ლისაბონის „სპორტინგში“, ახალი სეზონიდან საქართველოს ნაკრების ნახევარმცველი გიორგი ქოჩორაშვილი ითამაშებს.
„ლევანტეს“ ოფიციალური გვერდის ცნობით, პორტუგალიურ „სპორტინგთან“ გიორგი ქოჩორაშვილის ტრანსფერზე შეთანხმება მიღწეულია. ქართველი ფეხბურთელი „ლევანტეში“ 30 ივნისამდე იჯარით დარჩება.
გიორგი ქოჩორაშვილს ახალ კლუბში გადასვლას ინფორმაციულ პოსტს უძღვნის სპორტული გვერდი Geo Team-ი, რომელიც საქართველოს ეროვნული საფეხბურთო ნაკრების გვერდით აქტიურად იმყოფება და სიახლეებთან ერთად ფეხბურთელების სახალისო ვიდეოებს გვიზიარებს:
„გიორგი ქოჩორაშვილმა ფეხბურთზე სიარული 5 წლის ასაკში გურჯაანში, ადგილობრივ საფეხბურთო კლუბში დაიწყო.
შემდეგ იყო საბურთალო, ოლიმპი, დინამო თბილისი და კვლავ საბურთალო.
2017 წელს 19 წლამდე ნაკრებთან ერთად ევროპის ჩემპიონატზე ითამაშა, ამავე ზაფხულში კი საბურთალო არასასურველი სათამაშო დროის გამო დატოვა და ესპანურ „ხირონაში“ გადავიდა, საიდანაც დაიწყო მთავარი.
მალევე ისწავლა ესპანური ენა, რადგან თვლიდა, რომ ამის გარეშე გარემოსთან ადაპტირება შეუძლებელი იქნებოდა, 2018 წელს „ხირონადან“ იჯარით „პერელადაში“ გადავიდა, ერთ წელში კი „ლევანტეს“ შეუერთდა.
2019 წელს ქოჩორა ხდება „ლევანტეს“ ფეხბურთელი და ზუსტად 4 წელი ელოდება მის შანსს, რომ გახდეს ძირითადი გუნდის შეუცვლელი ფეხბურთელი. მიუხედავად ამ პერიოდში უამრავი იმედგაცრუებისა, მას არ უფიქრია ესპანეთიდან წასვლა, რადგან სჯეროდა, რომ მისი სიტყვა ჯერ „ლევანტეში“ ჰქონდა სათქმელი.
იყო ცრუ იმედები, მთავარ გუნდში სათასო მატჩებში სათამაშო დრო, სამატჩო განაცხადში შეყვანა რამდენჯერმე, თუმცა გიორგის შანსი კვლავ არ ეძლეოდა.
2022 წლის ზაფხულში იჯარით მე-3 დივიზიონის გუნდს, „კასტელონს“ შეუერთდა, სადაც ბრწყინვალე სეზონის შემდეგ „ლევანტეში“ დაბრუნდა.
2023 წლის ზაფხულში, 4-წლიანი ლოდინის ქოჩორამ „ლევანტეს“ მთავარ გუნდში შანსი კლუბის სეგუნდა დივიზიონში ჩასვლის შემდეგ მიიღო.
2023 წლის სექტემბერში გიორგი პირველად გამოიძახეს საქართველოს ეროვნულ ნაკრებში და მალევე, გუნდის შეუცვლელი ფეხბურთელი გახდა.
დებიუტზე ეროვნულ გუნდში 24 წლის ასაკში: „ალბათ, ასე იყო საჭირო. მე ამ დღისთვის დიდი ხანი ვემზადებოდი”.
2024 წლის მარტში გიორგი ქოჩორაშვილმა საბერძნეთთან პენალტების სერიაში პირველმა აიღო ბურთი, რის გამოც ვილი სანიოლის შექებაც დაიმსახურა. ბურთი ბადეში საოცრად გაახვია და ნაკრებს დიდი ბიძგი მისცა, ზღაპრის ბოლო კეთილი გაეხადა.
შემდეგ იყო ზღაპრული ევროპის ჩემპიონატი 2024 წლის ზაფხულში.
2025 წლის 31 მარტს, ლისაბონის „სპორტინგის“ დაჩქარებული მოთხოვნით, გიორგი ქოჩორაშვილი აწერს ხელს პორტუგალიურ გრანდთან 5-წლიან კონტრაქტს და 2025 წლის 1 ივლისიდან ფეხბურთელი „სპორტინგს“ შეუერთდება, „ლევანტე“ კი ტრანსფერის სანაცვლოდ, 5.5 მილიონ ევროს მიიღებს.
ეს არის KOCHORA MENTALITY. ის, რაზედაც თავად ბევრჯერ საუბრობს, რომ არასდროს უნდა დანებდე, გიორგი ქოჩორაშვილმა საკუთარი თავის განვლილი გზით უამრავ ადამიანს მაგალითად მისცა“, - წერს საბა საპანაძე.
⭕ ასევე დაგაინტერესებთ:
🎥 რა არ უნდა გავაკეთოთ ქორწილში? - რას ამბობს წვეულებების ცნობილი წამყვანი ემილი გოგუა
🎥 „მასწავლებლის შვილი“, დამატებითი პასუხისმგებლობა თუ პრივილეგია? - ფსიქოლოგის რჩევები
