5 იანვარს, ოკუპირებული გალის რაიონის სოფელ საბერიოში, ჭოლარიების საცხოვრებელ სახლში გაჩენილი ხანძრის დროს დაღუპული ხუთი დედმამიშვილი 9 იანვარს დაკრძალეს.
სოციალურ ქსელში დაკრძალვიდან ფოტო გავრცელდა, სადაც გარდაცვლილი ბავშვების მამას თავზე მტრედი დააჯდა.
აღნიშნულ ფაქტს სოციალურ ქსელში ეხმაურება მწერალი გიორგი კეკელიძე და მომხდარის შესახებ წერს.
„ის მტრედი ხომ საერთო ციდან იყო, საბერიოს ანგელოზების მამას რომ დაეყრდნო. ეს ბავშვებიც ამ ცის ნაწილები არიან დღეს. უსამართლოდ და ულოგიკოდ, მაგრამ მაინც.
მე რელიგიური ადამიანი ვერ ვარ, მაგრამ ის კაცი ვარ, სანუგეშო სიტყვა რომ უკეთესი საყრდენი მგონია, ვიდრე სხვა რამ ნებისმიერი. ამიტომაც, ხან, ალბათ ასე თქმა სჯობს, როგორც ნეტარმა ავგუსტინემ გვითხრა: - „სიკვდილი არა არის რა, მე მხოლოდ გაღმა მხარეს გავედი“. მაინც სიტყვაა ყავარჯენი, თუნდაც კოჭლი ყავარჯენი, მაგრამ ერთადერთი, რაც ადამიანს აქამდე მოუგონია. და მე მინდა, რომ მშობლებმა შეძლონ და ახლა ძალა გამოიგონონ - ცოცხლად დარჩენის ძალა. ეს იქნება ჩემი შენათვალი, მეტი არაფერი. მგონი იმ მტრედისაც ეს იყო,“ - წერს გიორგი კეკელიძე.
⭕ ასევე დაგაინტერესებთ:
