სოციალურ ქსელებში გავრცელებული რეკლამები პაციენტებში ხშირად ქმნის არასწორ და გადაჭარბებულ მოლოდინებს, რაც რეალობას არ შეესაბამება. ამ თემაზე კოტე მათითაშვილის პოდკასტში სტუმრობისას „ჟორდანიას კლინიკის“ პლასტიკური ქირურგიის დეპარტამენტის ხელმძღვანელმა, სალომე სვანაძემ ისაუბრა.
ქირურგმა ხაზი გაუსვა იმას, რომ ნებისმიერი პლასტიკური ჩარევა მათ კლინიკაში მულტიდისციპლინარულ გუნდთან ერთად იგეგმება, თუმცა საბოლოო შედეგისთვის პოსტოპერაციულ პერიოდს გადამწყვეტი მნიშვნელობა აქვს.
სალომე სვანაძის თქმით, პაციენტები ხშირად ვერ აცნობიერებენ, რომ რეალური შედეგის მისაღებად ხანგრძლივი დრო და მოთმინებაა საჭირო.
„პლასტიკური ოპერაციის შემდგომი პერიოდია მთავარი. ამ ჩარევას მულტიდისციპლინარულ გუნდთან ერთად ვამზადებთ. რეაბილიტაცია უმნიშვნელოვანესია, რაც ოპერაციის წარმატებული შედეგის 50%-ს წარმოადგენს. პაციენტები ძალიან ხშირად ნერვიულობენ, თუ როგორი იქნება შედეგი; ელოდებიან, რომ საოპერაციოდან მეორე დღეს ნაკერიც კი იდეალური იქნება, ამ დროს კი ამ პროცესს სჭირდება მინიმუმ 12 თვე“, - განაცხადა სალომე სვანაძემ.
ქირურგმა მკაცრად გააკრიტიკა სოციალურ მედიაში არსებული სარეკლამო კამპანიები, რომლებიც ადამიანებს მყისიერ და უნაკლო შედეგებს ჰპირდებიან, რაც საბოლოო ჯამში მათ იმედგაცრუებას იწვევს.
„ცხადია, ეს ცრუ მოლოდინი ადამიანებს აქვთ იმ რეკლამებიდან, რაც სოცქსელებში ვრცელდება. ეს ყოველივე სწორედ რომ არასწორი მოლოდინია და დაუშვებელია ადამიანების მოტყუება“, - აღნიშნა ქირურგმა პოდკასტში.
ექიმის განმარტებით, პლასტიკური ქირურგია არ არის ჯადოსნური ჯოხი და სრულყოფილი, საბოლოო ვიზუალური ეფექტის ჩამოყალიბებას, ქსოვილების აღდგენის ანატომიური თავისებურებებიდან გამომდინარე, ზუსტად ერთი წელი სჭირდება.
ვრცლად, ნახეთ ვიდეო:
