იტალიური „ფროზინონესა“ და საქართველოს ეროვნული ნაკრების შემტევით, გიორგი კვერნაძით, ევროპული გრანდების ინტერესი დღითი დღე იზრდება. 23 წლის ქართველი გარემარბი მიმდინარე სეზონში შესანიშნავ ფორმაშია, რამაც სერია A-ს წამყვანი გუნდების ყურადღებასთან ერთად, სხვა ტოპ-ლიგების წარმომადგენელთა ყურადღებაც მიიპყრო.
იტალიელი ინსაიდერის, ნიკოლო სკირას ცნობით, „რომასა“ და „ნაპოლის“ გარდა, ახალგაზრდა ფეხბურთელით ინგლისური და ფრანგული კლუბებიც სერიოზულად ინტერესდებიან. კერძოდ, პრემიერლიგიდან „კრისტალ პალასი“ და „ევერტონი“, ხოლო საფრანგეთის ლიგა 1-დან „მონაკო“ უკვე შეეცადნენ მოთამაშის წარმომადგენლებთან პირველადი კონტაქტის დამყარებას. გარდა ამისა, მანამდე გავრცელებული ინფორმაციით, კვერნაძის ტრანსფერით „ჰალ სიტიც“ იყო დაინტერესებული.
გიორგი კვერნაძე „ფროზინონეს“ 2023 წლის ზაფხულში, ფოთის „კოლხეთი 1913“-იდან იჯარის წესით შეუერთდა. წარმატებული სადებიუტო პერიოდის შემდეგ, იტალიურმა მხარემ ქართველი ფეხბურთელის კონტრაქტი გამოისყიდა და მასთან ხელშეკრულება 2028 წლამდე გააფორმა.
2026/27 წლების სეზონის სტარტი ქართველი შემტევისთვის განსაკუთრებით შედეგიანი აღმოჩნდა - სერია A-სა და იტალიის თასზე ჩატარებულ 10 შეხვედრაში მან 5 გოლის გატანა და 4 საგოლე გადაცემის შესრულება მოახერხა.
ქართველმა ფეხბურთელმა, რომელსაც ადგილობრივი მედია ხშირად „ახალ კვარად“ მოიხსენიებს, განსაკუთრებით შთამბეჭდავად „ლეჩესთან“ გამართულ ბოლო ტურის მატჩში ითამაშა. „ფროზინონეს“ 5:1 გამარჯვებაში კვერნაძემ გადამწყვეტი როლი შეასრულა - მოიპოვა პენალტი, ორჯერ საგოლე პასი გააკეთა და შეხვედრის საუკეთესო მოთამაშის ტიტულიც დამსახურებულად მოიპოვა.
⭕ ასევე დაგაინტერესებთ:
⭕ რა არის ღუმლის უჯრის რეალური დანიშნულება, რომელსაც არასწორად ვიყენებთ?
⭕ ასისტების დუბლი და მოპოვებული პენალტი - გიორგი კვერნაძე შესანიშნავ ფორმაშია!
წყარო: newshub.ge
