სპორტული პრესის საერთაშორისო ასოციაციამ AIPS გამოაქვეყნა საქართველოს დამსახურებული ჟურნალისტის თენგიზ პაჭკორიას სტატია 16 წლის თორნიკე კვარაცხელიას და თბილისის „დინამოს“ შესახებ, რომელსაც „დაიჯესტი“ უცვლელად გთავაზობთ:
თბილისი, 2026 წელი – ფრანგული „პსჟ-ის“ 25 წლის ვარსკვლავისა და საქართველოს ეროვნული ნაკრების ფეხბურთელის, ხვიჩა კვარაცხელიას სახელი მთელ მსოფლიოშია ცნობილი. მისმა გამორჩეულმა ტექნიკამ, სანახაობრივმა სათამაშო სტილმა და შთამბეჭდავმა ასპარეზობამ მილიონობით გულშემატკივრის აღფრთოვანება დაიმსახურა. თუმცა, ახლა ფეხბურთის ექსპერტებისა და ქომაგების ყურადღება სულ უფრო მეტად გადადის მის უმცროს ძმაზე - 16 წლის თორნიკე კვარაცხელიაზე, რომელიც თბილისის „დინამოსა“ და საქართველოს 17-წლამდელთა ნაკრების ნახევარმცველია.
ბოლო რამდენიმე წლის განმავლობაში თორნიკემ განვითარების ყველა ეტაპზე დატოვა შთაბეჭდილება. მან თავი გამოიჩინა თბილისის „დინამოს“ აკადემიაში, რის შემდეგაც კლუბის 16 და 17-წლამდელთა გუნდები, ასევე საქართველოს ასაკობრივი ნაკრებები U-16, U-17 გაიარა. ახლა კი დადგა დრო, რომ მან ნაბიჯი გადადგას დიდ ფეხბურთში საქართველოს ყველაზე წარმატებულ და ტიტულოვან კლუბთან, თბილისის „დინამოსთან“ ერთად. კლუბის ახალმა მთავარმა მწვრთნელმა, თემურ ქეცბაიამ, რომელიც ამ თანამდებობაზე 2026 წლის აპრილის ბოლოს დაინიშნა, თავის წარდგენის პრესკონფერენციაზე განაცხადა, რომ თორნიკეს შანსი პირველ გუნდში მალე მიეცემოდა.
ჩემს მიერ დასმულ შეკითხვაზე მოზარდის ძირითად შემადგენლობაში დებიუტის შანსებთან დაკავშირებით, ქეცბაიამ აღნიშნა:
„თორნიკე კვარაცხელია ძალიან ნიჭიერი ფეხბურთელია. კარგად ვიცნობ მის შესაძლებლობებს და მჯერა, რომ ის მალე გახდება „დინამოს“ პირველი გუნდის ნაწილი. ფეხბურთელის ასაკი გადამწყვეტი ფაქტორი არ არის - ყველაზე მნიშვნელოვანია, არის თუ არა ის ფიზიკურად და ფსიქოლოგიურად მზად ასპარეზობისთვის. თორნიკეს ნამდვილად აქვს წარმატების პოტენციალი“.
გუნდური ასპარეზობა
თორნიკეს დებიუტი საქართველოს ჩემპიონატში თბილისის „დინამოს“ რიგებში 16 მაისს, „იბერია 1999“-ის წინააღმდეგ შედგა. მას შემდეგ მან ეროვნულ ლიგაში რამდენიმე მატჩი ჩაატარა. მისი ევროპული დებიუტი კი 16 ივლისს შედგა, როდესაც „დინამომ“ უეფას კონფერენს ლიგის პირველი საკვალიფიკაციო ეტაპის საპასუხო მატჩში ლუქსემბურგის „მონდორფს“ უმასპინძლა. პირველი შეხვედრა, რომელიც 9 ივლისს ლუქსემბურგში გაიმართა, „დინამოს“ გამარჯვებით (2:1) დასრულდა. მიუხედავად იმისა, რომ თორნიკე განაცხადში იყო, მას მოედანზე არ უთამაშია. თბილისურ საპასუხო მატჩში ქეცბაიამ 16 წლის ფეხბურთელი მოედანზე მეორე ტაიმის დაწყებისთანავე შეიყვანა. თორნიკემ „დინამოს“ შეტევებს მყისიერად შემატა ახალი ენერგია. მისმა დაჯერებულმა დრიბლინგმა, ჭკვიანურმა მანევრებმა, მწვავე რეიდებმა და ზუსტმა გადაცემებმა არაერთხელ შექმნა პრობლემები ლუქსემბურგელთა დაცვისთვის და ადგილობრივი პუბლიკაც აღაფრთოვანა - მან ტრიბუნებიდან მხურვალე აპლოდისმენტები დაიმსახურა. მატჩი 1:1 დასრულდა, რამაც თბილისის „დინამოს“ კონფერენს ლიგის შემდეგ ეტაპზე გასვლა უზრუნველყო.
