სანამ ბავშვი სკოლაში წავა, არის ერთი ძალიან მნიშვნელოვანი რამ, რაც მას უნდა ვასწავლოთ:
ყველა ბავშვი განსხვავებულია და ეს ნორმალურია.
სკოლაში ის შეხვდება ბევრ ბავშვს. ზოგი მასზე სწრაფად კითხულობს, ზოგი უკეთ ხატავს, ზოგი უფრო მარტივად იძენს მეგობრებს, ზოგს კი მეტი დრო სჭირდება.
ზოგი ბავშვი ბევრს ლაპარაკობს, ზოგი მშვიდია.
ზოგს უყვარს ხმაურიანი თამაშები, ზოგს მშვიდად ყოფნა.
ზოგი დავალებას სწრაფად ასრულებს, ზოგს მეტი დრო სჭირდება.
ზოგს რაღაცები ძალიან მარტივად გამოსდის, ზოგისთვის კი იგივე რამ უფრო რთულია და არცერთი ამ განსხვავებიდან არ ხდის ბავშვს სხვაზე უკეთესს ან უარესს.
ბავშვმა უნდა იცოდეს, რომ თუ სხვა ბავშვი მასზე რაღაცას უკეთ აკეთებს, ეს არ ნიშნავს, რომ თვითონ ნაკლებია და თუ მას რაღაც უკეთ გამოსდის, ეს არც იმას ნიშნავს, რომ სხვაზე უკეთესი ადამიანია.
მან უნდა იცოდეს, რომ ყველას აქვს თავისი ძლიერი მხარეები და სირთულეები.
ზოგჯერ ბავშვები შეიძლება ერთმანეთისგან განსხვავებულები იყვნენ გარეგნობით, ინტერესებით, ქცევით, სწავლის სტილით, კომუნიკაციით ან იმით, თუ როგორ გამოხატავენ საკუთარ ემოციებს.
ეს განსხვავებები არ უნდა გახდეს დაცინვის, გარიყვის ან დამცირების მიზეზი.
პირიქით ბავშვმა უნდა ისწავლოს: „ის ჩემგან განსხვავებულია და ეს ნორმალურია“.
და ასევე: „მე მისგან განსხვავებული ვარ და ესეც ნორმალურია“.
სკოლაში ბავშვს შეიძლება შეხვდეს თანატოლი, რომელსაც რაღაც უჭირს და მეტი დახმარება სჭირდება.
მნიშვნელოვანია იცოდეს, რომ განსხვავებული ადამიანი არ არის „უცნაური“.
არ არის საჭირო ყველას ჰგავდე იმისთვის, რომ მიგიღონ.
არ არის საჭირო იყო ყველაზე სწრაფი, ყველაზე ჭკვიანი, ყველაზე ხმამაღალი ან ყველაზე წარმატებული.
შენ შეგიძლია იყო უბრალოდ შენ და ალბათ ეს არის ერთ-ერთი ყველაზე მნიშვნელოვანი რამ, რაც ბავშვმა სკოლაში წასვლამდე უნდა იცოდეს: ჩვენ ყველა განსხვავებულები ვართ.
ჩვენ ყველას გვაქვს ძლიერი და სუსტი მხარეები და განსხვავებულობა სრულიად ნორმალურია.
თუ ამას ბავშვი პატარა ასაკიდან ისწავლის, სკოლაში ის მხოლოდ ცოდნით კი არა, სხვა ადამიანების მიღებისა და საკუთარი თავის დაფასების უნარითაც მივა.
ასევე დაგაინტერესებთ:
⭕საჯარო სკოლების პირველკლასელთა სასკოლო ფორმების რეალიზაციის პროცესი დაიწყო
