დღეს, 20 მარტს ქართველი მწერლის, პროზაიკოსის, პოეტის და დრამატურგის ოთარ ჭილაძის დაბადების დღეა.
განათლების, მეცნიერებისა და ახალგაზრდობის მინისტრის კონსულტანტი ზოგადი განათლების საკითხებში გია მურღულია მწერალს იგონებს და დაბადების დღეს ულოცავს.
მისი თქმით, ვერავინ წერს ქალზე ისეთი ცოდნითა და გემოვნებით, როგორც ოთარ ჭილაძე და ამას მოწმობს უკვე კლასიკად ქცეული ფრაზა ლექსიდან „შენ ხარ ოთახში ჰაერზე მეტი“.
„20 მარტი ოთარ ჭილაძის დაბადების დღეა - ადამიანის, რომელმაც გამორჩეულად მნიშვნელოვანი პოეზია შექმნა.
თითქმის 16 წელი გავიდა ოთარის გარდაცვალებიდან, მაგრამ მისი ლექსები ამ გარდაუვალ ფაქტს არ ეგუებიან - ისინი მანამდე იცოცხლებენ, სანამ საქართველოში გონიერი, მშვენიერი და გემოვნებიანი სიტყვის თაყვანისცემას არ შეწყვეტენ.
კარგი ის არის, რომ ეს არასდროს მოხდება. ეს ლექსი 1956 წელს დაიწერა - იმ დროს, როდესაც ძალიან ბევრს პოეზია უბრალოდ პათეტიკა და ძლიერთა მსახურება ეგონა:
„წვიმს, მოწყენილი და სველი კვამლი ცას ეტმასნება და სადღაც ერთვის. ეს შემოდგომის დღეებიც წავლენ, ხსოვნას შერჩება ათასში ერთი.
აი, გაივლის სულ ცოტა ხანი, მეც მოგონებად ვიქცევი შენთვის.
წვიმს, მოწყენილი და სველი კვამლიცას ეტმასნება და სადღაც ერთვის".
რა სიმშვიდეა. როგორი ღირსებაა. რანაირი ნათელი სევდაა. ასე იწერება არა ამბავი, არამედ განწყობა. ის, რომ მე და შენ ეს კაცი მოგვწონს, ჩვენს საერთო კულტურას ქმნის. საქართველოში დიდი ხანია არსებობს ოთარ ჭილაძის კლუბი, რომელშიც ძალიან ბევრი ადამიანია გაერთიანებული. ჩვენ გვახსოვს მისი ლექსები, მისი ხედვები, მისი ფრაზები, მისი განუმეორებელი შედარებები (შედარება მხატვრული სახის აკვანია).
ამ კაცის ყველა პატარა პოემა ახალი პოეტური კულტურის განსახიერებაა. არავისთან შემხვედრია სიმშვიდის მსგავსი ესთეტიკა და ვერავინ წერს ქალზე ისეთი ცოდნითა და გემოვნებით, როგორც ოთარი.
უკვე კლასიკაა:
„შენ ხარ ოთახში ჰაერზე მეტი“. ოთარ ჭილაძეც უფრო მეტია, ვიდრე ახლა ჩანს“, - წერს გია მურღულია.
⭕ ასევე დაგაინტერესებთ:
🎥 7 საკვები მაღალი წნევის მკურნალობისთვის - ეს აუცილებლად უნდა სცადოთ!
⭕მცხეთაში სასწრაფო დახმარების ექიმებმა ქალი მანქანაში ამშობიარეს
