მამაკაცთა შორის ფეხბურთში წლის მთავარი ინდივიდუალური ჯილდოს, France Football-ის „ოქროს ბურთის“ გამარჯვებული „პარი სენ-ჟერმენის“ ფრანგი თავდამსხმელი უსმან დემბელე გახდა. მეორე ადგილი „ბარსელონას“ ესპანელმა შემტევმა, ლამინ იამალმა დაიკავა.
28 წლის ფეხბურთელმა „პარი სენ-ჟერმენთან“ ერთად „ოქროს ბურთის“ საანგარიშო პერიოდში საფრანგეთის ჩემპიონატი, ჩემპიონთა ლიგა, საფრანგეთის თასი და საფრანგეთის სუპერთასი მოიგო. ყველა ტურნირზე ჩატარებულ 53 შეხვედრაში მან 35 გოლი გაიტანა. აღსანიშნავია, რომ აქამდე იგი არასდროს ყოფილა ნომინირებული „ოქროს ბურთისთვის“ მებრძოლ 30 ფეხბურთელს შორის.
დემბელე გახდა მეექვსე ფრანგი, რომელმაც წლის საუკეთესო მოთამაშის ჯილდო მიიღო – აქამდე ტიტულს რაიმონ კოპა, ჟან-პიერ პაპენი, მიშელ პლატინი, ზინედინ ზიდანი და კარიმ ბენზემა დაეუფლნენ.
მეოთხედ ისტორიაში პრიზი გათამაშდა სეზონის (2024 წლის 1 აგვისტოდან 2025 წლის 13 ივლისის პერიოდი) და არა კალენდარული წლის შედეგების მიხედვით. ხმის მიცემაში მონაწილეობა მიიღეს ფიფას რეიტინგის ასეულში მყოფი ქვეყნების სპორტულმა ჟურნალისტებმა.
2025 წლის „ოქროს ბურთის“ ათეული ასე გამოიყურება:
უსმან დემბელე (პსჟ, საფრანგეთი)
ლამინ იამალი („ბარსელონა“, ესპანეთი)
ვიტინია (პსჟ, პორტუგალია)
მოჰამედ სალაჰი („ლივერპული“, ეგვიპტე)
რაფინია („ბარსელონა“, ბრაზილია)
აშრაფ ჰაკიმი (პსჟ, მაროკო)
კილიან მბაპე („რეალი“, საფრანგეთი)
კოულ პალმერი („ჩელსი“, ინგლისი)
ჯანლუიჯი დონარუმა (პსჟ, „მან.სიტი“, იტალია)
ნუნუ მენდეში (პსჟ, პორტუგალია)
გათამაშების ორგანიზატორმა, France Football-მა ასევე გამოავლინა წლის საუკეთესო ქალი ფეხბურთელიც. ზედიზედ მესამედ ეს ჯილდო „ბარსელონასა“ და ესპანეთის ნაკრების ერთ-ერთ ლიდერს, აიტანა ბონმატის ერგო.
⭕ ასევე დაგაინტერესებთ:
📸 როგორ გამოიყურებოდა ჯანეტ ქერდიყოშვილი „თბილისობა 2025“-ზე
⭕როგორი ამინდია მოსალოდნელი დღეს საქართველოში - პროგნოზი ქალაქების მიხედვით
წყარო: 1tv.ge
