აშშ-ის ვიცე-პრეზიდენტი ჯეი დი ვენსი და მისი მეუღლე, უშა ვენსი, მეოთხე შვილის მშობლები გახდნენ. წყვილს ბიჭი შეეძინა.
ახალშობილს ალეკ ნილ ვენსი დაარქვეს. ოჯახმა სასიხარულო სიახლე სოციალურ ქსელში გაავრცელა და აღნიშნა, რომ დედაც და პატარაც თავს მშვენივრად გრძნობენ.
„ჩვენ უზომოდ ბედნიერები ვართ, რომ ჩვენს ოჯახს პატარა ალეკი შეემატა. უფროსი და-ძმა მას მოუთმენლად ელოდა“, - აღნიშნულია ოჯახის ოფიციალურ განცხადებაში.
ალეკს სახლში სამი უფროსი და-ძმა ელოდება: იუენი, ვივეკი და მირაბელი.
ეს მოვლენა ამერიკის შეერთებული შტატების თანამედროვე ისტორიაში იშვიათი პრეცედენტია. ეს არის პირველი შემთხვევა ბოლო 150 წელზე მეტი ხნის განმავლობაში, როდესაც მოქმედ აშშ-ის ვიცე-პრეზიდენტს თანამდებობაზე ყოფნისას შვილი შეეძინა.
ბოლო ასეთი შემთხვევა 1870 წელს მოხდა, როდესაც ვიცე-პრეზიდენტ სკაილერ კოლფაქსს, პრეზიდენტ ულის გრანტის ადმინისტრაციაში უფლებამოსილების ვადაში ვაჟი შეეძინა.
ჯეი დი ვენსის მეუღლე, უშა ვენსი წარმატებული იურისტია. დაამთავრა იელის უნივერსიტეტის სამართლის სკოლა და კემბრიჯის უნივერსიტეტი. მუშაობდა აშშ-ის უზენაესი სასამართლოს მოსამართლეების (მათ შორის, ჯონ რობერტსის) თანაშემწედ და ერთ-ერთ წამყვან იურიდიულ ფირმაში. დაიბადა და გაიზარდა სან-დიეგოში (კალიფორნია), ინდოელი ემიგრანტების ოჯახში.
როგორ გაიცნეს ერთმანეთი
ჯეი დი და უშა ერთმანეთს 2013 წელს, იელის უნივერსიტეტში სწავლისას შეხვდნენ. ისინი 2014 წელს დაქორწინდნენ.
იგი აშშ-ის ისტორიაში პირველი ინდური წარმოშობისა და ინდუისტი „მეორე ლედია“. ცნობისთვის, „პირველი ლედი“ გახლავთ, პრეზიდენტის მეუღლე, „მეორე ლედი“ ვიცე-პრეზიდენტის ცოლი.
