ხელისუფლებას ბოლო შანსი აქვს, აღმოფხვრას ნაპრალი მოსახლეობასთან და აჩვენოს, რომ ის არ არის არადეკლარირებული რუსული ძალა, - ამის შესახებ საქართველოს პრეზიდენტმა, სალომე ზურაბიშვილმა „სიენენის“ ეთერში განაცხადა.
🔵„გაიწვიეთ ეს დედამო@@ნული კანონი და მოუფრთხილდით გულანთებულ ქართველ ახალგაზრდებს“ - ნიკოლოზ რაჭველი
როგორც სალომე ზურაბიშვილმა აღნიშნა, იმ დროს, როდესაც საქართველო კანდიდატის სტატუსზე გადაწყვეტილების მოლოდინშია და არავითარი საჭიროება არ ყოფილა არასამთავრობო ორგანიზაციების რეგისტრაციის, ამ კანონმდებლობის წარდგენა რუსული პოლიტიკის ინტერესების გატარებად გამოიყურება.
„ხდება ხალხის ნების თავისუფლად გამოხატვის ჩახშობა, ხალხი გამოდის ერთადერთი მოთხოვნით, რომ გაიწვიონ უკან კანონი, რომელზედაც, სავარაუდოდ, ვენეციის კომისია იტყვის, რომ არ გააჩნია საკუთარი პოზიცია. ასეთ დროს ხელისუფლებას უნდა ესმოდეს, რომ ეს მათი ბოლო შანსია, აღმოფხვრას ნაპრალი, რომელიც სულ უფრო ღრმავდება. ბოლო შანსი აქვთ, აჩვენონ, რომ ისინი არ არიან არადეკლარირებული რუსული ძალა“, - აღნიშნა სალომე ზურაბიშვილმა.
წამყვანის კითხვაზე, რატომ სურს ქვეყანას, რომელსაც ევროპული მისწრაფება აქვს, მიიღოს კანონი, რომელიც ანტიდემოკრატიულად შეფასდა და რატომ სურს ამ გზით წასვლა, ზურაბიშვილმა აღნიშნა:
„ძალიან ნათელია, რომ ქვეყანასა და მოსახლეობას არ სურს ეს გზა. ყოველ ჯერზე, საქართველოს უახლოეს ისტორიასა თუ წარსულში, არჩევანი არსებობდა და საქართველოს მოსახლეობის პასუხი იყო, მათ შორის, ძალიან ბევრჯერ ქუჩიდან, რომ ჩვენ გვსურს ევროპა, რომ ევროპაა ჩვენი მომავალი და ღირებულება, ეს ხდება ისევ.
წარმოდგენილი კანონმდებლობა, რომელზედაც ვთქვი, რომ ვეტოს დავადებ, ყველა იმ პრინციპის საწინააღმდეგოა, რომელსაც იცავს ევროკავშირი. ეს ხდება იმ დროს, როდესაც ჩვენ ველოდებით კანდიდატის სტატუსზე გადაწყვეტილებას, რომელიც საქართველომ რამდენიმე თვის წინ ვერ მიიღო, როდესაც ის მიანიჭეს უკრაინასა და მოლდოვას.
საქართველოს მოსახლეობამ იცის, რომ ძალიან მნიშვნელოვან მომენტში ვიმყოფებით მათი მომავლისთვის, იციან, რომ მათი შვილების მომავალი განისაზღვრება იმით, თუ რას მოვიმოქმედებთ უახლოეს მომავალში და ისინი მკაფიოდ ამბობენ, რომ სურთ ევროპა“.
ცნობისთვის, რუსთაველის გამზირზე, სადაც ე.წ. აგენტების კანონის წინააღმდეგ აქცია მიმდინარეობდა, სამართალდამცველებსა და დემონსტრანტებს შორის დაპირისპირება მოხდა. აქციის მონაწილეები პარლამენტის წინ დამონტაჟებული ჯებირების მოხსნას და პარლამენტის ეზოში შესვლას ცდილობდნენ, რა დროსაც სამართალდამცველებმა მათ წყლის ჭავლი მიუშვირეს. ასევე, გაუშვეს ცრემლსადენი გაზი.
აგრეთვე დაგაინტერესებთ:
