„პარი სენ-ჟერმენმა“ საკუთარ სტადიონზე „არსენალი“ ჩემპიონთა ლიგის ნახევარფინალის განმეორებით შეხვედრაში ანგარიშით 2:1 დაამარცხა.
ფრანგულმა კლუბმა ინგლისურ კლუბს ორი მატჩის ჯამში 3:1 მოუგო და ჩემპიონთა ლიგის ფინალური საგზური მოიპოვა.
„პარი სენ-ჟერმენმა“ „არსენალი“ პირველ შეხვედრაში „ემირეიტსის სტადიონზე" 1:0 დაამარცხა. ფინალში პარიზული კლუბი „მილანის ინტერს“ დაუპირისპირდება, რომელიც 31 მაისს გერმანიაში გაიმართება.
ხვიჩა კვარაცხელიამ „პარი სენ-ჟერმენთან“ ერთად ლიგა 1-ის ჩემპიონობა უკვე იზეიმა. ქართველი ფეხბურთელი იტალიის სერია A-ს გამარჯვებულიცაა - „ნაპოლიში“ თამაშის პერიოდში, 2023 წელს, 33 წლის შემდეგ, კლუბი პირველად გახდა იტალიის ჩემპიონი.
ქართველი ფეხბურთელი „პარი სენ-ჟერმენის“ რიგებს მიმდინარე წლის იანვარში შეუერთდა.
ხვიჩა კვარაცხელია პირველი ქართველია, რომელიც ჩემპიონთა ლიგის სეზონის საუკეთესო ახალგაზრდა ფეხბურთელად დასახელდა.
გარდა ამისა, ხვიჩა დამოუკიდებელი საქართველოს ისტორიაში პირველი ქართველი ფეხბურთელია, რომელიც „The Best FIFA Football Awards 2023“-ზე (ფეხბურთის საერთაშორისო ფედერაციის დაჯილდოების ცერემონია) საუკეთესო 10 ფეხბურთელს შორის დასახელდა.
2023 წელს ხვიჩა კვარაცხელია „ოქროს ბურთის“ ფინალისტიც იყო.
⭕ ასევე დაგაინტერესებთ:
