მონტენეგროში (ჩერნოგორია) მომხდარმა ერთმა უცნაურმა და კურიოზულმა შემთხვევამ სოციალურ ქსელებში დიდი გამოხმაურება გამოიწვია - ტურისტმა პენსიონერმა, რომელსაც ადგილობრივ საცხობში მხოლოდ თითო ფინჯანი ყავა და ორი ნამცხვარი უნდა შეეძინა, შეცდომით 1,700 ევროს ოდენობის „ჩაი“ იგივე თიფსი დატოვა.
რა მოხდა რეალურად?
მოხუცმა ქალბატონმა, რომელიც მონტენეგროში საკრუიზო ლაინერით მოგზაურობდა, ქალაქ კოტორის ერთ-ერთ პატარა საცხობში შეიარა. შეკვეთის ღირებულება სულ რაღაც 17.20 ევრო შეადგენდა.
როდესაც სტუმარმა საბანკო ბარათით გადახდა დააპირა, ტერმინალზე შეყვანილ თანხას ყურადღება არ მიაქცია. როგორც ჩანს, საცხობის თანამშრომელს ტერმინალში თანხის აკრეფისას შეცდომა მოუვიდა - 17.20 ევროს ნაცვლად, სისტემაში 1,720 ევრო ჩაწერა. პენსიონერმა ქალბატონმა პინ-კოდი ისე აკრიფა და გადახდა დაადასტურა, რომ ეკრანზე გამოსახული ციფრები არ შეუმჩნევია.
როგორ აღმოაჩინეს შეცდომა?
მომხდარი მხოლოდ მას შემდეგ გახდა ცნობილი, რაც საცხობის მფლობელმა დღის ბოლოს ფინანსური ანგარიშგება და ტერმინალის ამონაწერი შეამოწმა. უზარმაზარი სხვაობის დანახვისას, ობიექტის მეპატრონემ მაშინვე გააცნობიერა, რომ საქმე შეცდომასთან ჰქონდა.
საცხობის მფლობელმა დაუყოვნებლივ მიმართა ადგილობრივ პოლიციასა და ტურიზმის საინფორმაციო ცენტრს, რათა ტურისტი ეპოვათ. ვინაიდან საკრუიზო გემი კოტორის პორტიდან უკვე გასული იყო, პოლიცია გემის ადმინისტრაციას დაუკავშირდა.
შედეგად, მოგზაურს საკრუიზო ხომალდზე მიაგნეს, შეცდომის შესახებ შეატყობინეს და ზედმეტად ჩამოჭრილი 1,700 ევრო სრულად დაუბრუნეს.
ადგილობრივმა მედიამ და ტურიზმის სექტორმა საცხობის მფლობელის პატიოსნება და სწრაფი რეაგირება განსაკუთრებით შეაქო, რაც მონტენეგროს სტუმართმოყვარეობის მშვენიერ მაგალითად შეფასდა.
