13 წლის მართა რამიშვილი უსაყვარლესი მსახიობის, მომღერლისა და ტელეწამყვანის, ლაშა რამიშვილის ქალიშვილია. მამა-შვილის დუეტი, არაერთხელ გაჟღერდა ტელევიზიით, თუმცა მართას დამოუკიდებლად შესრულებულმა სიმღერამ, საზოგადოებაში განსაკუთრებული ემოცია გამოიწვია. მიუხედავად პატარა ასაკისა, ის საკმაოდ ჩამოყალიბებულად მღერის, არაჩვეულებრივი ხმის ტემბრი და დახვეწილი შესრულების მანერა აქვს, რაც მომავალში აუცილებლად მისი წარმატების საბაბი გახდება.
– მართა, რა ასაკიდან დაიწყე სიმღერა და სამომავლოდ თუ გაქვს არჩეული პროფესია?
– სხვათა შორის, საკმაოდ მორცხვი ბავშვი ვიყავი უცხოებთან, ახლობლებთან კი – ძალიან ცელქი. თუ ისე არ იყო რამე, როგორც მე მინდოდა, სულ ვტიროდი (იცინის). თუმცა, ძალიან მხიარული ვიყავი. მახსოვს, შევიდოდი ოთახში და ვმღეროდი ჩემთვის. უცხოებთან სიმღერა რომ მერიდებოდა და მრცხვენოდა, ბავშვური კომპლექსი იყო და რაც წლები მომემატა, ეს კომპლექსი დავძლიე. ამაში მშობლები და ახლობლები დამეხმარნენ. დედას და მამას სამსახურში რომ დავდიოდი, ყველა მეუბნებოდა, ეს სიმორცხვე უნდა დაძლიო, გადასარევად მღერიო. დავფიქრდი და მივხვდი, სწორს მეუბნებოდნენ. კომპლექსიც დავძლიე და უფრო თავდაჯერებულიც გავხდი. ასე რომ, პატარა ასაკიდან კარგად ვმღერი, ნიჭიერთა ათწლედშიც დავდივარ, ვსწავლობ ფორტეპიანოზე დაკვრას. ასევე, დავდივარ, „სუხიშვილებში“ ცეკვაზე, ანსამბლ „ლომისში“ და ვოკალის აკადემიაში – სიმღერაზე. ყველა მეკითხება: სკოლის პარალელურად, ამდენ რამეზე სიარულს როგორ ასწრებო (იცინის). მართალია, ძალიან ვიღლები, თუმცა, ვასწრებ – სკოლაშიც კარგი მოსწავლე ვარ და მუსიკას და ცეკვასაც ვასწრებ. სამომავლოდ პროფესია არჩეული მაქვს, მინდა, მამის კვალს გავყვე და მსახიობი და მომღერალი გამოვიდე.
– გამიკვირდა, რომ თქვი მორცხვი და კომპლექსიანი ვიყავიო, რადგან ყველა ვიცნობთ მამაშენს, ლაშა რამიშვილს, რომელიც ურთიერთობებში ლაღი და კომუნიკაბელურია და მისი შვილი მორცხვი, ცოტა უცნაურია.
– მამა, ყოველთვის მაქსიმუმს ითხოვდა ჩემგან და ცოტა მკაცრიც იყო. თუმცა, მისი და დედას დამსახურებაა, რომ სიმორცხვე და კომპლექსი დავძლიე. სხვათა შორის, მამა სულ დაკავებულია, მაგრამ ყოველთვის აქვს დრო შვილებთან საურთიერთოდ. უფროსი და უმცროსი ძმები მყავს, მე შუათანა ვარ. მამა, ძალიან მზრუნველია, სულ გვეკითხება, დღემ როგორ ჩაიარა, რამე ხომ არ გჭირდებათო. ცდილობს, თავისუფალი დრო ოჯახში, ჩვენ გვერდით გაატაროს. რაც არ უნდა დაღლილი იყოს, ბევრი საქმე ჰქონდეს, დროს ყოველთვის გამონახავს ჩვენთან სათამაშოდ, ფილმის საყურებლად, სასეირნოდ... მამა სულ ჩართულია ჩემს ყოველდღიურობაში, ნებისმიერ სიტუაციაში გვერდით მიდგას. რომ ვიცით, სამსახურშია და არ ველოდებით, მოიპარავს დროს, მოირბენს ხოლმე, მე და ჩემს ძმებს ტკბილეულს მოგვიტანს და ისევ სამსახურში გარბის. შემიძლია, თამამად ვთქვა, რომ მამისგან განებივრებული გოგო ვარ. სულ მიკეთებს საჩუქრებსა და სიურპრიზებს. მეგობრებთან ერთად რომ ვარ, შემოიპარება, მოგვიტანს წვენებს და შოკოლადებს და გვახარებს. ჩემი მეგობრები გიჟდებიან მამას სიურპრიზებზე და სულ მეუბნებიან: რა ხალისიანი და კარგი მამა გყავსო და მე მიხდიან მადლობას (იცინის). რომ დაინახავენ მამაჩემს, სასწაული ემოციით ხვდებიან, ყველას უყვარს. თუ უცხო საზოგადოებაში ვარ, არ მიყვარს აფიშირება – ლაშას შვილი ვარ-მეთქი და რომ იგებენ, ყველა ღიმილით ამბობს: აუ, რა მაგარი მამა გყავსო. ამაზე მეტად რა უნდა გამიხარდეს? ნიჭიერთა ათწლედში ფორტეპიანოს გამოცდა მქონდა. უამრავი ადამიანი ესწრებოდა ჩემს გამოსვლას, მათ შორის მუსიკოსები და ჩემი პედაგოგები. მამა რომ დაინახეს ყვავილებით, გადაირივნენ: უი, ამის გოგო ხარ? ვიღაცას გვახსენებდი და აი, თურმე, ვისი შვილი ყოფილხარო (იცინის). მამამ ყვავილები ყველა ჩემს მასწავლებელს დაურიგა.
– ყველაზე დასამახსოვრებელი საჩუქარი-სიურპრიზი რა იყო მამისგან, რასაც არ ელოდი?
– ძალიან მინდოდა, რომ მთელი ოჯახი უცხოეთში წავსულიყავით დასასვენებლად. ერთი თვის წინ, მამამ საჩუქარი გაგვიკეთა და მთელი ოჯახი პრაღაში წაგვიყვანა. იქ შევხვდით შობას და მისი ეს საჩუქარი და ეს დაუვიწყარი მოგზაურობა არასოდეს დამავიწყდება.
სხვათა შორის, იქიდან გერმანიაში წავედით და უბედნიერესები ვიყავით. ასე რომ, მამამ გამორჩეული საჩუქარიც გამიკეთა და ოცნებაც ამიხდინა. ძალიან მანებივრებს და უზომოდ ბედნიერი ვარ, ასეთი ოჯახი რომ მაქვს და ასეთი მამის შვილი ვარ.
აგრეთვე დაგაინტერესებთ:ვ
⭕„დაუვიწყარი ღამე“ - ნუცა ბუზალაძე ელტონ ჯონის „ოსკარის“ წვეულებაზე იმყოფებოდა
⭕„ჩემი ცხოვრება ორ ნაწილად იყოფა, ღმერთმა მეორედ მაჩუქა სიცოცხლე“ - რას ამბობს მერიკო კარტოზია
წყარო: tbiliselebi.ge
