„განსაკუთრებული ყურადღება ეთმობა ონკოლოგიური დიაგნოზის მქონე მოქალაქეების საჭიროებების გათვალისწინებას. გასული წლიდან საქართველოს ყველა მოქალაქისთვის ფინანსდება ქიმიო, ჰორმონო და სხივური თერაპიის, ასევე ონკოქირურგიის სერვისები“, - აღნიშნულის შესახებ ზურაბ აზარაშვილმა საკანონმდებლო ორგანოში სიტყვით გამოსვლისას განაცხადა.
ჯანდაცვის მინისტრობის კანდიდატმა აღნიშნა, რომ უახლოეს პერიოდში უწყება ონკოლოგიური დაავადებების მქონე პაციენტებს ადრეულ კვლევებსაც დაუფინანსებს.
ზურაბ აზარაშვილმა ონკოლოგიური დიაგნოზის მქონე ბავშვების საზღვარგარეთ მკურნალობის პროგრამაზეც ისაუბრა და აღნიშნა, რომ ამ მიმართულებით საერთაშორისო თანამშრომლობა საქართველოში ბავშვთა ონკოლოგიის სერვისის განვითარებას საფუძველს ჩაუყრის.
მისივე თქმით, სამინისტრომ დაიწყო მუშაობა პროექტზე, რომელიც უცხოეთის წამყვან კლინიკებში ონკოლოგიის მიმართულებით ახალგაზრდა ექიმების გადამზადებას გულისხმობს.
„უნდა აღინიშნოს 2023 წელს დაწყებული ონკოლოგიური დიაგნოზის მქონე ბავშვების საზღვარგარეთ მკურნალობის პროგრამა, რომლის ფარგლებში ბავშვებისთვის ხარისხიანი და მაღალტექნოლოგიური მომსახურებები იფარება ესპანეთის, ისრაელისა და თურქეთის პარტნიორ 6 კლინიკაში. პროგრამის ამოქმედებიდან დღემდე პროგრამით ისარგებლა, ან მომსახურების პროცესშია ჯამში 50 პატარა პაციენტი“, - განაცხადა ზურაბ აზარაშვილმა.
აგრეთვე დაგაინტერესებთ:
⭕დასავლეთ საქართველოში არასრულწლოვანმა იმშობიარა - გაუპატიურების ბრალდებით მამა დააკავეს