ტრიბუნებიდან თამაშს ადევნებდნენ თვალს ბადრი კვარაცხელია და მაკა ლუკავა - ხვიჩასა და თორნიკეს მშობლები. აღსანიშნავია, რომ თვითონ ბადრისაც წარმატებული საფეხბურთო კარიერა ჰქონდა. 1984-დან 1997 წლამდე ის რამდენიმე ქართულ კლუბში თამაშობდა, მათ შორის თბილისის „დინამოშიც“ (1992–1993 წლების სეზონში). მოგვიანებით, 1997-დან 2004 წლამდე, მან კარიერა აზერბაიჯანში განაგრძო („ქაფაზი“ 1997–1998, „შამქორი“ 1998–2004). მან „დინამოსთან“ ერთად 1993 წელს საქართველოს ჩემპიონატი მოიგო, ხოლო „შამქორის“ შემადგენლობაში აზერბაიჯანის ოქროს მედლებს სამჯერ დაეუფლა. კარიერის დასრულების შემდეგ ბადრი მწვრთნელად მუშაობდა როგორც აზერბაიჯანში, ისე საქართველოში, სანამ მეუღლესთან ერთად თბილისში სამი ვაჟის აღზრდას მიუძღვნიდა თავს. მათ უფროს ვაჟს, ნიკას, ასევე ჰქონდა საფეხბურთო კარიერა, თუმცა ტრავმის გამო იძულებული გახდა ფეხბურთიდან წასულიყო. ხვიჩა მსოფლიოს ერთ-ერთი წამყვანი ფეხბურთელი გახდა, ახლა კი თორნიკეს ჯერია, დაიწყოს საკუთარი ისტორიის წერა.
ბადრი კვარაცხელია თორნიკეს შესახებ
რამდენიმე წლის წინ ბადრი კვარაცხელიამ მითხრა: რომ მის უმცროს ვაჟს აქვს პოტენციალი გახდეს „უმაღლესი კლასის ფეხბურთელი“.
როდესაც ვკითხე, შეიძლებოდა თუ არა თორნიკე ხვიჩაზე მეტადაც ყოფილიყო დაჯილდოებული ნიჭით, ბადრიმ მიპასუხა: „ოჰ, არ ვიცი. მათ მომავალზე მოქმედებს ის, თუ რამდენად ბევრს იშრომებენ“.
შემდეგ მან გაიხსენა დასამახსოვრებელი ოჯახური ეპიზოდი:
„როდესაც თორნიკე ათი წლის იყო, მან ხვიჩას უთხრა: „ძმაო, ვამაყობ ყველაფრით, რასაც მიაღწიე და კიდევ უფრო დიდ წარმატებებს გისურვებ, მაგრამ გახსოვდეს, ერთ დღეს მე შენზე უკეთესადაც კი ვითამაშებ“. ხვიჩამ ეს სიტყვები დააფასა და უმცროსი ძმა თბილად წაახალისა“.
საქართველოს ეროვნული ნაკრების ბევრი გულშემატკივარი თვლის, რომ თუ თორნიკე ასეთივე შთამბეჭდავი ტემპით განაგრძობს განვითარებას, ის უახლოეს 1-2 წელიწადში მიიღებს პირველ ეროვნულ გამოძახებას და გააძლიერებს ნაკრებს, რომლის კაპიტანიც მისი უფროსი ძმა, ხვიჩა კვარაცხელიაა.
