დღეს, 26 ივლისს, ტელეკომპანია „რუსთავი - 2“-ის ჟურნალისტ გიორგი სანაიას მკვლელობიდან 23 წელი შესრულდა.
2001 წლის 26 ივლისს გიორგი სანაია თბილისში, საკუთარ ბინაში გარდაცვლილი იპოვეს. გიორგი სანაია პოპულარული ტელეწამყვანი იყო და მისმა მკვლელობამ ქვეყანაში მრავალათასიანი საპროტესტო აქციები გამოიწვია. საზოგადოება ამ ფაქტს პოლიტიკურ მოტივებს უკავშირებდნენ.
აღნიშნულ საქმეზე გამოძიება ორი წლის განმავლობაში მიმდინარეობდა. 2003 წლის 9 ივლისს სასამართლომ მკვლელობაში დამნაშავედ შსს-ის ყოფილი თანამშრომელი 32 წლის გრიგოლ ხურცილავა ცნო და მას 13 წლით თავისუფლების აღკვეთა მიუსაჯა. მკვლელობის ოფიციალურ მიზეზად კი პირადი მოტივი დასახელდა.
2004 წლის დეკემბერში საქართველოს უზენაესი სასამართლოს საკასაციო პალატამ არ დააკმაყოფილა სანაიას მეუღლის ხათუნა ჩხაიძის მოთხოვნა, რომელიც მეუღლის მკვლელობის საქმის ხელახლა გამოძიებას მოითხოვდა.
ხათუნა ჩხაიძეს მიაჩნდა, რომ გამოძიება პროცესუალური ნორმების დარღვევით წარიმართა.
სასამართლომ ასევე არ დააკმაყოფილა გრიგოლ ხურცილავას ადვოკატის დავით დადიანის მოთხოვნაც დაცვის ქვეშ მყოფისთვის განაჩენის შემსუბუქების შესახებ. დავით დადიანის მტკიცებით, გრიგოლ ხურცილავამ დანაშაული აფექტის მდგომარეობაში ყოფნისას ჩაიდინა.
საშუალო სკოლის დამთავრების შემდეგ, გიორგი სანაია სწავლობდა თბილისის სახელმწიფო უნივერსიტეტის ჟურნალისტიკის ფაკულტეტზე. 17 წლის ასაკში ის კორესპონდენტად წავიდა აფხაზეთის ომში. სტუდენტობის პერიოდშივე მუშაობდა სხვა და სხვა ჟურნალ-გაზეთებში. მოგვიანებით, მან მუშაობა დაიწყო ტელესამაუწყებლო კომპანია „რუსთავი 2“-ში. სადაც გიორგი მიჰყავდა იმ დროისათვის ყველაზე პოპულარული თოქშოუ „ღამის კურიერი“.
ასევე დაგაინტერესებთ:
🎥 როგორ აღნიშნა ნატალია ყიფშიძემ დაბადების დღე - კადრები წვეულებიდან
⭕სვანეთში დაკარგული ახალგაზრდების სამძებრო სამუშაოებში ვერტმფრენი ჩაერთო
