ინდოელი სულიერი მასწავლებელი და იოგი სადჰგურუ მიიჩნევს, რომ ადამიანის ტანჯვის, სტრესისა და შფოთვის მნიშვნელოვანი მიზეზი საკუთარი გონების არასწორი მუშაობაა. მისი განმარტებით, ადამიანებმა უნდა ისწავლონ, როგორ აქციონ სხეული, გონება და ემოციები საკუთარ მოკავშირეებად და არა წინააღმდეგობის წყაროდ.
ამის შესახებ სადჰგურუმ მალაიზიურ გამოცემა The Star-თან ინტერვიუში ისაუბრა, სადაც მოზარდების ფსიქიკურ ჯანმრთელობას, სოციალური მედიის გავლენას, ოჯახურ გარემოს, მედიტაციასა და შინაგანი ბედნიერების მიღწევის გზებს შეეხო.
ინტერვიუ 2026 წლის 3 ნოემბერს გამოქვეყნდა.
სადჰგურუს თქმით, თანამედროვე საზოგადოებაში მოზარდების ფსიქიკური ჯანმრთელობის პრობლემების ზრდა მხოლოდ სოციალური მედიის გავლენით არ უნდა აიხსნას. მისი აზრით, ერთ-ერთი მნიშვნელოვანი საკითხი ემოციური უსაფრთხოების ნაკლებობაა.
„ყველა ცდილობს, ეს პრობლემები სოციალურ მედიას დააბრალოს, მაგრამ ყველაფერი დამოკიდებულია იმაზე, თუ როგორ იყენებ ტექნოლოგიას. ზოგი მას საკუთარი კეთილდღეობისთვის იყენებს, ზოგი კი საკუთარ თავს ზიანს აყენებს. სოციალური მედია შესაძლოა გარკვეულ პრობლემებს აჩქარებდეს, უფრო თვალსაჩინოს ხდიდეს ან გამოავლენდეს, მაგრამ, რაც უფრო მნიშვნელოვანია, საზოგადოებაში ემოციური უსაფრთხოების ნაკლებობაა“, – ამბობს სადჰგურუ.
„ბავშვის აღზრდაში მშობლების გავლენა მცირდება“
სადჰგურუ განსაკუთრებულ ყურადღებას ამახვილებს ბავშვების აღზრდასა და ოჯახურ გარემოზე. მისი შეფასებით, შეიცვალა ის გარემო, რომელშიც ბავშვები იზრდებიან და ვითარდებიან.
„ბავშვების უმეტესობის შემთხვევაში გავლენის 70% მშობლებსა და ნათესავებზე მოდის, 30% კი სკოლაზე, მეგობრებზე, ახალ ამბებსა და სხვა გარემოებებზე. დღეს 12 წლის ბავშვზე მშობლების გავლენა მხოლოდ 20%-ია, სკოლის – დაახლოებით 20% ან ნაკლები, დანარჩენზე კი ძირითადად ისინი ახდენენ გავლენას, ვისაც ბავშვზე რეალურად არ შესტკივა გული. უცნაური სამყაროა, სადაც ბავშვს სოციალური მედია და ხელოვნური ინტელექტის ალგორითმები ზრდის“, – აღნიშნავს ის.
სულიერი მასწავლებელი მიიჩნევს, რომ ბავშვის სტაბილური განვითარებისთვის ორივე მშობლის მონაწილეობას მნიშვნელოვანი ადგილი უკავია.
მისი თქმით, ქალისა და კაცის ურთიერთობა დაპირისპირებაზე კი არა, ურთიერთშევსებაზე უნდა იყოს დაფუძნებული.
„ქალი და კაცი ორი სხვადასხვა სახეობა არ არის. ისინი ერთი სახეობის წარმომადგენლები არიან, რომლებიც ერთმანეთს ავსებენ და არა ერთმანეთის საპირისპირო მხარეებს წარმოადგენენ, როგორც ამას ხშირად წარმოაჩენენ“, – ამბობს სადჰგურუ.
ინტერვიუს ერთ-ერთი მთავარი თემა ადამიანის შინაგანი მდგომარეობა და საკუთარ გონებასთან ურთიერთობაა.
სადჰგურუ განმარტავს, რომ ფიქრი და ნერვიულობა ერთმანეთისგან უნდა განვასხვაოთ.
„ფიქრი ნიშნავს ისეთი რამის შექმნას, რაც ჯერ არ არსებობს, ნერვიულობა კი თქვენი აზროვნების მექანიზმის რღვევაა“, – ამბობს ის.
მისი განმარტებით, როდესაც ადამიანს გარკვეული ინფორმაცია აქვს, მაგრამ სრული სურათი არ გააჩნია, ფიქრი ამ სურათის შექმნაში ეხმარება. თუმცა, თუ ადამიანი მუდმივად ერთსა და იმავე საკითხზე ნერვიულობს, ეს შინაგან დაძაბულობას წარმოშობს.
სადჰგურუს თქმით, ადამიანები ხშირად ფიქრობენ, რომ ბედნიერებას მაშინ მიაღწევენ, როდესაც გარე სამყაროში არსებულ პრობლემებს მოაგვარებენ, თუმცა ავიწყდებათ საკუთარი შინაგანი მდგომარეობა.
„ყველა ტანჯვა, რომელსაც განიცდით, არსებითად თქვენი ინტელექტის თქვენივე წინააღმდეგ მუშაობის შედეგია – დაარქვით ამას სტრესი, შფოთვა თუ სხვა რამ. ამიტომ ისე უნდა ჩამოაყალიბოთ საკუთარი თავი, რომ სხეული, გონება და ემოციები თქვენს სასარგებლოდ მუშაობდეს და არა თქვენს წინააღმდეგ“, – აღნიშნავს ის.
სადჰგურუ ასევე განასხვავებს სიამოვნებასა და შინაგან ნეტარებას. მისი განმარტებით, სიამოვნება ყოველთვის გარე სტიმულებზე, ადამიანებსა და გარემოებებზეა დამოკიდებული, ამიტომ მისი შენარჩუნება შეუძლებელია.
ნეტარება კი, მისი ხედვით, ადამიანის შინაგანი მდგომარეობაა, რომელიც გარე წარმატებასა თუ წარუმატებლობაზე არ უნდა იყოს დამოკიდებული.
„ნამდვილი მედიტაცია ქმნის მცირე, გაცნობიერებულ დისტანციას იმას შორის, ვინც ხართ, თქვენს ფიზიკურ სხეულსა და დაგროვილ აზრებს შორის. ეს განცალკევება ტანჯვას ამთავრებს და საშუალებას გაძლევთ, სამყაროსთან ურთიერთობა ისე გააგრძელოთ, რომ მისმა მოვლენებმა არ დაგთრგუნოთ“, – ამბობს სადჰგურუ.
⭕ ასევე დაგაინტერესებთ:
⭕აუცილებელი ინფორმაცია, რომელიც გათბობის ჩართვამდე უნდა იცოდეთ!
