ზაფხულის ცხელ დღეებში ავტომობილის სალონში ტემპერატურა რამდენიმე წუთში შეიძლება 50–70°C-მდეც კი გაიზარდოს. ასეთ პირობებში ბევრი საკვები პროდუქტი სწრაფად კარგავს ხარისხს, გემოსა და უსაფრთხოებას, რაც საკვებით მოწამვლის რისკს მნიშვნელოვნად ზრდის.
სპეციალისტები გვირჩევენ, რომ ცხელ ამინდში ავტომობილში განსაკუთრებით არ დავტოვოთ შემდეგი პროდუქტები:
რძისა და რძის პროდუქტები – რძე, იოგურტი, კეფირი, არაჟანი და ყველი მაღალი ტემპერატურის პირობებში სწრაფად ფუჭდება. მათი მოხმარება ჯანმრთელობისთვის საფრთხის შემცველი შეიძლება გახდეს.
ხორცი და ხორცპროდუქტები – უმი ან მზა ხორცი, ძეხვეული, ლორი, ქათმის პროდუქტები და ზღვის პროდუქტები განსაკუთრებულად მგრძნობიარეა სიცხის მიმართ. მათში ბაქტერიები სწრაფად მრავლდება, რაც საკვებით მოწამვლის ერთ-ერთი მთავარი მიზეზია.
კვერცხი და კვერცხის შემცველი საკვები – მაიონეზიანი სალათები, სენდვიჩები და სხვა მსგავსი პროდუქტები მაღალი ტემპერატურის პირობებში უსაფრთხო აღარ არის.
შოკოლადი და ტკბილეული – მიუხედავად იმისა, რომ ჯანმრთელობისთვის საფრთხეს ყოველთვის არ წარმოადგენს, სიცხეში შოკოლადი დნება, იცვლის სტრუქტურასა და გემოს, რის გამოც მისი ხარისხი უარესდება.
ხილი და ბოსტნეული – ბანანი, კენკრა, ატამი, ყურძენი და სხვა ნაზი ხილი სიცხეში სწრაფად ფუჭდება, კარგავს სასარგებლო თვისებებს და შესაძლოა დუღილიც დაიწყოს.
გაზიანი სასმელები და კონსერვები – მაღალი ტემპერატურის ზემოქმედებით გაზიან სასმელში წნევა იზრდება, რის გამოც ქილა ან ბოთლი შესაძლოა დაზიანდეს. კონსერვებიც არ უნდა ინახებოდეს გადახურებულ ავტომობილში, რადგან მაღალმა ტემპერატურამ მათი ხარისხი შეიძლება გააუარესოს.
როგორ შევინახოთ საკვები უსაფრთხოდ?
თუ საკვების გადატანა აუცილებელია, უმჯობესია გამოიყენოთ თერმოჩანთა ან სპეციალური მაცივრის ჩანთა, სადაც სიცივე უფრო დიდხანს ნარჩუნდება. მალფუჭებადი პროდუქტები კი ავტომობილში მხოლოდ აუცილებელი დროით უნდა დარჩეს და შესაძლებლობისთანავე მაცივარში გადაიტანოთ.
ექიმები კიდევ ერთხელ შეგვახსენებენ, რომ საკვებით მოწამვლის თავიდან აცილების საუკეთესო გზა მალფუჭებადი პროდუქტების სწორ ტემპერატურაზე შენახვაა. თუ საკვებს უცნაური სუნი, ფერი ან გემო აქვს, მისი მიღება არ არის რეკომენდებული, რადგან ჯანმრთელობის რისკი გაცილებით დიდია, ვიდრე ერთი შეხედვით შეიძლება ჩანდეს.
⭕ ასევე დაგაინტერესებთ:
⭕ „აძლიერებს იღბალს“ - აგვისტოს ჯადოსნური კოდები თაკო მელიქიშვილისგან
🎥 „შეგიძლია ძველი გენები წაშალოთ...“ - რას ამბობს არუნ ხათრი
