა.
იაპონური ლეგენდა „ჰინოე უმა“
აღმოსავლურ კულტურაში, განსაკუთრებით იაპონურ ტრადიციაში, ცეცხლოვანი ცხენის წელი, რომელსაც „ჰინოე უმა“ ეწოდება, ლეგენდებით არის მოცული. ითვლება, რომ ეს არის „მებრძოლი სულის“ წელიწადი. ძველი რწმენით, ამ წელს სამყაროს ევლინებიან ადამიანები, რომელთა ენერგიის დამორჩილება ტრადიციული ჩარჩოებით შეუძლებელია. ეს არის სტიქიური ძალა, რომელიც არ ცნობს ავტორიტეტებს. 2026 წელი სწორედ ამ დაუოკებელი, რევოლუციური სულის დაბრუნებას ნიშნავს.
რას უნდა ველოდოთ 2026 წელს?
2026 წელი ასტროლოგიურად ცხენის წელს შეესაბამება. ასევე ცხენის წელი იყო: 1906, 1918, 1930, 1942, 1954, 1966, 1978, 1990, 2002, 2014 წლები.
დამდეგი წლის სტიქია — ცეცხლია და წითელ ფერთან ასოცირდება. ეს წელი ვლინდება „იან“, ანუ მამაკაცური ენერგიით. ცეცხლის სტიქიის სინთეზის შემთხვევაში ეს არის არა კერია ან სანთელი, არამედ მზე, ტყის ხანძარი, ვულკანი. ეს არის ძლიერი, დაუმორჩილებელი ენერგია, რომელიც ყველაფერს მოიცავს.
• ცეცხლის სიჭარბე: ცხენის ნიშნის ფიქსირებული სტიქია ცეცხლია. 2026 წელს წლიური სტიქიაც ცეცხლია. ცეცხლისა და ცეცხლის სინთეზი ქმნის უზარმაზარ ენერგეტიკულ მუხტს. ეს მიანიშნებს, რომ 2026 წელი იქნება უკიდურესად ცხელი, დინამიკური და ფეთქებადსაშიში.
• ტემპი: მოვლენები განვითარდება იმდენად სწრაფად, რომ ადამიანებმა შეიძლება რეაგირებაც ვერ მოასწრონ. ნებისმიერ ეტაპზე საჭირო იქნება ემოციების მართვა, რადგან მოიმატებს კონფლიქტებისა და აგრესიის ალბათობა.
• ეკონომიკა და პოლიტიკა: ჩინური მეტაფიზიკის თვალთახედვით, ცეცხლის სიჭარბე მიანიშნებს, რომ აქტიური იქნება სამხედრო რიტორიკა, ბაზრების მკვეთრი რყევა და ტექნოლოგიური გარღვევები. საჭირო იქნება სწრაფი და თამამი ნაბიჯების გადადგმა.
„წელი ჩრდილების გარეშე“
ჩინური კალენდრის 60-წლიან ციკლში 2026 წელი აღინიშნება სვეტით „ბინ უ“ (Bing Wu). ეს არის უნიკალური კომბინაცია, რომელსაც მეტაფიზიკოსები უწოდებენ „მზეს ზენიტში“. ეს არის შუადღის მცხუნვარე მზე, როდესაც ჩრდილი პრაქტიკულად ქრება. სწორედ ასეთი იქნება 2026 წელიც — წელი ჩრდილების გარეშე.
ეს ნიშნავს აბსოლუტურ გამჭვირვალობას: ვერცერთი საიდუმლო, ვერცერთი ფარული გარიგება და ვერცერთი ტყუილი ვეღარ დაიმალება. ცხენის წელი დღის სინათლეზე გამოიტანს იმას, რაც გველის წელს კულისებში მზადდებოდა.
ვისთვის იქნება წარმატებული?
ამ წელს წარმატებას უპირველესად ვეფხვის, ძაღლისა და თხის (ცხვრის) წელში დაბადებული ადამიანები მიაღწევენ, რადგან მათ შეუძლიათ ცხენის ტემპს აუბან მხარი ან დააბალანსონ ის.
2026 წელს გველის სიბრძნეს, სიფრთხილესა და ფარულ მოქმედებებს ჩაანაცვლებს ცხენის გულწრფელობა, პირდაპირობა, დამოუკიდებლობა და დაუოკებელი ენერგია.
დასკვნა:
ეს წელი უზარმაზარ დადებით პოტენციალს ატარებს. ეს არის „სასიცოცხლო ძალა“, ოპტიმიზმი, რომელიც ადამიანებს აძლევს რწმენას, რომ შეუძლებელი არაფერია. სიმბოლურად ეს წააგავს მუსტანგზე ამხედრებასა და ჯირითს – თუ შეძლებთ მის დამორჩილებას, ის მიგიყვანთ იქ, სადაც ფეხით ვერასდროს მიხვიდოდით“, - წერს რამაზ გიგაური.
ასევე დაგაინტერესებთ:
⭕„ქრისტე იშვას ჩვენს გულებსა და გონებაში! ყველა კეთილი სურვილი აგვიხდინოს უფალმა“ - ქეთევან ჯანდიერი
